1 Samueli 19

I Daudi tepotola inso ndi Saulu

19:1-24

1I Saulu motaeakono i Yonata, anano ka luwuno atano, nine i Daudi asalakono ta pinepate. Sine i Yonata, anano i Saulu, tedoa i'ineheakono i Daudi. 2I Yonata pauakono i Daudi, ”Amaku i Saulu mo'ungke-ungkeako ta mepateko. Gagi tisomo mo'oru, pompe'inandai, po'ungke pewuniamu kau pewuni. 3Aku meluarako lumako a mpada, aku mentade i horido amaku umpeda a mpo'iangaamu atuu. Aku mepau-pauako ira mongkona omue. Kana'umpe leludo, aku koa pauakomu.”

4I Yonata mompauakono amano anu pinemoikono mongkona i Daudi, ipotae, ”Si mansa omiu mokole moweweu anu nahi mentee ndi Daudi, miamiu, hangano nahina wineweuno anu nahi mentee ndi omiu, ka luwuno wineweuno ndi omiu tedoa moiko. 5Ita'oomo penaano mepateo to Pelisiti atuu ka Ondae i Ue moweeako ira to Isaraeli poponangia anu langkai. Ikitaomo ka ipo'undeakono. Tembio ka ihaweako aroamiu moweweu hala a reano mia anu nahina salano, komiu mepateo i Daudi nahina pu'uno?” 6Ipe'ala-alao i Saulu pinauno i Yonata, onaemo ka ipesumpa, ”A nee-Do i Ue anu tuwu, i Daudi nahi ta pinepate.” 7I Yonata moboio i Daudi, ka i'amba pauakono luwuno pinaudo amano. Umarino atuu iwawao i Yonata i Daudi ndi Saulu ka ipo'angga ndi onae kana se'eluno.

8Mansano gagi mbo'u peteaa, i Daudi lumako meteaako ira to Pelisiti ka tedoa langkai ponangido, onae ka dompolai inso ndi onae.

9Kontongaano i Saulu mesana-sanaa i rahano, pabawano mosa'o anu pine'ehe-Do i Ue mewinsokio. Hinao kansai a ngkaeno i Saulu, kontongaano i Daudi memaekono kasapi anu a ngkaeno. 10I Saulu ta mepahoakono i Daudi saru kansai atuu a rere. Sine i Daudi ipesiliakono inso a ngkansaino i Saulu anu pinepahoakono a rere. I Daudi molai ka toola wongi atuu.

11 # Pud. 59:1 I Saulu tumena ira mia lumako mompora i rahano i Daudi ka dompepateo tempono mo'oru. Sine i Mikali, kombiano i Daudi, pauakono, ”Tewala nahi upolai wongi andio tisomo kopinepate.” 12Ka i'amba i Mikali motiio i Daudi mesala a pentangoa. Tolaomo i Daudi, hangano molai. 13Umarino atuu i'alao i Mikali keu tinaha kana mia ka inaao a mpoturia, iponaakono pa'ulua wulu bembe a uluno poturia ka i tutuwiakono hawu.

14Hawedo mia tinenano i Saulu rumakoo i Daudi, ipotae i Mikali, ”I Daudi mahaki.” 15I Saulu wali tumena ira mia atuu ipotae, ”Imewawao tangki dasano i ndi'ai ka ipinepate.” 16Mpewinso iramo mia mentinena atuu, domengkitao hinao keu tinaha a mpoturia atuu ka pa'ulua wulu bembe a uluno poturia. 17Ipotae i Saulu ndi Mikali, ”Tembio ka upopo'oo aku kanandio, mo'ineeo iwaliku lumako, ranta kai tola?” Sine sumangki i Mikali, ”Ipotaeakune: Po'ineeomo aku lumako, ke inehemu kupepateko?”

18I Daudi molai, ka itola. Onae aiwa ndi Semueli i Rama, ka ipauakono luwu wineweuno i Saulu ndi onae. Ka i'amba lumako iramo i Daudi saru i Semueli mo'ia i Nayoti. 19Pinauako i Saulu nine i Daudi mo'ia i Nayoti, Rama. 20I Saulu tumena ira mia lumako merakoo i Daudi. Sine, domengkitao asa bawaa nabi kontongaado mebukeako Penaa, i Semueli petewawado. Luwuno mia mentinenano i Saulu atuu, ipabawai ira koa mbo'u Penaa-Do Ue Ala, ranta ondae mbo'u kana iramo nabi. 21Mansano pinauako i Saulu anu gagi atuu, onaemo kai wali montena mia susua, sine ondae koa mbo'u mebukeako Penaa kana nabi. Kopentoluno i Saulu montena mbo'u mia, ka ondae koa mbo'u mebukeako Penaa kana nabi. 22Ka i'amba lumako onaeno i Rama, ka hawe a nsumuru langkai i Seku, mesikenoomo, ”Isua ira i Semueli ka i Daudi?” Sumangki mia atuu, ”Kongko ira i Nayoti, i Rama.” 23Lumakoomo i Saulu i Nayoti, i Rama, sine da a nsala, ipabawaiomo Penaa, a laro pelempaano bukeako Penaa kana nabi ranta kai hawe i Nayoti, i Rama. 24#1Sam. 10:11-12Ilohuo i Saulu sangkano ka bukeakoomo Penaa kana nabi i arono i Semueli. Asa oleo ka asa wongi atuu itepombole kolambe-lambe. Onaemo ka dompotae mia, ”Saru mbo'u i Saulu ke tewinso nabi?”

Currently Selected:

1 Samueli 19: XMZ

Highlight

Copy

Compare