Kisah Para Rasul 18

Paulus namin kote Korintus

18:1-17

1Mpene Paulus nti a ntate kote Atena ma nti kote Korintus. 2Na iano i natungan nor tomwat Yahudyar sa nof Pontus ngarany Akwila. Akwila ye radu sawany Priskila betno rof Italia rma fali Kaisar Klaudius nfarete ma tomwat Yahudyar monuk rbie rof Roma. Ne Paulus nwelat nir das. 3Ma nor sir ma raktem a rkarya fali nir karyae feleles. Nir karyae ne rose befkar ma rfenri. 4Na Yahudyar nir ler Sanari mpane e, Paulus nti das sampayang ma naale andaun nor tomwat Yahudyar ma Yunanyar. I natanuk nareke nema ralele Yesus.

5Noak ma Silas ma Timotius rof kote Makedonia rma e, Paulus nal mate lan ma nafwibar Ratu Ni ngribatnir ma nfalak ber tomwat Yahudyar feti Yesus ye Ray Silai. 6Nempa tomwat Yahudyar dedesar rbangal ma rarikan i. Mpa natetar ompak masun nof ni rabit ma nfatutu feti Ratu to nlangun sir. Ne nfalak, “Farlan safe-safe diat a kmi e, ka kete mfyasale yakw ma koko kmi a mibare motak! Ntabw nof lere ye ktwi kufwibar Ratu Ni ngribatnir ber tomwatar ma to Yahudi sir.”

7Mpe nbie nof a ne ma nti tomwat sa ngarany Titius Yustus ni das. Titius Yustus ye to Yahudi i nempa nsampayang dedesar ber Ratu ma ni das a namin das sampayang balisya. 8Tomwatar sa ma nalele Yesus ninr Mangnrur Silai ngarany Krispus. I neluk ulun na das sampayang a ne. I nor ni dasdalam ralele Yesus ninr Mangnrur Silai. Ma tomwat Korintusar yadin a nbal rdengar ibar ma Paulus a nfalak, ne ralele Yesus ninr Mangnrur Silai, mpa radiris sir.

9Ni nronram sa e, Mangnrur Silai nma ma nfatutu felany ber Paulus ma nfalak, “Kete mumtaut, kete muter! Ma mufwibar dedesar Ningw ngribatnir. 10Fali kor ko dedesar ma keta to tomwate fen lese ma nose yatak ko. Fali kfwil tomwatar yadin na kote ne lo ma rlarat Yakw.” 11Mpa Paulus namin Korintus ngarak dalam lian ma naftutu Ratu Ni ngribatnir ber sir.

12Nempa noak ma Galio nose gubernur na propinsi Akhaya, tomwat Yahudyar dalmir lese ma rbangal Paulus betno ror i ber Galio ma nsidang i. 13Ma rfalak, “Tomwate ye naftutu tomwatar yadin ma rsampayang ber Ratu, nempa ni anftutwar a ne to feleles nor Musa ni tetetkar.”

14Noak ma Paulus nose ma natanuk, Galio nfalak ber sir, “Tomwat Yahudyar a kmi! Farlan mifbotin na ngriyatkar sa e, keta klwangun mir ngrie ne. 15Nempa lan kafreye na tnyangkwar, ma ngare numur yayatrwar ma mpyan a mlyarat, la misusan motak. Yakw to kmpweang ma kurus ngriar farane.” 16Mpe Galio natian sir nof sidang dalam a ne. 17Ne tomwatar monuk a ne romat Sostenes ma nose ulun na das sampayang, betno rbabal i a na ain sidang a ne nempa Galio to nfaduli desar ngrie ne.

Paulus a nbali i far Antiokhia

18:18-23

18Paulus namin kote Korintus lerar fir a ne, ne ntul soranyar na iane, ma nti kote Kengkrea. Na iano nfakir uluny fali nyoding ber Ratu lo.#18:18 Na Yahudyar nir adat, tomwatar ma ryoding sir ber Ratu lo ka rfakir ulnir Betno raktem Akwila ma Priskila raflolwain ror kabal far Siria.#Bil. 6:18 19Lama rait kote Efesus e, Paulus nti a ntate Priskila ma Akwila. Ma nti das sampayang ma naale andaun nor tomwat Yahudyar na iane. 20Sir rtak ma namin iane far dodo nempa i to nlampir. 21Boloka farane noak ma nti a ntate sir e nfalak, “Farlan Ratu nlarat e, la kbwali yakw kmwa ye nbal.” Mpene nti a ntate kote Efesus. 22Lama nait Kaisarea,#18:22 Kaisarea ye kote na Yerusalem ma ni loloyain. i nti Yerusalem ma ntul soranyar na iano, betno naloran far Antiokhia. 23I namin iane far dodo, ne nti a nbal ma nlole yampren Galatia numur Frigia, ma nafkoran tomwatar ma ralele Yesus na iano.

Apolos namin kote Efesus ma Korintus

18:24-28

24Noak a ne tomwat Yahudi sa nti Efesus. I ngarany Apolos nof kote Aleksandria. I nafai ma natanuk ma nafai resi Kitap Lelerap isiny. 25Ma tomwatar raftutu na Yesus ninr Mangnrur Silai ber i lo, nwayat ma nbaran ma naftutu tomwatar fen ngamone desar na Yesus. Safo i nafai lan safe ma Yohanes naftutu tomwatar noak ma nadiris sir. 26I ntafal ma nbaran ma naftutu na das sampayang. Noak ma Priskila ma Akwila rdengar ni anftutwar e, sir ror i far nir das. Na iano rfalyole fen ngamone Ratu Ni dalamtene ma ber i nema ntafal ma nafai. 27Apolos nmpeang ma nti propinsi Akhaya, mpa soranyar na Efesus rarengi surat ber soranyar na Akhaya nema ka rlangun i fen ngafele. Noak ma Apolos nait Akhaya e, i ntulung tomwatar yadin ma ralele Yesus ma nafkoran sir. Mpe sir ye ma ralele Yesus lo fali Ratu nfatutu Ni dalamy ngamone ber sir. 28Apolos nbaran a nbal ma nabangal nor tomwat Yahudyar na tomwat ngayadin. Ma nal ayatar na Kitap Lelerap la nfatutu feti Yesus ye Ray Silai.

Currently Selected:

Kisah Para Rasul 18: YMD

Highlight

Copy

Compare