1 PETURU 4
4
1Gaagi, hangano marasai Iramo i Kerisituu tebobarasai ngkoroi, maupo omiu mbo'u asalakono imemparewaakono pompewowolo kanatuu koroimiu, – hangano ba isema marasaiomo tebobarasai ngkoroi, menaa-naaomo moweweu hala –, 2ka si mempakeo tempo anu da hinao montonda mosisirino mia, sine montonda po'ehe-Do Ue Ala. 3Hangano hadioomo ntu'u tempo pinakemiu meweweuo po'ehedo mia anu nahi domento'ori Ira Ue Ala. Mentuwu komiumo a mperupa-rupa po'eheno koroi, mosisiria, molangua, mpogawe langkai, pelimbua mpo'inu ka pompesombaia lahumoa anu inonto. 4Onaemo pu'uno ka domengkohali-hali, nine omiu nahi mpetonda mpentoa merongaako ira a laro umbele nahi pototono anu mengkena, ka domposebe komiu. 5Sine asalakono ka domesangkio ndi Ondae, anu mepatinda mpiha bitarao mia tuwu ka anu mate. 6Onaemo pu'uno ka ipinalelemo mbo'u Lele Mawongkoa a mia memate, ka dompengkena kana luwuno mia, binitara montonda koroi; sine hangano penaa mokotuwu montonda po'ehe-Do Ue Ala.
Tuwudo to Kerisituu
4:7-11
7Pokotompaano luwuakoano umpedaomo. Onaemo pu'uno imempabawaiomo koroimiu ka impomperodomo, ka impokompekakai koa. 8#Pow. 10:12 Sine anu lalu i wawono: imemambe pehohawamo ntu'u, hangano pompehohawa tumutuwio hadio ntu'u hala. 9Imemambe totoka si mpewuruki. 10Imemambe pekakaako, menunu saru pompowee anu hinaweno sompo-sompo mia kana puu mpo'orusu anu moiko a mpe'aroa-Do Ue Ala. 11Tewala hinao mia anu mepau, ka ipepaumo kana mia anu mohaweo pau-Do Ue Ala; tewala hinao mia anu mompekakaako, ka iweweuakonomo roso anu Doweeakono Ue Ala, ka Dopinokomaramba Ue Ala a luwuakoano hangano Ondae i Yesu Kerisituu. Ondaemo anu me'ueo marambaa ka pabawa ranta nahina tampulaano! Ami.
Tebobarasai gagi to Kerisituu
4:12-19
12Luwuno pepaekompo anu pinehohawa, siimo imengkohali-haliakono langano api pobobarasaia anu hawe ndi omiu gagi po'arahako, kana hinao bahapa anu tedoa langkai gagi ndi omiu. 13Tendeano, impo'undemo, menunu saru tia anu hinawemiu a ntebobarasai-Do i Kerisituu, ka impohawe koa mbo'u mawongko ka mpo'unde a tempo Dopokomengkaao maramba-Do. 14Meme'ura komiumo, tewala mentinata komiu hangano nee-Do i Kerisituu, hangano Penaa marambaa, onaemo Penaa-Do Ue Ala kongko ndi omiu. 15Si hina i olomiu anu asalakono tebobarasai kana anu mompepate ke monako ke anu moweweu mosa'o, ke anu morisui. 16Sine, tewala onae marasai gagi to Kerisituu, ka siimo imokoko'ii, tendeano moikoomo ipelangkai Ira Ue Ala a nee-Do i Kerisituu atuu. 17Hangano kanandio-andio haweomo tempono ipinu'u pobitaraa, ka a raha-Do isa'a Ue Ala anu asalakono amba-ambano binitara. Ka tewala pobitaraa atuu pinu'u ndi ontae, kana'umpeke pokotompaano ondae anu nahi dompe'ala-alao Lele Mawongkoa-Do Ue Ala? 18#Pow. 11:31 Ka tewala
mia mentee ilawu nahi domengkinadudui,
hapake anu ta gagi a mia mosa'o guano ka mia tehala?
19Onaemo pu'uno moiko mbo'u ondae anu asalakono ntebobarasai hangano po'ehe-Do Ue Ala, mpeweengakono sumangado, saru wela mpoweweu moiko, ndi Ondae anu Mompokogagi nahi Dobali.
Currently Selected:
1 PETURU 4: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
