Roma 3

Maski ema Judeu simu eransa hosi Nai Maromak, nee mos la salva sira

1Entaun, sai ema Judeu iha folin ka lae? I sunat tuir lei Judeu nian iha folin saida? 2Iha folin boot oi-oin! Liu-liu Maromak foo fiar ba ema Judeu sira atu kuidadu didiak Nia liafuan. 3Maski nunee, ema Judeu balu la moris tuir Maromak nia liafuan. Bainhira sira la moris tuir, Maromak halo saida? Nia halo tuir nafatin Nia liafuan ka lae? 4Nia kumpri nafatin! Maski ema hotu-hotu iha mundu bosok tuun-sae mos, Maromak loos nafatin. Nee hanesan hakerek tiha ona iha Livru Sagradu dehan,

“Iha ema balu foo sala dehan,

Maromak tesi lia la loos.

Maibee sira sei haree momoos katak,

saida mak Nia koalia sempre loos,

i Nia sempre manaan, tanba Nia nunka bosok.”#Salmu sira 51:4

5Keta halo be ema ruma hanoin hanesan nee: “Bainhira ita halo buat aat, nee hatudu katak, Maromak la hanesan ita ema, tanba Nia sempre halo buat nebee mak loos. Se nunee, nusaa mak Maromak kastigu nafatin ita bainhira ita halo buat aat? Nee justu ka lae?”. 6Maibee laos nunee! Tanba se Maromak la iha direitu atu kastigu ema, oinsaa mak Nia bele julga ema hotu-hotu iha mundu?

7Keta halo be ema ruma dehan tan nunee: “Bainhira hau bosok, ida nee halo ema seluk hahii liu tan Maromak, tanba Maromak sempre koalia lia loos. Entaun se hau nia sala halo ema seluk hahii Maromak, nusaa mak Nia foo sala fali hau dehan hau nee sala nain?” 8Se ida nee loos duni, entaun bele mos dehan, “Diak liu ita halo buat aat, atu buat nebee diak mos bele aumenta.” Iha ema balu duun hau dehan hau mak hanorin hanesan nee. Ema nebee koalia hanesan nee, merese duni hetan kastigu hosi Maromak.

Ema hotu-hotu ema sala nain

9Entaun, oinsaa ho ita ema Judeu? Ita diak liu fali ema nebee laos Judeu ka? Lae liu! Hau esplika ona ba imi katak, sala ukun ita ema hotu-hotu, atu ema Judeu ka laos Judeu. 10Hanesan hakerek ona iha Livru Sagradu dehan,

“La iha ema ida mak moris loos,

ida mos la iha.

11La iha ema ida mak komprende kona ba Maromak,

la iha ema ida mak buka Nia.

12Ema hotu-hotu sees ona hosi dalan nebee loos,

sira hotu la iha folin ona.

La iha ema ida mak halo buat diak,

ida mos la iha.#Salmu sira 14:1-3; 53:1-3

13Sira nia liafuan dodok dois

hanesan rate nebee ema kee fila fali.

Sira nia ibun so hasai deit liafuan bosok.

Liafuan nebee sai hosi sira nia ibun

hanesan samea nia veneno.#Salmu sira 5:10; 140:4

14Sira nia ibun nakonu ho tolok no malisan.#Salmu sira 10:7

15Sira nia ain lalais loos atu oho ema.

16Sira estraga door,

i sempre halo ema seluk laran susar.

17Sira la hatene moris hakmatek,#Isaías 59:7-8

18i ema sira nee la hatene hamtauk Maromak.”#Salmu sira 36:2

19Entaun, ita hatene katak, liafuan hotu-hotu nebee hakerek iha Maromak nia lei hatudu ba sira nebee moris iha lei nia okos. Maromak foo lei nee para ema ida la bele defende aan dehan nia moris loos. Aban-bainrua ema hotu-hotu iha mundu tenki hataan iha Maromak nia oin. 20La iha ema ida mak Maromak dehan, nia moris loos, tanba nia halo tuir Maromak nia lei. Maibee hosi lei nee ita bele hatene momoos katak ita ema sala nain.#Salmu sira 143:2; Galasia 2:16

Fiar uluk ba Jesus Kristu foin Nai Maromak konsidera ita ema moris loos

21Maibee agora nee Maromak hatudu ona dalan mai ita para ita bele diak malu ho Nia. Dalan nee la haree ba ita atu moris tuir lei ka lae. Uluk kedas Moisés nia lei ho mos profeta sira nia livru hakerek kona ba dalan nee. 22Dalan mak nee: See mak fiar ba Jesus Kristu, Maromak simu nia hodi deklara katak nia moris loos ona. Atu nia ema Judeu ka laos Judeu, Maromak la haree ba ida nee. #Galasia 2:16

23Tanba ema hotu-hotu halo sala. Nee mak Maromak nia prezensa naroman nabilan dook ona hosi ita ema. 24Maibee tanba deit Maromak nia laran diak mai ita mak Nia simu ita hodi deklara katak ita nia sala moos tiha ona. Nia simu ita nunee tanba Kristu Jesus selu kotu ona ita nia sala.

25Maromak foo Jesus para fakar Nia raan too mate hanesan sakrifisiu ida hodi hamoos ita nia sala i hadame ita ema ho Maromak, naran katak ita fiar ba Nia mate nee. Maromak halo nunee hodi hatudu nia justisa, tanba uluk Nia pasensia ho ema nia hahalok aat, nee mak Nia seidauk kastigu sira. 26Maibee agora, liu hosi Jesus nia mate, Maromak hatudu Nia justisa, para ema bele haree katak Nia sempre tesi lia ho loloos. I liu hosi Jesus nia mate nee, ita mos haree katak, Maromak simu ema nebee mak fiar ba Jesus.

27Se nunee, ita bele gaba aan ka? Lae liu! Tansaa mak la bele? Tanba laos halo tuir lei no ita nia hahalok diak mak Maromak simu ita. Maibee Nia simu ita tanba ita fiar ba Jesus.

28Tanba ita hatene katak, ema nebee Maromak deklara nia moris loos ona laos tanba nia halo tuir Maromak nia lei, maibee tanba nia fiar ba Jesus Kristu.

29Maromak nee ema Judeu nia Maromak deit ka? Lae! Nia mos nasaun hotu-hotu nia Maromak.

30Maromak nee ida deit. Nia simu ema Judeu nebee sunat bainhira sira fiar ba Nia. I ema nebee laos Judeu no la sunat mos, Nia simu tanba sira nia fiar.#Deuteronomio 6:4; Galasia 3:20

31Entaun, se ita fiar ba Jesus Kristu, nee dehan katak ita soe tiha Maromak nia lei ka? Lae liu! Ita hametin liu tan lei nee.

Currently Selected:

Roma 3: BTDT

Highlight

Copy