Roma 4

Abraão moris loos tanba nia fiar

1Ita bele aprende hosi ita nia bei-ala Abraão. 2Tansaa mak Maromak simu nia? Tanba nia hahalok diak ka? Se nunee, Abraão bele iha razaun hodi gaba aan, maski iha Maromak nia oin ita ema la bele foti aan. 3Iha Livru Sagradu hakerek dehan, “Abraão fiar ba Maromak, nee mak Maromak deklara katak nia moris loos ona.”#Jenesis 15:6; Galasia 3:6

4Ema nebee serbisu, bainhira patraun selu nia kolen, osan nee laos prezenti, nee nia direitu. 5Maibee ita ho Maromak laos nunee. Ema nebee la serbisu maibee fiar ba Nia, nia fiar sai lia loos. Tanba Maromak mak deklara ema aat sai moris loos.

6Liurai David mos hatete nunee. Ema nebee Maromak deklara nia moris loos ona hetan bensaun boot. Tanba Maromak la haree ba nia hahalok. David dehan tan nunee:

7“Se ema kontra Maromak nia lei maibee Maromak foo perdaun,

ema nee hetan bensaun boot.

Se nia halo sala maibee Maromak hamoos tiha nia sala,

ema nee hetan bensaun boot.

8Se Nai Maromak la husu tuir ona nia sala,

ema nee hetan bensaun boot.”#Salmu sira 32:1-2

9Bensaun nee ba deit ema Judeu nebee sunat ka ba mos ema nebee la sunat? Ami hatete ona ba imi katak, tanba Abraão fiar ba Maromak nee mak Maromak deklara Abraão moris loos ona. 10Hori-bainhira mak Maromak deklara Abraão moris loos ona? Molok Abraão sunat ka sunat tiha ona? Maromak deklara Abraão moris loos ona molok nia sunat.

11Bainhira Abraão seidauk sunat, Nai Maromak konsidera ona nia ema moris loos. Kleur tiha mak foin nia sunat, nee hanesan sinal ida hodi hatudu katak nia fiar ona ba Maromak. Nunee, Abraão sai aman ba ema hotu-hotu nebee fiar ba Maromak maibee la sunat. Atu nunee Maromak mos simu sira hodi deklara katak sira moris loos ona, tanba sira nia fiar.#Jenesis 17:10 12Abraão mos sai aman ba ema Judeu nebee sunat. Laos tanba ita sunat, maibee tanba ita fiar ba Kristu, hanesan ita nia bei-ala Abraão mos fiar ba Maromak bainhira nia seidauk sunat.

Abraão simu Nai Maromak nia promesa tanba nia fiar

13Maromak promete ba Abraão ho nia jerasaun sira dehan, mundu nee sei sai sira nian. Maromak promete nunee laos tanba Abraão moris tuir lei, maibee tanba nia fiar ba Maromak. Hosi Abraão nia fiar nee mak Maromak simu nia hodi deklara katak nia ema moris loos ona.#Jenesis 17:4-6; 22:17-18; Galasia 3:29

14Se ita ema halo tuir Maromak nia lei mak foin bele simu buat nebee Maromak promete, entaun ita nia fiar ba Maromak la iha folin, i Maromak nia promesa mos la vale buat ida.#Galasia 3:18 15Tanba iha nebee deit mak iha lei, iha nebaa mos iha ema kontra lei nee. Bainhira ema kontra Maromak nia lei, Maromak hirus, i nia kastigu sira. Se Maromak nia lei la iha, la iha ema ida mak kontra Nia lei nee.

16Nee mak ita tenki fiar ba Maromak mak foin bele simu buat nebee Nia promete atu foo. Nunee, nudar Abraão nia jerasaun, ita bele laran metin katak, Maromak sei foo ba ita liu hosi Nia grasa. Atu ita ema Judeu nebee moris tuir lei ka fiar ba Maromak hanesan Abraão, ita hotu sei simu Maromak nia promesa. Tanba Abraão mak sai aman ba ita hotu.#Galasia 3:7 17Iha Livru Sagradu, Maromak promete ba Abraão dehan, “Hau sei halo o sai nasaun barak nia aman.” Abraão fiar ba Maromak, tanba Maromak mak halo moris fali ema mate, i Nia koalia deit, buat nebee la iha, bele iha kedas.#Jenesis 17:5

18Abraão laran metin hodi hein nafatin Maromak nia promesa, maski tuir ita ema nia haree la bele akontese. Tanba nee nia sai duni nasaun barak nia aman, hanesan Maromak hatete ona ba nia dehan, “O nia jerasaun sei sai barak teb-tebes.”#Jenesis 15:5 19Abraão fiar metin nafatin, maski nia hatene aan katak, nia katuas liu ona, mais-ou-menus tinan atus ida, i nia feen Sara mos la bele hetan oan, tanba nia kiuk.#Jenesis 17:17 20Abraão nia fiar la nakdoko, nia la duvida katak Maromak sei kumpri Nia promesa. Maibee nia fiar metin liu tan i nia foti aas Maromak nia naran. 21Nia laran metin katak Maromak iha kbiit atu halo saida mak Nia promete tiha ona. 22Nee mak iha Livru Sagradu dehan, “Maromak simu nia hodi deklara katak nia moris loos ona.”

23Liafuan nebee hakerek nee, laos ba Abraão deit, 24maibee hakerek mos ba ita. Maromak mos sei konsidera imi moris loos ona, tanba ita fiar ba Nia. Maromak nee mak halo moris fali ita nia Nai Jesus hosi mate. 25Nia entrega Jesus ba ema oho tanba ita ema nia sala. Depois Maromak halo moris fali Nia, atu nunee Maromak bele deklara ita moris loos ona no hadame fali ita ema ho Nia.#Isaías 53:4-5

Currently Selected:

Roma 4: BTDT

Highlight

Copy