Mateus 24

Uma Kreda Boot sei rahun

(Marcos 13:1-2; Lucas 21:5-6)

1Koalia hotu tiha, Jesus lao sai hosi Uma Kreda Boot. Nia lao dadaun, Nia eskolanti sira mai besik hodi hatudu Uma Kreda nia furak ba Nia. 2Maibee Jesus hataan, “Imi haree didiak baa! Hau hatete loloos ba imi, too loron ida, buat sira nee sei rahun hotu. Fatuk sira nee hotu sei tetuk too rai.”

Hahuu ona terus boot no susar

(Marcos 13:3-13; Lucas 21:7-19)

3Bainhira Jesus baa tuur mesak iha foho Oliveira, Nia eskolanti sira baa besik Nia hodi husu, “Hatete took mai ami, buat nebee ohin Ita Boot koalia nee, bainhira mak buat sira nee sei akontese? Bainhira Ita Boot atu fila fali mai, sinal saida mak sei mosu? I sinal saida mak sei hatudu katak mundu nee atu remata ona?”

4Jesus hataan, “Matan moris neon nain para ema la bele bosok imi. 5Tanba ema barak sei mai lori Hau nia naran dehan sira nee mak Kristu, Salvador nebee Maromak promete ona hori uluk atu haruka mai. I sira sei lohi ema barak. 6Imi sei rona kona ba funu oi-oin, i ema sei konta tutan kona ba funu iha fatin-fatin. Maibee matan moris neon nain, lalika laran susar. Buat sira nee sei akontese duni, maibee nee mundu seidauk remata. 7Tanba nasaun sei funu hasoru nasaun, reinu sei funu hasoru reinu. Sei iha rai hamlaha boot, i rai sei nakdoko iha fatin-fatin. 8Maibee susar sira nee foin mak hahuu, hanesan feto isin rua nebee foin kanotak moras atu tuur ahi.

9Ema iha nasaun hotu-hotu sei odi imi tanba imi tuir Hau. Sira sei entrega imi ba ema seluk hodi halo terus imi i oho imi.#Mateus 10:22 10Iha tempu nee mos ema nebee fiar mai Hau, barak sei fila kotuk mai Hau. Sira odi malu i entrega sira nia maluk ba inimigu sira. 11Profeta falsu barak sei mosu hodi bosok ema barak atu tuir sira. 12Tanba hahalok aat iha mundu nee aumenta ba bebeik maka ema barak la hatudu ona domin ba malu. 13Maibee ema nebee tuir nafatin Hau too rohan, Maromak sei salva nia.#Mateus 10:22 14I Novidade Diak kona ba Reinu Lalehan nian, ema sei haklaken iha mundu tomak, atu nunee ema hosi nasaun hotu-hotu bele hatene kona ba Maromak nia ukun. Haklaken hotu tiha mak foin mundu nee remata.

Terus boot mai no profeta falsu sira

(Marcos 13:14-23; Lucas 21:20-24)

15Hori uluk profeta Daniel hakerek kona ba ema aat teb-tebes ida sei hamriik iha fatin santu iha uma kreda boot. See mak lee liafuan nee, komprende baa! #Daniel 9:27; 11:31; 12:11 16Imi nebee iha provinsia Judeia tenki halai ona ba foho. 17Iha loron nee, ema nebee iha hela liur, la bele tama baa foti sasaan iha uma laran. 18I ema nebee iha hela toos, la bele fila baa foti nia hena iha uma.#Lucas 17:31 19Iha tempu nee, feto isin rua ho inan sira nebee foo susu nia oan, sei susar teb-tebes. 20Harohan ba Maromak atu loron nebee mak imi halai ba foho nee, la bele monu iha tempu malirin ka iha loron Sabadu. 21Tanba iha tempu nee, ema sei hetan terus aat liu. Komesa hosi Maromak halo mundu too agora, seidauk iha terus boot ida hanesan nee. I bainhira terus boot nee liu tiha, sei la akontese tan hanesan nee.#Daniel 12:1; Apokalipse 7:14 22Se Maromak la habadak tempu terus nee, la iha tan ema ida mak moris. Maibee Nai Maromak hadomi ema sira nebee Nia hili tiha ona nee, maka Nia sei habadak tempu terus nee.

23Iha tempu nee, se ema ruma dehan ba imi, ‘Haree ba, Kristu iha nee’ ka ‘Kristu iha nebaa’, imi keta fiar. 24Tanba ema sei mai bosok imi dehan sira mak Kristu ka sira Maromak nia profeta. Sira sei hatudu sinal oi-oin no milagre sira nebee halo ema admira. Nunee sira bele lohi ema barak para lao sala dalan. Too ema nebee Maromak hili ona mos sira hakarak bosok hotu. 25Entaun hanoin didiak! Aban-bainrua buat sira nee akontese, lalika hakfodak, tanba Hau foo hatene ona ba imi.

