Korɛntitɔnŋ kiri (2) 4

Pooli fa a kaashi kiri wɔ baara maka ɲaan ki

(Tesalonikitɔnŋ kiri (1) 2.1–6; Korɛntitɔnŋ kiri (2) 2.14–17)

1Kirinŋ yibɛɛ sunmakwulupa-i ka ɲaan ka tɛ, ŋì i ka baara ka biye yibɛɛ gbɛsun, niŋ ki ra, yibɛɛ yi firi kilɛn-a kì. 2Konaŋ kiri i arì ɲaankwunbi wɔ̀ri fa arɔɔ bi kulinŋ wɔ̀ri radu-a, yibɛɛ nini bishi ri ma-a kì. Yibɛɛ koŋ sunnɛɛn kì. Yi dumiŋ Kirinŋ wɔ wulu ki rapwulu-la kì. Nka yibɛɛ i sɛli ki fɔɔ bi-a Kirinŋ ɲaanfɛ, nwɔma koŋ bataa i ǹʼtɔ tu yibɔɔ wulu ki sɛli i. 3Niŋ fa a fɔn na, yibɛɛ i Wulujii wɔ̀ sunjo-a, a niŋ kɔri ki radumaan ji faa ǹʼbɛɛ ri sun, nini i kpeeri i, nwɔ̀ri i fɔni saa ki sun. 4Niŋ koŋ kiri bili-la Kirinŋ na kì, sabu ka juniɲa ka ŋununtiŋ ki, ninwɔ̀ i shitaanni ki i, ninki kí ciiru ɲakili kiri rala-i, nwɔma kí fa Kirinŋ wɔ Wulujii ki sarinŋ ki ja kì, niŋ Wulujii ki wɔ̀ i Kirisa nɔɔri ki ji-a, ninwɔ̀ i Kirinŋ ɲaan ki ji-a. 5Yibɛɛ yi yɛri sunjo-a kì, yibɛɛ i Ŋuntiŋ Yesu Kirisa wulu ki sunjo-a. Nwɔ̀ i yibɛɛ, yibɛɛ yɛrima kiri i ábɛɛ tɛ baara matiiri i Yesu bira. 6Mìŋ Kirinŋ wɔ̀ ki ǹʼbi wuru tu manisarinŋ ki po mancinŋ ki faninmwuŋ,#Tɔnpa ki 1.3. mìŋ tenŋ ki i manisarinŋ ki po-a yibɛɛ ciiru tɔnŋ kiri ra, nwɔma ǹʼwɔ nɔɔri sinaŋ wɔ̀ i Kirisa ra, yibɛɛ i niŋ tɔbi ki kila.

Pooli fa a kaashi kiri wɔ ɲaanfɛkwulu bi kiri

(Korɛntitɔnŋ kiri (2) 6.3–10; 1.5–11; Timote (2) 2.8–11)

7Nka niŋ nafulu sinaŋ ki i yibɛɛ gbɛ, yibɛɛ wɔ̀ri baraka rakuru-i miŋ tu jɔduŋ, nwɔma konaŋ kiri i ǹʼtɔ tu niŋ sotinbi sinaŋ ki po-a yibɛɛ ru kì, nka tu ŋì po-a Kirinŋ gbɛ. 8Konaŋ kiri i ɲaanfɛkwulu bi kwuru ki bataa sɔɔ-ra yibɛɛ sun, nka yibɛɛ baraka ki kɔ-a kì. Yibɛɛ ciiru ɲakili ki i ɲaanmi-a, nka yi kwuru-ra yi gbɛbilimaŋ ki ra kì.#4.8 nka yi kwuru-ra yi gbɛbilimaŋ ki ra kì : Ka mani ka i so-a bi-i sɛbɛ tu: nka daŋ kɔ yibɛɛ sun kì. 9Kí yibɛɛ cɔɔri-i kusɛbɛ, nka Kirinŋ yibɛɛ tu yi cinancinŋ kì, kí i yi bwɔ fɛɛn fwuniŋ sun, nka yi beeni kì. 10Kí i yibɛɛ kilɛnmaŋ ceeli-la waarinŋ bataa ru, miŋ tu kí Yesu kilɛn-i ɲaan wɔ̀ tɛ. Nka Kirinŋ i yibɛɛ mwu-a, nwɔma konaŋ kiri i Yesu wɔ ɲaninkulutɔnbi ki ja yibɛɛ firi kiri ru, kí i ǹʼtɔ tu ntiŋ ɲaninkulutɔnŋ i.

