१ कोरीन्थुपा 4
4
मास्यीकागी कुछापक्या
1मीक्याई हेक्याला मास्यीकागी श्याप्चीपा धाङ को़न्क्षोकगी साङवे दो़नक्याई, ॱङेरपा च्योक्रे चीघो़। 2धा ॱङेरपाक्या नी, ॱलो का थुप्कीन झ्युङघो़। 3खेक्याने याङना मीगी ठीम्राने, ङी ठीम चेना, ङाला घीया फोक्येमेक। धेनी ङी ङाराङगीया राङला ठीम ॱमेचेहो़क। 4ङी ङारी झ्येजा नोन्डुक्याई कोरला घीया ढेन्सो़ झ्यी ॱमीथुक्वा, हीना दी ङाला क्यो़न मेगीन मेशोवालाक। धेनी ङी ठीम चेगीन नी, चोवो हीन। 5होझ्येरी को़का धी़गो माभाप्कीन एन्ला, मी सी़याः ठीम ॱमाचे। धेनी चोवो फेप्कीन थुक्पे घुक्ती धो़क। खोङबागी मी़नाकगी नाङ बेरी श्याक्सा, लाब घीरी हो़ला ॱङो़न जेगीलाक धेनी मीगी सेम्बे क्षास्यीक्या ॱङो़न जेगीलाक। धेनी होदे घाङला मी रे-रेगी, को़न्क्षोकने राङगी तो़पा थोप्कीलाक।
6धा पी़नक्याओ, खेक्याला फेन्येगी क्षीदु, ङी ङाराङ धाङ आपोल्लोसगी पे श्याक्ती, हेक्याने खेक्याई सुङराप नाङदु ढीक्टा च्योक्रे मीछे पी़येगो ज्याङयेला तो़न हो़क। धेनी खेक्या च्यीकला ङोम्सो झ्येरी श्येम्माला दाङा झ्यीगीमालाक। 7खेक्याला मी श्येम्माने गेक्षे सी़ शो़जो से? खेक्याला को़न्क्षोकने ॱमाथोप्था घी हो़से? धेनी खीकी थोप्हो़ना, खेक्या घीझ्येरी होदे ॱनाङज्यीन मेन्गीन च्योक्रे ङोम्सो झ्यीदाले?
8खेक्याला घो़गीन घीरी थोप्साले? खेक्या धा क्षुक्पु झ्युसाले? हेक्या मेना, खेक्या ग्यावु झ्युसाले? खेक्या ॱङोन्ने ग्यावु झ्युहो़ना ढीक्येहो़क धेनी हेक्याला खीकीमुला वाङ झ्यीये राक हो़टु। 9घीझ्येरी ॱनाना हे कुछापक्या नी, सेयेगी ठीम्चो़ फोक्पाक्या च्योक्रे धाङ घीरीने श्युक्योकला को़न्क्षोकगी श्या जेजा च्योक्रे दुक ॱनेरी, ङी साम्लो हो़क। घीझ्येरी ॱनाना हेक्या नी, जीक्तेन धाङ नाम्खे भाङछेनक्या धाङ मीक्याई क्षीदु तेमो च्योक्रे झ्युदुक। 10मास्यीकागी दो़न्दु हेक्या ॱलेन्पा धाङ खेक्या मास्यीकागी नाङ खेवा दुक। हेक्या नी, क्योवा हो़क हीना खेक्या स्युक्क्षे दुक। धेनी खेक्याला कुरती धाङ हेक्याला ॱमेबेप थोप्दुक। 11दे धी़ थुक्पे हेक्या फोवा तोक्ता धाङ खा कोम्गा धेनी घोलाक ॱरुल्दुक्पा घो़न्गा धाङ श्येम्मागी धुता धाङ राङ खाङबा मेगीन झ्युहो़क। 12धेनी राङगी लाक्पी लेगा झ्येरी काल्ले ग्यावाहीन। धेनी मी श्येम्मागी ॱमेमो ग्याराङ, हेक्या ॱमो़लाम श्यी़हो़क। श्येम्मागी हेक्याला दुक्पु तेराराङ, हेक्या शो़पा घोमीहो़क। 13हेला ॱमेबेप ताङाराङ, हेक्या लेन ज्याबोमा ॱलोक्यीहो़क। धान्दा थुक्पे, हेक्या जीक्तेनगी झोरा धाङ घीरीने घो ॱमेछोगीन च्यालाक च्योक्रे झ्युहो़क।
14खेक्याला ङोछारु च्युक्येला, ङी दे ढीयामेन हीना ङी चेवे टुवाक्या च्योक्रे, खाता ॱलाप्येला ढीयाहीन। 15मास्यीकागी थोक्ने, खेक्याला ताक्योङ झ्यीगीन मी ठी च्यीक हो़ना, खेक्याला आकीक्या माङा मेतालाक। घीझ्येरी ॱनाना मास्यीका येशुगी नाङ ताम्शाङगी गोने, ङा खीकी आकी झ्युवालाक। 16होझ्येरी, ङा खेक्याला ङी लेमो झ्यी ॱनेरी कुलाहीन। 17धेनी होझ्येरीराङ चोवोगी नाङ ॱलो का थुप्कीन, ङी चेवे भु तीमोथेला, ङी खीकीचारु झाहो़क। धेनी साजा हो़लेदु क्षो़छोक घीरीला ङी क्षो़ स्येस्या च्योक्रे थी़न्गीन, मास्यीका येशुगी नाङ ङी मीछे घारे हो़गीनगो, खी़ खेक्याला ढेन्सो ॱलाङगीलाक।
18ङा खेक्याचारु मेयोङगीलाक ॱनेरी साम्दी, खेक्याने रीङगा राङडा क्षे झ्युदुक। 19हीना चोवोगी थुकोङ हो़ना, ङा खीकीचारु ग्योक्जे हुङाहीन। धेनी ङा होदे राङडा क्षे मीक्याई लाबक्या च्यीगा मेन्दा, हीना खुङक्याई नी़थुगो घी ले ॱनेरी, ङा चाजो़ झ्यीयेहीन। 20घीझ्येरी ॱनाना को़न्क्षोकगी ग्यासी नी लाबला मेन्दा, नी़थुला हुङालाक। 21खेक्या घी दो़दी हेतो? ङा खीकीचारु ग्युक्पा खेरती हुङगु, याङना झाम्सेम धाङ झ्याबोमा झ्येरी हुङगु?
Currently Selected:
१ कोरीन्थुपा 4: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