26Nunee se ema mai bosok imi dehan, ‘Haree baa, Kristu iha rai fuik maran nebaa’, lalika sai baa haree. Se ema dehan, ‘Kristu iha hela subar fatin nee’, lalika fiar. 27Tanba bainhira Hau, Ema Oan fila fali mai hosi lalehan, ema hotu sei haree momoos, hanesan rai lakan nebee naroman hosi lorosae too loromonu.#Lucas 17:23-24

28Bainhira imi haree manu metan semo hamutuk ba iha fatin ida, nee sinal hodi hatudu katak iha mate isin dodok iha nebaa.”#24:28 Tuir ema matenek balu, nee dehan katak, aban-bainrua bainhira Jesus atu besik fila fali mai, sei iha sinal nebee hatudu ho klaru. #Lucas 17:37

Nai Jesus sei fila fali mai hosi lalehan

(Marcos 13:24-27; Lucas 21:25-28)

29“Bainhira loron terus nee liu tiha ona, loromatan sai nakukun tiha, fulan mos la foo naroman tan. Fitun sira iha lalehan sei monu namtate, i kbiit hotu-hotu iha loro-leten sei nakdoko.#Isaías 13:10; 34:4; Ezequiel 32:7; Joel 2:10,31; 3:15; Apokalipse 6:12-13

30Iha loron nee, ema hotu-hotu iha mundu sei haree sinal ida iha loro-leten hatudu katak Hau, Ema Oan, atu mai ona. Haree nunee, sira nebee lakohi simu Hau sei tanis ho laran susar. Depois ema hotu-hotu sei haree Hau, Ema Oan tuun mai iha kalohan leten, ho kbiit boot no naroman nabilan nian.#Daniel 7:13; Zacarias 12:10-14; Apokalipse 1:7 31I Hau sei haruka Hau nia anju sira huu korneta ho lian makaas i sira sei ba halibur ema sira nebee mak Maromak hili tiha ona, hosi lorosae too loromonu, hosi tasi feto too tasi mane.”

Komparasaun hosi ai figeira

(Marcos 13:28-31; Lucas 21:29-33)

32“Hanoin took ai figeira, i aprende hosi ai nee. Bainhira ai figeira nia sanak komesa matak i nia dikin komesa sai, imi hatene katak bailoro besik ona. 33Nunee mos bainhira imi haree buat sira nee hotu akontese, imi hatene katak Hau besik mai ona, Hau iha ona odamatan oin. 34Hau hatete loloos ba imi, hosi jerasaun nebee moris iha tempu nee, iha balu sei moris too buat sira nee hotu akontese. 35Lalehan ho rai sei remata, maibee Hau nia liafuan sei la remata.”

La iha ema ida hatene bainhira mak Nai Jesus fila fali mai

(Marcos 13:32-37; Lucas 17:26-30; 17:34-36)

36“Kona ba loron ho oras nebee mak Hau atu fila fali mai, la iha ema ida mak hatene. Anju sira iha lalehan, no Hau, Ema Oan mos la hatene. So Hau nia Aman iha lalehan deit mak hatene. 37Hanesan ema moris iha Noé nia tempu uluk, nunee mos loron nebee Hau, Ema Oan, fila fali mai.#Jenesis 6:5-8 38Iha tempu nebaa, molok bee boot sae, sira haan-hemu i halo festa kazamentu hanesan baibain, too loron Noé tama ba roo boot laran. 39Sira la hatene kona ba saida mak atu mosu. Bainhira bee boot nee lori tiha sira hotu, foin sira hatene. Nunee mos bainhira Hau, Ema Oan fila fali mai.#Jenesis 7:6-24 40Iha tempu nee, ema nain rua serbisu hela iha toos, Maromak sei lori tiha ida i husik hela ida seluk. 41Iha feto nain rua fai hela hare, Maromak sei lori tiha ida, i husik hela ida seluk.

42Entaun imi tenki matan-moris neon nain, tanba imi la hatene saa loron mak Hau, imi nia Nai fila fali mai. 43Hanoin didiak! Se uma nain ida hatene loloos iha oras nebee naok-teen atu mai, nia sei hadeer hodi ronda atu naok-teen la bele tama. 44Nee duni, imi tenki matan moris neon nain nafatin. Tanba Hau, Ema Oan sei fila fali mai iha oras nebee imi la hatene.”#Lucas 12:39-40

Komparasaun kona ba atan diak no atan aat

(Lucas 12:41-48)

45“Entaun imi tenki hanesan atan ida nebee matenek toma konta nia patraun nia sasaan, i foo laran ba nia patraun. Patraun sei foo fiar ba ema nee para fahe hahaan ba nia atan sira seluk tuir oras. 46Sorti boot atan nebee bainhira nia patraun fila ba uma, nia haree atan nee serbisu hela. 47Hau hatete loloos ba imi, patraun sei foti nia hodi toma konta nia rikusoin hotu.

48Maibee se atan nee ema aat ida, nia hanoin dehan, ‘Patraun sei kleur mak fila.’ 49Depois nia komesa baku nia maluk atan sira seluk, i haan-hemu hamutuk ho ema lanu-teen sira. 50Iha loron nebee nia la hein, i oras nebee nia la hatene, derepenti deit nia patraun fila mai. 51Depois patraun sei tetak rahun tiha atan nee i soe hamutuk ho ema laran makerek sira. Iha nebaa ema sei tanis hakilar i ruun nehan.”

Currently Selected:

Mateus 24: BTDT

Highlight

Copy