1 PETURU 5
5
Pakambi iramo bawaano bimba-Do Ue Ala
5:1-11
1Kupatudu ira penatua i olomiu, ongkue kana walido penatua ka sakosii tebobarasai-Do i Kerisituu, anu ta mohawe koa mbo'u tia a marambaa anu ta pinokomengkaa lembuino. 2#Yoh. 21:15-17 Impakambi iramo bawaano bimba-Do Ue Ala anu kongko ndi omiu, si komba hangano dinada, sine inso ntu'u i aroamiu menunu saru po'ehe-Do Ue Ala, ka si hangano inehemiu mpo'ungke me'uraa, sine a mawongkono aroamiu. 3Si mpoweweu kana komiu meparenta ira anu pine'ala-alaako ndi omiu, sine moikoomo imegagi pandirido bawaano bimba atuu. 4Ka omiu, tewala hawe Ira Puu Pompakambi Langkai, komiu mpontarima ramba-ramba ulu marambaa anu nahi pokomoleu. 5#Pow. 3:34 Kanandio koa mbo'u omiu, hei mia memongura, impe'urumakomo a mia anu memota'u. Ka luwumiu, imemambe'urumako, hangano,
”Ondae Ue Ala umewaio mia mompelangka-langkai,
sine mehohawao mia anu me'urumako.”
6 #
Mat. 23:12; Luk. 14:11; 18:14 Onaemo pu'uno impe'urumakomo a toto ngkae-Do i Ue anu moroso, ka Dopokomantande komiu a tempono. 7Impeweengakonomo luwuno pinorerengkomiu ndi Ondae, hangano Ondae anu mekaria komiu. 8Intelikemo ka impedaga-dagaimo! Anu umewai komiu, i Mosa'o, melempa metanggolili mengkena kana singa anu mengaoli ka mo'ungke mia anu pinokoteleno. 9Ewaiakonomo pompe'ala-ala anu moroso, hangano imento'orio, nine luwuno pepaekompomiu i asa wawontolino mpompembasai tebobarasaia anu mengkena. 10Ka Ondae Ue Ala, pu'uno luwuno pe'aroa, anu moboi komiumo ndi Ondae i Kerisituu a maramba-Do anu nahina tampulaano, Ira mokosompo komiu, rumonso komiu, mokomokora komiu ka mokoroso komiu, umarimiu ntebobarasai asa tempo. 11Ondaemo anu me'ueo pabawa ranta nahina tampulaano! Ami.
Tabea
5:12-14
12 #
Tin. 15:22, 40 Mesala ndi Siliwanu, anu kutuduo kana aasa pepaekompo anu pinokompe'ala-ala, kupoburiakomiu owowa ka patudu komiu ka imento'orio, nine andio onaemo pe'aroa anu mentee ntu'u inso ndi Ondae Ue Ala. Impentademo temoroso i larono!
13 #
Tin. 12:12, 25; 13:13; 15:37-39; Kol. 4:10; Plm. 24 Tabea ndi omiu luwu inso a walimiu anu tebiniki anu i Babilo, ka inso mbo'u ndi Marakusu, anaku. 14Imemambe tabeaako pewoo-woo anu mempori. Rodoa kumongkomi komiu luwu anu mekongko ndi Ondae i Kerisituu. Ami.
Currently Selected:
1 PETURU 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
