Korɛntitɔnŋ kiri (2) 10

Pooli wɔ wulu kiri a tɔ bitɔnŋ kiri tɛ

(Korɛntitɔnŋ kiri (1) 2.1–5; Ɔrɔmutɔnŋ kiri 15.17–21; Korɛntitɔnŋ kiri (2) 6.4–7; 13.2–4)

1Ǹʼyɔ bi-a tu míŋ ji ábɛɛ faninmwuŋ, tu míŋ ji-a koŋ sunjɛrimaan a, nka tu míŋ ja ji maŋ nari ábɛɛ ra, tu ŋí i ji shurukoŋ i. Míŋ i ábɛɛ rafɛ-a, á ǹʼma Kirisa wɔ tɔnsunfili ki fa ntiŋ wɔ shɔɔrinŋ ki bira, 2á fa ta ńʼpo wulu furu bi sun á tɛ, a míŋ na ta so ábɛɛ tɛ waarinŋ wɔ̀ ru kì dɛ! Nka koŋ wɔ̀ri i ǹʼbi-a tu yibɛɛ yi wɔ baara ki ma kɛɲɛ-a konanmini wɔ maka ɲaan bantenŋ wu, mɔ́ɔ́n wulu furu ki i bi-a niŋ bishi koŋ kiri tɛ.

3Sɛli yɛ, yibɛɛ i konanmini ni i, nka yibɛɛ yɔɔ kari ki tan-a konanmini wɔ tanka ɲaan tɛ kì. 4Yibɔɔ kari ki tan-a konanmini wɔ kari tanfinŋ ni na kì, kari tanfinŋ ni yɛ, nwɔ̀ri faan ki i po-a Kirinŋ gbɛ, ŋì i ɲa kiri faan ki fa kɔ́ɔ́ ɲakilila jɛ kiri li-ri. 5Mìŋ ɲaan tenŋ ki tɛ, ɲakilila jɛ kiri, niŋ fa finŋ woo finŋ i konaŋ kiri suu-ra Kirinŋ tɔ ki sun, yibɛɛ i nini bataa kari-ra, yi i konaŋ kiri bataa ɲakilila ki rapwulu, nwɔma kí i Kirisa wulu pa. 6Ábɛɛ ja ji ǹʼji yibɛɛ wu tu ábɛɛ bataa Kirisa wulu pa waarinŋ wɔ̀ ru, nwɔ̀ri Kirisa wulu pa-a kì, yibɛɛ ra nini kulu.

7Ábɛɛ yɛrima kiri bi kiri shɛɛli a ɲaanfɛ, a konwɔtiŋ ji bili ǹʼna tu afinŋ Kirisa wɔ, nintiŋ i ǹʼtɔ tu afinŋ Kirisa wɔ ɲaan wɔ̀ tɛ, tu yibɛɛ yɛrima kiri Kirisa wɔ ri mìŋ ɲaan tenŋ ki tɛ.

8Ŋuntiŋ ki sotinbi wɔ̀ wɔri-i yibɛɛ tɛ, hali míŋ ji ńʼyɛri ragbɛka jitan-a pyaanniŋ niŋ wu, niŋ míŋ ɲaankwun-a kì, Ŋuntiŋ ki ǹʼwɔri-i yibɛɛ tɛ ábɔɔ jɛŋ ta ki bira, ŋì i ǹʼwɔri ábɛɛ halikirama bira kì. 9Míŋ ǹʼtɛ, ŋí i ji ábɛɛ gbɛ koŋ nukɛnitɔnŋ bantenŋ i ńʼwɔ sɛbɛ kiri wu kì. 10Sabu kí i nwɔ̀ bi-a mɔ́ɔ́n sɛbɛ kiri sun, niŋ i kaa tu : « Faan fa baraka i Pooli wɔ sɛbɛ kiri ru wulu kiri ru, nka a ntiŋ ji yibɛɛ kanfɛ, ntiŋ so-a niŋ bishi wulu li bi-i kì, yìrì ji-a wulu ɲaansun ni i kì. » 11Konwɔtiŋ niŋ wulu ki bi-a, tu ntiŋ ǹʼtɔ tu yibɛɛ ǹʼbi-a ɲaan wɔ̀ tɛ yɔɔ sɛbɛ kiri ru, tu yibɛɛ ra ta ǹʼji mìŋ ɲaan tenŋ ki tɛ, a yibɛɛ ta so ábɛɛ kanfɛ.

12Yibɛɛ ra yi yɛri pyi niŋ koŋ kiri wu kì, nini wɔ̀ri i arì yɛri tɔ shɔɔrinŋ bi-a. Yibɛɛ ra yi tu yi ǹʼbi tu yibɛɛ fa nini tenŋ i kì, sabu kí koŋ tɔri bo-a arì yɛri kiri jɛŋ kì, niŋ i ɲakili balibi i.

13Yibɛɛ ra yi yɛri ragbɛka jitan, yi i fwuu yi daŋ ki sun kì. Kirinŋ tumaŋ wɔ̀ wɔri-i yibɛɛ tɛ, ninki ncusun-i yibɛɛ i so fɔ ábɛɛ tɛ, yibɛɛ ra yi yɛri ragbɛ, ŋì i kɛɲɛ niŋ wu. 14Kirinŋ mani wɔ̀ri ɲaannashi wuru-i, tu yibɛɛ ta Yesu Kirisa wɔ Wulujii ki sunjo yìrì ru, ábɔɔ mani ki ta-i kɛɲɛ niŋ bɛɛ ɛ, ninki fani ncin-i yibɛɛ i so ábɛɛ tɛ. Niŋ i ǹʼji-a tu yibɛɛ fwuu yi daŋ ki sun kì.

15Yibɛɛ yi yɛri ragbɛka jitan-a, miŋ tu yi a ji yi yɛri ji-a koŋ tɔri wɔ baara mamaan wu kì, nka yibɛɛ bili-i ǹʼna, tu ábɔɔ bilinabi ki ja ji ta jɛŋ, ǹʼbɛɛ ra bo yibɔɔ baara mwɔɔn ki sun, ábɛɛ kanfɛ yɔɔ baara ma sɔɔta ki ru.

16Niŋ ɲaan ki tɛ, yibɛɛ ra so ta-i Kirinŋ wɔ Wulujii ki sunjo ábɔɔ mani ki kɔɔtɛ sɔɔta kiri ru, niŋ a pari yɛri ragbɛ wu, koŋ tɔri wɔ baara ma mwɔɔn wu arɔɔ mani ni nu.

17Sabu ǹʼsɛbɛ-i Kirinŋ wɔ wulu ki ru tu : « Konwɔtiŋ ji-a a yɛri ragbɛ, ntiŋ a yɛri ragbɛ Ŋuntiŋ ki mabi ki ra a tɛ. » 18Á ǹʼtɔ tu konwɔtiŋ a yɛri rakali-la, tu nintiŋ ki bidi Ŋuntiŋ ki tɛ kì dɛ! Nka Ŋuntiŋ ki yɛrima ki i nwɔ̀ tɔ shɔɔrinŋ bi-a, ŋì i nintiŋ ki tɛ.

Currently Selected:

Korɛntitɔnŋ kiri (2) 10: JOB

Highlight

Copy

Compare