1 Samueli 18
18
I Daudi ka somborino mokole
18:1-5
1Umarino i Daudi mepauakono i Saulu, tepo'asaomo aroano i Yonata ka i Daudi. I Yonata mehohawao kana koroino onaeno. 2Oleo atuu iwawao i Saulu ka nahi beheakono mekule i rahano amano, 3I Yonata moweweu pedandia saru i Daudi, hangano ipehohawao kana koroino. 4Ilohuo i Yonata lemba meloe anu pinakeno ka iweeakono i Daudi, kanatuukoa mbo'u lemba mpeteano, ponaino, panano ka sulepeno.
5Poponangi mpiha i Daudi ba itenao i Saulu lumako metea onaemo ka ipotoroo i Saulu gagi petewawa asa ntia sorodadu. Mongkona andio dompemoikoo luwuno palili ka anu langkai potorodo ndi Saulu.
I Saulu umo'aliaakono i Daudi
18:6-30
6Mansado mpekule umarino i Daudi mepateo to Pelisiti atuu, luwuno beine inso a luwuno kotado to Isaraeli mpeluarako mentotowoo mokole Saulu, ka dompenani ka melumense memawongko mentondao unino rebana ka kerinci. 7#1Sam. 21:11; 29:5Beine anu memawongko atuudo, mpenani mpesangki-sangki, dompotae,
”I Saulu mompepate sowu-sowuno iwali,
sine i Daudi mopulu-pulu nsowu.”
8I Saulu tedoa tekuda. Pauno penani andio mokomahakio aroano, hangano ipewowoloo, ”Ndi Daudi domerekeo pulu-pulu nsowu, sine ndi ongkue domerekeo butu sowu-sowuno. Butumokoa poparentaa napi pe'umbuo.” 9Mompu'u oleo atuu i Saulu wela umo'aliaakono i Daudi.
10Tisomono, pabawano i mosa'o anu Dope'eheo Ue Ala mewinsokio aroano i Saulu, onaemo ka igagi kana mia mekombe i laro raha. I Daudi memaeakono kasapi a ngkaeno kana biasano, sine i Saulu mo'ini kansai. 11I Saulu kumansaio, hangano ipewowoloo, ”Aku kumansaio i Daudi ka itepaso a rere.” Pendua ikansaio i Daudi, sine magasi i Daudi ipesiliakono ka nahi kona.
12I Saulu doitoomo ndi Daudi, hangano i Daudi Dokongkomio i Ue, sine i Saulu Do'olaikonomo. 13Onaemo pu'uno i Saulu moko'olaio i Daudi inso ndi onae ka ipotoroo gagi petewawa puu mpetea asa nsowu, kai lako metea wawa ira sorodadu. 14Luwuakoano anggaa anu pinolempano i Daudi gagi luwu moiko, hangano onae Dokongkomio i Ue.
15Hangano ikitao i Saulu inanggano i Daudi luwuno tedoa moiko, onaemo ka ipondende aroano ndi onae. 16Luwudo to Isaraeli ka to Yehuda mengkekewoio i Daudi, hangano onae petewawado melako mpetea.
17Motae i Saulu ndi Daudi, ”Ndiomo anaku beine anu aka meneeako i Merabe, kuweeko gagi kombiamu, sine omue kogagi miaku anu moroso ntu'u lumako metea a nee-Do i Ue.” Pinewowolono i Saulu, ”Kasi kaeku mepateo, sine po'ineeomo kaedo to Pelisiti anu mpepateo.” 18Sumangki i Daudi, ”Isemake ongkue andio? Isema pepaekompoku, inuleno amaku i Isaraeli, ka aku gagi ponido mokole?” 19Haweakoomo tempono i Merabe, anano i Saulu ta pinopokombiaako i Daudi, ndio koa pinopokombiako i Adirieli to Mehola. 20Sine asa anano i Saulu anu meneeako i Mikali tedonta aroano ndi Daudi. Mansano rumongeo i Saulu, ipemoikoo, 21hangano ipewowoloo i Saulu, ”Aku weeakono i Mikali gagi kombiano, ranta ka igagi pesalaa mateano ka kaedo to Pelisiti umewaio.” Mepau mbo'u i Saulu anu kompenduano ndi Daudi, ”Kanandio, moikoomo omue gagi poniku.” 22Iparenta ira i Saulu atano, ka domelako ndi Daudi mempopandeio, ka dompotae, ”Ondae mokole do'ineheakomu ka luwuno atado mengkekewoiko. Kanandio-andio, gagimo ponido mokole.” 23Melako iramo atano i Saulu mempauakono i Daudi. Isangki ira i Daudi ipotae, ”Potaemiu moruana ke gagi ponido mokole? Ongkue andio mia nahina potoroku ka mongkokolaro.” 24Mpotae iramo atano i Saulu, ”Kanandiomo sangkino i Daudi.” 25Ka i'amba motae i Saulu, ”Pauakono i Daudi kanandio: Ondae mokole nahi dopo'ema kowei, sangkadio asa etu kuli anudo to Pelisiti pombalodo a iwalido mokole.” Tinoono i Saulu, kaedo to Pelisiti anu mpepateo i Daudi. 26Mansado melako atano mempauakono i Daudi pauno i Saulu atuu, ipemoikoo i Daudi gagi ponino mokole.
Napi haweako tempono, 27i Daudi lumako saru luwuno miano i witado to Pelisiti, ka ipompepate rua etu mia to Pelisiti. Iwawao i Daudi asa etu kuli anudo ndi mokole ka igagi ponido mokole. Ka i'amba i Saulu weeakono i Mikali, anano, gagi kombiano i Daudi. 28Mansano tumo'orio i Saulu nine Ondae i Ue kumongkomio i Daudi ka i Mikali, anano, tedonta aroano ndi Daudi, 29onaemo ka itedoa doito i Saulu ndi Daudi. I Saulu gagiomo mpiha iwalino i Daudi.
30Sompo domelako tadulako sorodadu to Pelisiti mpeteaako ira to Isaraeli, i Daudi anu hadio ponangino sekono miano i Saulu anu susua, onaemo kai tedoa telele neeno.
Currently Selected:
1 Samueli 18: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
