1 Samueli 23

I Daudi i Kehila

23:1-13

1Pinauako i Daudi, kanandio, ”Ka ito'oriokoa, to Pelisiti kontongaado mensapoio kota Kehila ka domempomuru ira gandu a mponsesaa.” 2Ka i'amba i Daudi mo'ema pontiso ndi Ondae i Ue, ”Tewala Ipemoikoo, aku lumako meteaako ira to Pelisiti.” Dosangkio i Ue i Daudi, ”Lakomo peteaako ira to Pelisiti kumaduduio kota Kehila.” 3Sine mia anu mentondao i Daudi mpotaeakono, ”Pewowoloo, sekonopo i ndi'ai i Yehuda medoito kitamo, tamoako ba kita melako i Kehila umewaio baresi peteado to Pelisiti.” 4I Daudi mo'ema mbo'u pontiso ndi Ondae i Ue, onaemo ka Dosangkio. Pau-Do, ”Lakomo i Kehila, to Pelisiti atuu Aku meweengako ira a ngkaemu.” 5Melako iramo i Daudi saru luwuno miano i Kehila. Ipeteaako ira to Pelisiti, tedoa langkai tenangido, ka pinotuwudo dome'ala ira. Kanandiomo ikadudui ira i Daudi palili i Kehila.

6Tempono ipolai i Abiata anano i Ahimele lumako ndi Daudi i Kehila, iwawao epo a ngkaeno.

7Irongeo i Saulu nine i Daudi rauomo i Kehila. Motae i Saulu, ”I Daudi atuu Dopeweengakonomo i Ue Ala a ngkaeku, hangano lumakoomo umukoo koroino a kota anu moroso pewowa benteno.” 8Onaemo ka iwawa ira i Saulu luwuno palili ka domelako mpetea i Kehila mengkaduo i Daudi saru luwuno miano.

9Mansano tumo'orio i Daudi tinoono i Saulu anu mosa'o ndi onae, ipotaeakono sando mpesomba i Abiata, ”Wawao epo atuu i ndi'ai.” 10Ka i'amba mekakai i Daudi, ”Oo Ue, Ue Alado to Isaraeli, kurongeomo i Saulu montoo ta aiwa rumopuo kota Kehila andio hangano ongkue. 11Nde ira mpeweengako aku palili Kehila a ngkaeno? Ta koa ntu'u haweke i Saulu kana rinongeno tetenaa-Miu andio? Oo Ue, Ue Alado to Isaraeli, Ipauakonomo tetenaa-Miu andio.” Sumangki Ira i Ue, ”Onae ta koa hawe.” 12Mesikeno mbo'u i Daudi, ”Nde ira mpeweengako aku palili i Kehila saru luwuno miaku a ngkaeno i Saulu?” Sumangki Ira i Ue, ”Humbee, ira mpeweengakomiu ndi Saulu.” 13Mepatindaomo i Daudi saru luwuno miano, bara'ura nomo etu mia hadiono, ka domelako mebintao Kehila ba isuamo koa dompokomelako. Tempono ipinaukao i Saulu nine i Daudi metolahakoomo inso i Kehila, nahi gagi lumako metea.

I Daudi i Pada One Sipa

23:14-28

14I Daudi mo'ia a bente i pada one, a mentorukuno Pada One Sipa. A tempo atuu kongkono lumampuio i Saulu, sine nahi Dopeweengakono i Ue Ala a ngkaeno.

15I to'oriomo i Daudi nine i Saulu meluarako umungkeo ta mepateo. Tempono ipo'ia i Daudi i Pada One Sipa i Koresa, 16i Yonata, anano i Saulu lumako tepohaweakono i Daudi i Koresa. Ipokorosoo i Daudi ka ipomperorohi ndi Ondae Ue Ala. 17Ipotaeakono, ”Si doito, omue nahi kotedonta a ngkaedo amaku i Saulu. Lano doto'oriomo amaku i Saulu nine omue kogagi mokoledo to Isaraeli ka ongkue gagi mia ko'orua umarino omue.” 18#1Sam. 18:3Ka do'amba moweweu pedandia i aro-Do i Ue. I Daudi da mo'ia i Koresa, ka i Yonata mekule i rahano.

19 # Pud. 54:2 Sine ba opia ira to Sipa lumako tepohaweakono i Saulu i Gibea, ipotae, ”I Daudi mewuni umpeda ndi omami a bente i Koresa, a pongkuno wita Hakila, i selatano Yesimoni. 20Gagi tewala komiu aiwa Mokole, i'aiwamo. To'oria mamimo meweengakono a ngkaemiu mokole.” 21Motae i Saulu, ”Ondae i Ue rumonso komiu hangano impo'inee aku tuwu. 22Imelakomo, impokomanasao mbo'u ka impepenteeo ba isua po'iangano ka isema anu kumitaomo i ra'ai. Hangano domempauakunemo mia nine mia atuu tedoa hadio akalano. 23Impepenteeomo luwu po'ianga pewuniano. Tewala manasaomo, iwali me'aiwa ndi ongkue, ka to'amba mperonga melako. Tewala lano kongko i wita andio, akumo umungkeo i olodo luwuno to Yehuda.” 24Melako iramo i Sipa mpese'elungio i Saulu. Kontongaano atuu i Daudi saru luwuno miano kongko ira i Pada One Maoni, i lembono te'alaako i selatano Yesimoni.

25I Saulu saru luwuno miano melako me'ungkeo i Daudi. Mansano pinauako i Daudi, lumakoomo a pongkuno watu ka da kongkono mo'ia i Pada One Maoni. Irongeo i Saulu, lumakoomo lumuluo i Daudi i Pada One Maoni. 26I Saulu mesala i apano pongku wita anu i asambalino raane, ka i Daudi saru luwuno miano, mpesala i apano anu i asambalino ramai pongku wita atuu. I Daudi mompari-pari meliahako inso ndi Saulu, kontongaano i Saulu ka luwuno miano mpompete'umala ira mengkaduo i Daudi ka luwuno miano ira merako ira. 27Sine hawe asa mia tinena pauakono i Saulu, ipotae, ”Ipontuturakomo mekule, to Pelisiti mensapoiomo witato.” 28I Saulu menaa-naa lumuluo i Daudi ka ilako umaropi ira to Pelisiti. Onaemo pu'uno po'ianga atuu domeneeakono mia, Pongku Watu Mahaleko.

Currently Selected:

1 Samueli 23: XMZ

Highlight

Copy

Compare