Kisah Para Rasul 17

Mimiri na Tesalonika

17:1-9

1Mpene Paulus ma Silas raloran nir mpampane ralyole kote Amfipolis ma kote Apolonia tila rait kote Tesalonika. Na iano tomwat Yahudyar nir das sampayang namin. 2Paulus nti das sampayang a ne far biase ma nose na Yahudyar nir ler Sanari. I nti iano ma naale andaun nor tomwat ngayadin na ayatar na Kitap Lelerap dalam. I nose farane na mpane Yahudyar nir ler Sanari terik minggwar tel. 3Ma i nfalyole Kitap Lelerap isiny ber sir ma nfatutu feti Ray Silai ka nkoman suse terik ma nmat, ma nmorip a nbali nof mangmwatar. Ne nfalak a nbal, “Yesus ma kfwalak ber a kmi ye, I a ne Ray Silai.” 4Tomwatar ketnir rof sir ralele safe ma Paulus ma Silas raftutu ne mpa rlarat sir. Tomwat Yunanyar ma rsampayang ber Ratu numur bat melar yadin ma rlarat sir a nbal.

5Nempa tomwat Yahudyar dalmir maninik sir, mpa rafburat tomwat yatkar ma ramin pasar ma rose mimiri na kote ne. Ne rafla rti tomwat sa ma nalele Yesus ni das ngarany Yason, ma ranriak Paulus ma Silas ma ror sir far tomwat ngayadin. 6Nempa to rtungan radu mpa rakei Yason ma tomwatar ketnir ma ralele Yesus ma ror sir far mangfaret silayar ma rafwayak, “Tomwatar ma rose mimiri na mpenempen rait ye lo. 7Ma Yason ye ma nlangun sir a na ni das. Sir monuk to rlarat Kaisar Roma ni tetetkar ma rfalak feti rai walyetar sa namin a nbal ngarany Yesus.” 8Noak ma tomwat ngayadin ma mangfaret silayar na kote ne rdengar farane nuse mayoi mayai. 9Ne mangfaret silayar rluan Yason ma tomwatar ketnir ma ralele Yesus ne ma ral dotyar la neluk jaminan,#17:9 Doit ma Yason nal ber mangfaretar ne iane neluk jaminan feti keta to mimiri lo. Farlan terjadi mimiri e doit a ne keta nlai ma ka ral sir a na sel. betno rtate sir.

Paulus ma Silas na kote Berea

17:10-15

10Na nronram a ne nbal soranyar ma ramin kote ne rluan Paulus ma Silas ma rti kote Berea. Lama rait e, sir rti Yahudyar nir das sampayang. 11Tomwat Yahudyar na kote ne rlangun sir a rlengan tomwat Yahudyar ma ramin Tesalonika. Fali rlangun Ibar Ngamone ne ror dalmir senange, ma lerar e, rbaca Kitap Lelerap nema bise ma rafai feti Paulus ni anftutwar a ne botuan nre tate. 12Tomwatar yadin nof sir a ne ralele Yesus. Ma tomwat Yunanyar yadin a nbal ma ralele Yesus, sir a ne merwane ma bat melar na kote ne. 13Noak ma tomwat Yahudyar na Tesalonika rdengar feti Paulus nafwibar Ibar Ngamone na Berea, sir rti iano nbal ma rfule tomwatar nema dalmir maninik Paulus. 14Ne soranyar na Berea rasnyalik ma ror Paulus far laran, nempa Silas radu Timotius ramin Berea. 15Tomwatar a ne ror Paulus far kote Atena. Noak ma rbali sir e, rfalak ni snyurat ber Silas ma Timotius nema ka rasnyalik ma rlarat i.

