1 Tawarika 5

Luwuno suku i asatowano koro Yarade

5:1-26

1 # Teg. 35:22a; 49:3-4 Tudano onaemo luwuno anano i Rube, ana akano i Isaraeli. Lano onae ana akano, sine hangano isosa'aiomo memporiano poturiano amano, pabawano ana aka wineeako inuleno i Yusupu, anano koa mbo'u i Isaraeli, maupo nahi teburi a mpotudano tumuwu gagi ana aka. 2#Teg. 49:8-10I Yehudamo anu lalu pinelangkai i olodo luwuno pepaekompono, tamoako asa mia i olono inuleno gagi mokole, sine pabawano ana aka atuu kongko ndi Yusupu. 3Luwuno anano i Rube, ana akano i Isaraeli, onaemo i Heno, i Palu, i Heseroni ka i Karimi. 4Inuleno i Yoeli, onaemo: i Semaya, anano; i Gogi, ana'ueno; i Simei, ana'ue ntukono. 5Ka i'amba luwuno inuleno: i Mika, i Reaya, i Baala, 6#2Mok. 15:29ka i'amba i Beera anu winawano i Tiligati-Pileneseri, mokoledo to Asuri a mpontadia. I Beeramo petewawado to Rube.

7Luwuno pepaekompono montonda luwuno sukuno, kana teburi a mpotudano tumuwumontonda inuledo, onaemo i Yeileli, petewawano, ka i'amba i Sakaria, 8ka i Bela anano i Asasi anano i Sema anano i Yo'eli. Onaemo anu mo'ia i Aro'eri ka witano hawe i Nebo ka Baala-Meoni. 9I sabaano oleo witano hawe a wiwino pada one anu molue mompu'u inso a nkoro Eparata, hangano pinotuwudo tetiangiomo hadio i wita Gileadi. 10Tempono i Saulu ondae mpetea umewai ira to Hagiri. Mansano mia andiodo ntedonta a ngkaedo, dompo'iangario luwuno kemano a luwuno apano i sabaano oleo Gileadi.

11Inuleno i Gadi tuwu mpesisintuwu saru ondae i wita Basani hawe Salika. 12I Yo'eli onaemo petewawano ka i Sapami mia ko'orua, ka i'amba i Yaenai ka i Sapati i wita Basani. 13Luwuno pepaekompodo pepe'etuado, onaemo i Mikaeli, i Mesulami, i Sieba, i Yorai, i Yakani, i Siya ka i Eberi, porokono opitu mia. 14Onaemo atuu luwuno anano i Abihaili anano i Huri anano i Yaroahi anano i Gileadi anano i Mikaeli anano i Yesisai anano i Yahido anano i Busi. 15I Ahi anano i Abidieli anano i Guni, onaemo asa mia i olono petewawado anu mpepe'etu. 16Ondae mpo'ia i Gileadi, i Basani ka a luwuno kota kodeino ka a luwuno wita pompakambia Saroni hawe a luwuno tompaano. 17Ondae mebinuri luwu a mpotudano tumuwu tempono i Yotami, mokole i Yehuda ka tempono i Yerobea, mokole i Isaraeli.

18Inso a inuleno i Rube, to Gadi ka suku Manase anu entongano atuu, hinao pato pulu ka opaa nsowu ka pitu etu ka nomo pulu mia anu tetinda ira mpetea, luwuno mia anu moroso ka mosia anu mompoko'ini kanta ka ponai saru mompadii wo'eno pana, anu leleoomo metea. 19Ondae mpetea umewai ira to Hagiri, umewai ira to Yeturi, Napisi ka Nodabi. 20Ondae mpohawe pepokowali umewai ira mia atuudo, ranta to Hagiri atuu ka luwuno mia anu tumondao mpeweengakono koroido a ngkaedo, hangano mpebooli iramo ndi Ondae Ue Ala a laro mpeteaa atuu. Do'induo po'emado, hangano mpope'ala-ala ira ndi Ondae. 21Pinotuwuno domewawao gagi pinomuru; untano lima pulu nsowu, bawaano bembe bimba rua etu ka lima pulu nsowu ka kalide rua nsowu, mia mbo'u asa nsowu. 22Hadio memate hangano mobela langkai, hangano Ondae Ue Ala anu melelu a laro mpeteaa atuu. Ka do'amba mpetorokio po'iangado mia atuudo hawe a tempo pontadia.

23Suku Manase anu entonga atuu mpo'ia i wita atuu inso i Basani hawe i Baala-Herimoni, Seiri ka torukuno Herimoni. Tedoa ira mehadio. 24Ndiomo luwuno petewawado anu mpepe'etu: i Heperi, i Yisei, i Elieli, i Asirieli, i Yeremia, i Hodawia ka i Yahedieli. Ondae onaemo luwuno sorodadu anu memoroso ka mosia, mia nteto'ori, petewawado anu mpepe'etu.

25Sine mansado mpelelu nahi dompetenunu ndi Ondae Ue Alado uempu'udo ka mpesomba a luwuno pesombaado luwuno tongkuno wita anu Doropuomo Ue Ala inso i arodo. 26#2Mok. 15:19, 29; 17:6Onaemo ka Doleluo Ue Alado to Isaraeli aroano i Puli, onaemo i Tiligati-Pileneseri, mokoledo to Asuri. Mokole atuu wawa ira a mpontadia: to Rube, to Gadi ka suku Manase anu entongano atuu. Iwawa ira i Halahi, i Habori, i Hara ka korono i wita Gosani; mekongko ira i ra'ai hawe oleo andio.

Currently Selected:

1 Tawarika 5: XMZ

Highlight

Copy

Compare