1 Samueli 4
4
1aKa pinauno i Semueli hawe a luwudo to Isaraeli.
Burua Pedandia-Do i Ue rinontu
4:1b-22
1bTo Isaraeli mpeluarako meteaako ira to Pelisiti ka mpekema i Ebe-Haese, ka to Pelisiti mpekema i Apeki. 2To Pelisiti mpo'atora baresido umaropi ira to Isaraeli. Peteaa tedoa langkai. To Isaraeli mentenangi a nto Pelisiti, anu memate a mpeteaa atuu bara'ura pato nsowu mia. 3Mansado mpekule sorodadudo to Isaraeli a mpekemaado, mpotae iramo luwu mia mota'udo, ”Tembio Ondae i Ue ka Doweweu kita mentenangi a nto Pelisiti oleo andio? Aiwa ka tome'alao burua pedandia-Do i Ue inso i Silo ka Do'aiwa i Ue i oloto kumadudui kita inso a ngkaedo iwali.” 4#Pel. 25:22Ka do'amba tongku atuu mpontena mia lumako i Silo. Domentandeo inso i ra'ai burua pedandia-Do Ueno luwuakoano, anu po'ianga-Do iwawono kerubi. Orua ira anano i Eli, i Hopini ka i Pinehasi, rau ira i ra'ai umpeda a burua pedandia-Do Ue Ala 5Haweno burua pedandia-Do i Ue a mpekemaa, mpebooli ira luwuno to Isaraeli, tedoa memawongko ranta rende wita. 6Rumongeo peboolido atuu, mpotae ira to Pelisiti, ”Hapa dompebooliako tedoa meroku a mpekemaado to Ibarani atuu?” Mansado mento'orio to Pelisiti nine burua pedandia-Do i Ue haweomo a mpekemaado to Isaraeli, 7medoito iramo hangano potaedo, ”Ondae Ue Ala hawe Iramo a mpekemaa atuu.” Mpotae ira, ”Memasola kitamo! Nahi hori hina gagi anu kanandio se'eluno. 8Memasola kitamo! Isema ta polio motola kita inso a ngkae-Do Ue Ala anu mongkokongiri andio? Ondaemo andio Ue Ala anu humuku ira to Masiri mperupa-rupa pohuku i pada one. 9#Mpo. 10:7-8; 13:1Pokorosoo aroamiu ka imemosia, Oo to Pelisiti, kasi megagi atado to Ibarani, kana ondae hori ira megagi atamiu. Impokomosiao aroamiu ka impeteamo!” 10Mpetea iramo to Pelisiti ka donangi ira to Isaraeli, sompo mia molai a ngkemano. Tenangido atuu tedoa langkai. Inso a nto Isaraeli anu mate, tolu pulu nsowu sorodadu anu mpelempa. 11Ka burua pedandia-Do Ue Ala rinontu ka orua ira anano i Eli mate.
12Asa mia inso a nto Benami molai inso a mpeteaa ka ihawe i Silo oleo koa atuu, sangkano teberi-beri ka mewita toro'uluno. 13Mansano hawe, i Eli kontongaano mentoro a ngkadera mesisikori a wiwi nsala, hangano aroano mondende masusaakono burua pedandia-Do Ue Ala. Mia atuu aiwa i kota ta pauo lele atuu, onaemo ka dontewuka mpebooli ihino kota atuu. 14Rumongeo peboolido atuu, mesikenoomo i Eli, ”Hapa dontewukaako atuu?” I tempono atuu hawe mia mompauakono lele i Eli. 15Tinuwuno i Eli, sio pulu ka oalu nta'u. Matano morawuomo nami pongkita.
16Motae mia atuu ndi Eli, ”Ongkuemo anu molai inso a mpeteaa dasarai kuhawe.” Mesikeno i Eli, ”Hapamo anu gagi, anaku?” 17Sumangki anu mowawa lele atuu, ”To Isaraeli mpolai ira inso i arodo to Pelisiti ka bawaa mentenangi langkai. Orua ira anamiu, i Hopini ka i Pinehasi, mate iramo ka Burua Pedandia-Do Ue Ala rinontu.” 18Mansano ipauo mongkona Burua Pedandia-Do Ue Ala, tebangkuomo i Eli sinsingara inso a ngkadera, i horino pewowa bente. Tepudu we'uno ka mate, hangano mota'uomo ka koroino mewalo. Onae moparenta gagi puu mpobitara a nto Isaraeli pato pulu nta'u tehineno.
19Ponino beine, kombiano i Pinehasi, kontongaano mentia ta ronga me'ana. Mansano rumongeo nine Burua Pedandia-Do Ue Ala rinontuomo ka ponino anu tama saru tamano mate iramo, mepobingko mahaki kompono, onae ka ipentoro ka ipe'ana. 20Mansano ta ronga mate, luwuno beine anu mpentade umpedaakono, mpotae, ”Si doito, nde omue umarikomo me'anaakono asa ana ntama.” Sine nahi sangki ke maupo merio ira. 21Ineeakono anano atuu i Ikabo, ipotae, ”Tetadiomo marambaa inso i Isaraeli,” hangano Burua Pedandia-Do Ue Ala rinontuomo ka hangano ponino ka tamano mate iramo. 22Ipotae, ”Tetadiomo marambaa inso i Isaraeli, hangano Burua Pedandia-Do Ue Ala rinontuomo.”
Currently Selected:
1 Samueli 4: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