11Sɛli ki ra, ŋì i yibɛɛ tu yi ɲaanna, yibɛɛ kɔniŋ i beŋ ki ɲaanfɛ waarinŋ bataa ru Yesu bira, nwɔma ntiŋ wɔ ɲaninkulutɔnbi ki i ja yibɛɛ firi beeni wɔ kiri ru. 12Niŋ ɲaan ki tɛ, yibɛɛ ɲinita kiri i yi gbɛfɛ waarinŋ bataa ru Kirinŋ wɔ Wulujii ki sunjomaŋ kiri ru, nwɔma ábɛɛ i ɲaninkulutɔnbi sɛlɛsɛli ki kila.

13Ǹʼsɛbɛ-i Kirinŋ wɔ wulu sɛbɛ ki ru tu : « Míŋ bili-i ǹʼna, ninki ncin-i míŋ i wulubi.#Shu kiri 116.10. » Mìŋ ɲaan tenŋ ki tɛ, yibɛɛ yɛrima kiri bili-i Ŋuntiŋ ki ra, niŋ ki ra yibɛɛ i wulubi-ri. 14Yibɛɛ bili-i ǹʼna, tu Kirinŋ wɔ̀ ki yibɛɛ Ŋuntiŋ Yesu ŋmɛni, tu mìŋ tenŋ ki a yibɛɛ ŋmɛni ntiŋ fan sɛbɛ, ŋì i yi fa ábɛɛ tu ǹʼɲaanfɛ. 15Bi finŋ woo finŋ i yibɛɛ kila-a, yibɛɛ i yìrì bataa pa-a yi ra ábɛɛ bira, niŋ ɲaan ki tɛ, Kirinŋ wɔ shɔɔrinŋ ki i so-a koŋ mwɔɔnna sun. A niŋ ma, koŋ mwɔɔnna a baraka bi Kirinŋ tɛ, kí i ǹʼgbɛ.

Ɲaninkulutɔnbi ki bilinabi ki baraka ra

(Pyɛɛri (1) 1.6–9; Ɔrɔmutɔnŋ kiri 8.23–25)

16Niŋ ki ra, yibɛɛ yi firi kilɛn-a fɛsɛfɛsɛ kì. Hali yibɛɛ firi ki baraka ji kɔ ta-a, jibi woo jibi, Kirinŋ i baraka ŋunaŋ wɔri-ra yibɛɛ ɲini ki tɛ.

17Sɛli ki ra, yibɛɛ i cɔɔri wɔ̀ kila-a dɔɔ, niŋ gbɛ-i, nka niŋ finŋ tɔri kì, sabu yibɛɛ ra ta gbɛbi wɔ̀ kila niŋ cɔɔri ki bira niŋ gbɛ-i kusɛbɛ, ǹʼfani dumiŋ kɔ-a kì. 18Niŋ ki ra, yibɛɛ ɲaniŋ finŋ ja wɔ kiri ra kì, nka yibɛɛ ɲaniŋ i finŋ jabali kiri ra. Finŋ wɔ̀ri i ja-a, nini bataa i kɔ-a, nka finŋ jabali kiri kɔ-a kì, nini i nmaŋ waarinŋ bataa ru.

Currently Selected:

Korɛntitɔnŋ kiri (2) 4: JOB

Highlight

Copy

Compare