1 Samueli 22

I Daudi mewuni a laro kunepo Adulami

22:1-5

1 # Pud. 57:1; 142:1 Inso i ra'ai lumakoomo i Daudi molai mewuni a ngkunepo Adulami. Mansado merongeo pepaekompono ka luwuno pe'asa rahano, melako iramo ntepohaweakono. 2Ka dontepoasaakonomo mbo'u mia anu memasukara, luwuno mia anu mpolaiako mia mpesinga, ka luwuno mia anu mahaki aroa. Anu tepumpu i tu'ai, bara'ura pato etu mia ka onae gagi petewawado.

3Inso i ra'ai i Daudi lumako i Misipa i wita Moabi ka ipotaeakono mokole Moabi, ”Tarima iramo amaku ka ineku mo'ia ndi omiu, ranta ka kuto'orio hapa po'ehe-Do i Ue Ala ndi ongkue.” 4Ka i'amba wawa ira i arodo mokole wita Moabi, ka dompo'ia ndi ondae tempono i Daudi mo'ia a bente Adulami atuu.

5Sine ipotaeakono i nabi Gati i Daudi, ”Si po'ia a bente atuu. Lakomo ka pekulemo i wita Yehuda.” Lumakoomo i Daudi ka i pewinso a ntobu Kereti.

Sando mpesomba i Nobi mempinepate

22:6-23

6Irongeo i Saulu nine i Daudi saru mia anu mentondao, tino'oriomo pewuniado. I Saulu kontongaano mentoro-toro a toto nkeu tamarisika a pongkuno wita i Gibea. Kaeno mo'ini kansai, ka sorodaduno mpentade i horino. 7Ipotaeako ira i Saulu sorodaduno anu mpentade i horino, ”Omiu to Benami, imerongeo! Nde ta moweeakomiu i Daudi lere pompahoamiu gandu ka lere anggoro? Ke luwumiu andio ta motorokomiu i Daudi gagi petewawa sorodadu asa nsowu ka petewawa sorodadu asa etu, 8kai ntepo'asa umewai aku ka nahina maupo te'asa mia anu pauo ndi ongkue, nine anaku moweweu pedandia saru anano i Isai? Nahina maupo te'asa mia anu me'alaako ndi ongkue ke pauo nine anaku i Yonata sumingkaio i Daudi umewai aku, kanandio onaemo gagi iwaliku.”

9 # Pud. 52:2 Sumangki i Do'egi, to Edomi anu mentade umpeda sorodaduno i Saulu, ”Ongkue kumitao anano i Isai hawe i Nobi ndi Ahimele anano i Ahitubi. 10Onae mo'emaakono i Daudi pontiso ndi Ondae i Ue, ka moweeakono bakuno, ka ponaino i Golia, to Pelisiti atuu iweeakono.” 11Metenaomo mokole moboio sando mpesomba Ahimele, anano i Ahitubi saru luwuno pe'asa rahano, ka luwuno sando mpesomba i Nobi, me'aiwa mpe'aro ndi mokole.

12Motae i Saulu, ”Rongeo anano i Ahitubi!” Sumangki, ”Tabe, ueku mokole.” 13Mesikeno i Saulu ndi onae, ”Tembio ka utepo'asaakono anano i Isai umewai aku, upoweeakono roti ka ponai saru upo'emaakono pontiso ndi Ondae Ue Ala ka imoroso umewai aku, kanandio onaemo gagi iwaliku?” 14Sumangki i Ahimele ndi mokole, ”Isema mbo'u umarino i Daudi anu ta pine'ala-ala, tamoako onae ponimiu mokole ka onae tadulako sorodadu anu dumagai komiu ka pinelangkai a laro somborimiu? 15Komba oleopo andio ka komba da pohona andio kupo'emaakono pontiso ndi Ondae Ue Ala, naahi! Mongkona kutepo'asaakono umewai komiu, mo'ema aku pompehohawamiu mokole, si tuluri kami atamiu andio ke maupo luwudo pe'asa rahaku, hangano omami andio maupo tedei nahi kimponto'ori hapa-hapa mongkona anu gagi atuu.” 16Sine ipotae mokole, ”Omue saru luwuno pe'asa rahamu asalakono mate.” 17Itena iramo mokole miano anu mpentade i horino, ”Imelakomo mpepate ira luwu sando mpesomba-Do i Ue atuu, hangano ondae mpokowalio i Daudi. Maupo domento'orio nine onae molai, nahi domempauo ndi ongkue.” Sine mia atuudo nahi domebehe mpotiio kaedo a nsando mpesomba-Do i Ue atuu. 18Ka i'amba mokole tumenao i Do'egi, ”Lakomo omue pepate ira sando mpesomba atuu.” Lumakoomo i Do'egi to Edomi atuu mepate ira sando mpesomba. Oleo atuu, halupulu ka olima mia pinepateno anu mpopake epo inso a hawu lena. 19Kanatuu koa mbo'u palili i Nobi, po'iangaado sando mpesomba atuu, ipepateako ira ponai: tama, beine, nana'ote, maupo anu da mo'uo. Sapi, kalide ka bimba luwuno ipepateako ira ponai.

20Sine asa anano i Ahimele, anano i Ahitubi, anu tola, meneeako i Abiata. Onae molai metonda ndi Daudi. 21I Abiata pauakono i Daudi nine i Saulu mepate ira sando mpesomba-Do i Ue. 22Ipote i Daudi ndi Abiata, ”Lano kukitao oleo atuu i Do'egi to Edomi atuu kongko i ra'ai, kuto'oriomo asalakono ta lumako pauakono i Saulu. Hangano ongkue ka domempinepate luwuno pe'asa rahamu. 23Si doito, po'iamo ndi ongkue. Mia anu ta mepateko, onae koa mbo'u anu ta mepate aku. Po'iamo saru ongkue rodo aroamu.”

Currently Selected:

1 Samueli 22: XMZ

Highlight

Copy

Compare