1 Samueli 3
3
I Semueli pinoboi
3:1–4:1a
1I Semueli anu da mongura, gagi puu mpopekakaako-Do i Ue a laro pontaateno i Eli. I tempo atuu molaa i hawe pau-Do i Ue, maupo pepopokita molaa.
2Ia asa oleo, i Eli kontongaano mepombole a mpoturiano. Matano mompu'uomo morawu nami pongkita moiko. 3#Pel. 27:21Lampu a Ngkema-Do Ue Ala napi pinepate. I Semueli kontongaano moturi a laro raha-Do i Ue, po'iangano burua pedandia-Do Ue Ala. 4Ondae i Ue mepoboi, ”Semueli! Semueli!” Sumangki i Semueli, ”Ndio aku Ama.” 5Umarino atuu meluluomo lumako tepohaweakono i Eli ka ipesikeno, ”Omiuke Ama moboi aku?” Sine ipotae i Eli, ”Ongkue nahi kupoboiko, lakomo wali poturi.” I Semueli waliomo lumako moturi. 6Pohona mbo'u Ondae i Ue mepoboi, ”Semueli! Semueli!” Mewanguomo i Semueli ka i lako tepohaweakono i Eli. Ka ipesikeno, ”Omiuke Ama moboi aku?” Sine ipotae i Eli, ”Ongkue nahi kupoboiko anaku, lakomo wali poturi.” 7I Semueli napi to'ori Ira lahi Ondae i Ue. Pau-Do i Ue napi pinokomengkaa ndi onae. 8Ondae i Ue moboio i Semueli anu kopentoluno. Onaemo ka ipewangu lumako tepohaweakono i Eli, ka ipesikeno, ”Omiuke Ama moboi aku?” Ka i'amba tumo'orio i Eli nine Ondaemo i Ue anu moboio nana'ote atuu. 9Onaemo i Eli ka ipotaeakono i Semueli, ”Lakomo poturi. Tewala Dopoboiko, Sangki Ira: Oo Ue, Ipepaumo, ndiomo tetenaa-Miu merorongeakono.” Lumakoomo i Semueli mepombole a mpoturiano. 10Hawe Iramo i Ue, mentade i ra'ai ka Dopepoboi kana se'eluno, ”Semueli! Semueli!” Sumangkiomo i Semueli, ”Ipepaumo, ndio akumo rumongeo.”
11Mepau Ira i Ue ndi Semueli, ”Hinao anu Aku weweuo i Isaraeli, isemamo koa anu rumongeo, ta ngingii a birino. 12I tempo atuu, Aku umihiio anu umariomo Kupauakono i Eli mongkona pe'asa rahano, luwuno inso a inuleno amba-ambano hawe a inuleno pokotompa. 13Umariomo Kupauakono nine Aku humuku ira inuleno ranta nahina tampulaano, hangano pe'ewado ka pompe'uru-urudo anano ndi Ondae Ue Ala anu ito'orio koa sine nahi poko'onto ira. 14Onaemo ka Kupesumpa mongkona inuleno i Eli nine pe'ewado nahi ta pinokontolosiako pesomba sinumbele ke pesomba kaanga ranta nahina tampulaano.”
15Umarino atuu moturiomo i Semueli ranta hawe mo'oru, ka i'amba umungkahio luwuno pewowano raha-Do i Ue. Sine doito pauakono i Eli anu kinitano atuu. 16I Eli moboio i Semueli, ”Semueli anaku.” Sumangki i Semueli, ”Ndio aku Ama.” 17Ipotae i Eli, ”Hapa anu pinau-Do ndi omue? Si wunio ndi ongkue. Ondae Ue Ala Ira humukuko mobea, ke laluaopo mbo'u, tewala mowuniko te'asa mpalimokoa pau inso a luwuno anu pinau-Do ndi omue.” 18Ka i'amba i Semueli pauakono, nahina maupo hapa anu winunino. Ipotae i Eli, ”Ondaemo i Ue, po'ineeomo Doweweuo hapa anu moiko a pongkita-Do.”
19I Semueli kolangka-langkaino. Ondae i Ue kumongkomio ka nahina maupo te'asa pinau-Do anu nahi ta gagi. 20Gagi luwudo to Isaraeli inso i Dani hawe i Bereseba mento'orio nine i Semueli gagiomo nabi-Do i Ue anu pine'ala-ala. 21Inso i tu'ai Ondae i Ue mepopokita mbo'u i Silo. Ondae i Ue mokomengkaao koroi-Do ndi Semueli i Silo, telalo a mpau-Do i Ue.
Currently Selected:
1 Samueli 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
