Korɛntitɔnŋ kiri (2) 9
9
Yentɛfinŋ kiri bi ki
1Ŋuŋ ǹʼna míŋ i wulu tɔri sɛbɛ wɔri ta ábɛɛ tɛ Kirinŋ wɔ wɔlinŋ kiri wɔ yentɛfinŋ kiri bi sun kili kì. 2Sabu míŋ ǹʼtɔ-i, ńʼtu yentɛmaanna ki wuru ábɛɛ tɔnɲaarabi sun, ninki i ncin míŋ i ńʼyɛri ragbɛ ábɛɛ bi ki wu Maseduwanɛ bilinatɔnŋ kiri ɲaanna. Ńʼtu ábɛɛ Akayi bilinatɔnŋ kwuru kiri ramɔnimaan wuru-i kabi ɲankaŋ, á i áwɔ yentɛfinŋ ki wɔri. Niŋ cɛrukɔli ki wɔ̀ kila-i ábɛɛ gbɛ, mwɔɔnna i ǹʼtɛ arì i ǹʼma ábɔɔ ki sali.
3Míŋ i yi tindaŋ kari bo ta ábɛɛ tɛ, nwɔma yibɛɛ ábɛɛ tɔ shɔɔrinŋ wɔ̀ bi-i niŋ fa ji ǹʼgbansanŋ i kì. Nwɔ̀ a di míŋ tɛ, niŋ i tu kí ta fa ábɛɛ ramɔnimaan wu, miŋ tu míŋ bi-i kí tɛ ɲaan wɔ̀ tɛ. 4A niŋ ji-i kì, a Maseduwanitɔnŋ kiri bɛɛ ri na ta míŋ fan ábɛɛ tɛ, a kí ta fa ábɛɛ ramɔnimaan wu kì, niŋ a ji ɲaankwunŋ yibɛɛ gbɛ, koŋ ábɔɔ ki bi-a kili kì. 5Niŋ ki ra, míŋ ǹʼja-i ńʼtu ǹʼpari ŋí i tindaŋ kari bo ta ńʼjɛŋ ábɛɛ tɛ, nwɔma ábɛɛ yentɛfinŋ wɔ̀ri wulubi-i, á fa kí i ta yìrì ɲaanpo-ri míŋ jɛŋ sun. Niŋ a ǹʼji tu ǹʼma ciirudibi wu, tu koŋ ábɛɛ karaba bo ǹʼsun kì.
Koŋ ka ki tɔnɔ ki
(Timote (1) 6.17–19; Filipitɔnŋ kiri 4.15–19; Yuhana (1) 3.16–18)
6Á ǹʼtɔ tu konwɔtiŋ bilaŋ pyaanŋ firi-ra, tu nintiŋ i bilaŋ pyaanŋ tɛri-ra, nka tu nwɔ̀tiŋ bilaŋ mwɔɔnna firi-ra, tu nintiŋ i bilaŋ mwɔɔnna ki tɛri-ra sɛbɛ. 7Koŋ fɔn tenŋ tenŋ ka ki tan, ŋì i kɛɲɛ ntiŋ nwɔ̀ bo-i a ciiru, ŋì i ma ciirudibi wu, ŋì fa ji ǹʼkarabamaan i kì. Sabu konwɔtiŋ i ka ki tan-a ciirudibi wu, nintiŋ bidi-i Kirinŋ tɛ. 8So i Kirinŋ gbɛ ŋì i finŋ shɔɔrinŋ kiri bataa wɔri ábɛɛ tɛ, á i á maku shɔ finŋ kiri bataa kila, nwɔma á i so ye-i koŋ mwɔɔnna tɛ waarinŋ mwɔɔnna nu. 9Kirinŋ wɔ wulu ki i ǹʼbi-a tu :
« Ntiŋ i a gbɛ rupili-la kusɛbɛ, ntiŋ i gbɛwɔ kiri ka,
ntiŋ wɔ shɔɔrinŋ ki kɔ-a fyewu kì. »#Shu kiri 112.9.
10Kirinŋ wɔ̀ ki i finŋ tu ki wɔri-ra ji kaantɔnŋ ki tɛ, mìŋ tenŋ ki i nufinŋ ki wɔri-ri, mìnki a na ábɛɛ maku shɔ finŋ kiri bataa wɔri ábɛɛ tɛ, ŋì i yìrì mwɔ, nwɔma koŋ pyɛ kiri i so mwɔɔnna kila-i ábɛɛ gbɛ sɛbɛ.
11Niŋ ɲaan ki tɛ, ŋì a shɔɔrinŋ kwuru ki bataa ma ábɛɛ tɛ, nwɔma á i so koŋ tɔri kiri ka-i waarinŋ fɔn bataa ru. Niŋ na, koŋ mwɔɔnna a baraka bi Kirinŋ tɛ ábɔɔ yentɛfinŋ ki bira, yibɛɛ gbɛ kiri ra ta ninwɔ̀ wɔri kí tɛ. 12Sɛli yɛ, ábɛɛ i finŋ wɔ̀ wɔri-ra, niŋ a Yerusalɛmu wɔlinŋ kiri maku shɔ, niŋ bantenŋ i kì, ŋì a ji sababu kí mwɔɔnna i baraka bi Kirinŋ tɛ sɛbɛ.
13Kí ábɔɔ yentɛfinŋ kari ja waarinŋ wɔ̀ ru, kí a ǹʼtɔ tu ábɛɛ koŋ kwuru wɔ̀ri i. Niŋ na, kí a Kirinŋ gbɛ ábɛɛ bira. Sabu, kí a ǹʼja tu ábɛɛ á tu Yesu Kirisa Wulujii ki ra, á i tiri-ri ǹʼwɔ saa ki fan, niŋ fa tu áwɔ gbɛrupilibi ki baraka ra, tu ábɛɛ á tu á i ye arìbɛɛ fa bilinatɔnŋ pyɛ kiri bataa tɛ. 14Kirinŋ wɔ shɔɔrinŋ mwɔɔnna ka wɔrimaan ki bira ábɛɛ tɛ, kí a Kirinŋ nafɛ ábɛɛ tɛ, nwɔma kí i ǹʼji ábɛɛ wu tu ábɛɛ bidi arìbɛɛ tɛ.
15Yi baraka bi Kirinŋ tɛ awɔ kafinŋ shɔɔrinŋ ki bira, ninwɔ̀ bishi nmaŋ kì!
Currently Selected:
Korɛntitɔnŋ kiri (2) 9: JOB
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