Paulus na kote Atena

17:16-34

16Noak ma Paulus ndaf Silas ma Timotius na Atena, i nsalan kote ne nfen ber waltwar ma tomwat Atenar rsatngur ber sir mpa dalamy suse resi. 17Iane nwayat ma na das sampayang e, naale andaun nor tomwat Yahudyar ma tomwatar ma to Yahudi sir ma ramtaut Ratu. Ma Lerar monuk e, i naale andaun a nbal nor tomwatar na pasar. 18Ma tuanggurwar ketnir rof klop Epikuros ma klop Stoa rabali ngengentar a nbal ror i. Nof sir a ne ketnir a rfalak, “Tomwate ye nfalak lan ni lepuskwar.” Ma ketnir a nbal rfalak feti, “I nfule kit motak ma talele ni dewayar.” Rfalak farane fali i nafwibar Ibar Ngamone na Yesus ma nafwibar a nbal feti keta mangmwatar rmorip a rbali. 19Ne sir ror Paulus ma rti ain faburat sa na lenran ngarany Areopagus. Betno rfalak, “Kam mpeang ma mafai nim anftutw beberi ne nbal. 20Fali kam to mdengar safe ma ko mfwalak a ne fuky, ma mpeang ma mfwalyole isiny ber kam.” 21(Tomwat Atenar ma mangmwar ma ramin kote ne ral mate lan ma rdengar nre rasaur ngribeberyar.)

22Mpene Paulus namdir tomwatar ma rafburat sir a na Areopagus a ne sonirlury, betno nfalak, “Tomwat Atenar a kmi, kswalan lo na safe kabain e, mlyarat desar mir dewayar ma msyampayang ber sir.” 23Fali noak ma kmpwan a klole mir kote ye, kswalan mir snyomp anir. Ma kswalan a nbal snyomp anir sa ma rarengi feti, ‘Ain ber Ratu ma to tafai i.’ Mpa la kufbwotin ber a kmi na Ratu ma msyatngur ber I nempa to mifai I a ne. 24“Ratu ma nose saryamprene numur ni mparetar, I ye ninr Mangnrur Silai ma nkuase langit ma saryamprene. I to namin dewayar nir snyomp anir ma tomwatar rose.#1Raj. 8:27; Yes. 42:5; Kis. 7:48 25I to nperlu ma tomwatar ral kabanir sa ma rtulung I fali lan I ma nal sanawe ber tomwatar ma rmorip ma nal safe-safe monuk ma rperlu. 26Ratu nose tomwate lese. Nof tomwate lese ne I nose nusar monuk ma ramin anir mpane na saryamprene. Ma ntetak nof luryain lo feti bengfir e, rmorip ma rmat, ma ka ramin mpe. 27Ratu nose farane nema ranriak I ma weni ratungan ror I. Fali ni botuan e, I to dodo nof kit mpane. 28Farlan ma tomwatar sa ma nfalak, ‘Fali Ni kuase nose ma kit tmorip, tmpan, ma tamin saryamprene ye.’ Feleles far mir mangreng sanjakar a rfalak, ‘Ratu angkir ber kit monuk.’

29Wangur, Ratu angkir ber kit monuk mpa ka kete tdaun feti Ratu ye feleles nor waltwar ma rose rof mase, perak nre bati. Tomwatar rose kabanir a ne rlarat nir anfai. 30Luryain e, Ratu to nukun tomwatar fali to rafai Ni mpempeang. Nempa lere ye I nfarete tomwatar monuk na saryamprene ma ka rtate nir salar ma rsatngur ber lan I. 31Ratu ntetak lere lese lo ma nsidang tomwatar na saryamprene ye nor malonri. I nfil Tomwatar sa ma neluk mangtetak ber tomwatar monuk, ma nafmorip a nbali I nof mangmwatar nema rafai feti I ye mangtetak.”

32Noak ma tomwatar rdengar feti mangmwate bise ma nmorip a nbali, ketnir rmalip i, ma ketnir a nbal e rfalak, “Lerar sa la betno musaur a mbwali ngrie ye.” 33Mpe Paulus nti a ntate sir. 34Nempa merwanar ketnir rlarat Paulus ma ralele Yesus. Nof sir a ne Dionisius, i ye mangtetkar sa na Areopagus. Ma batar sa ngarany Damaris, numur tomwat walyetar a nbal.

Currently Selected:

Kisah Para Rasul 17: YMD

Highlight

Copy

Compare