Mateus 23

Nai Jesus kritika mestri relijiaun ho ema Farizeu sira

(Marcos 12:38-39; Lucas 11:43,46; 20:45-46)

1Hotu tiha Jesus hatete ba Nia eskolanti sira ho ema barak nebee halibur hamutuk iha fatin nee. Nia dehan, 2“Mestri relijiaun sira ho mos ema Farizeu sira iha direitu hodi hanorin Moisés nia lei. 3Nee duni imi tenki rona sira i halo tuir sira nia hanorin. Maibee la bele halo tuir sira nia hahalok sira, tanba sira la moris tuir buat nebee mak sira rasik hanorin. 4Sira foo regulamentu todan liu ba ema, maibee sira rasik la ajuda netik ema atu bele halo tuir. 5Serbisu saida deit mak sira halo, so hodi hatudu ba ema seluk haree i gaba. Ezemplu, sira hakerek Maromak nia Liafuan taka ba sira nia reen toos i suku fita iha sira nia batina tutun tuir lei Moisés nian.#23:5 Iha tempu nebaa, ema mane sira hakerek liafuan balu hosi Biblia tau iha karteira ida kesi ba sira nia reen toos ho sira nia liman hodi foo hanoin ba sira atu moris tuir Maromak nia ukun fuan. Sira mos suku fita azul iha sira nia batina tutun hodi hatudu katak sira Maromak nian. Mestri relijiaun ho ema Farizeu sira halo sira nia karteira boot liu ho sira nia fita azul naruk liu atu ema seluk bele gaba sira. #Mateus 6:1; Deuteronomio 6:8; Numerus 15:38

6Bainhira iha festa ka iha uma kreda laran, sira gosta tuur iha oin. 7Sira gosta ema kumprimenta sira iha merkadu, i gosta ema bolu sira ‘mestri’. 8Maibee imi la bele hanesan sira. Imi la bele simu bainhira ema gaba imi hodi bolu imi ‘mestri’, tanba imi nia Mestri ida deit, i imi hotu mesak maun-alin. 9Imi la bele temi see-see deit iha mundu nee nudar 'aman', tanba imi nia Aman iha ida deit, Nia iha lalehan. 10Imi la bele simu ema bolu imi ‘xefi’, tanba imi nia Xefi iha ida deit, Nia mak Kristu. 11Hosi imi sira nee, see mak boot liu, nia tenki haraik aan hodi serbii ema seluk.#Mateus 20:26-27; Marcos 9:35; 10:43-44; Lucas 22:26 12Tanba see mak foti aan, Maromak sei hatuun nia. Maibee see mak haraik aan, Maromak sei foti sae nia.”#Lucas 14:11; 18:14

Nai Jesus kritika nai lulik nia xefi sira

(Marcos 12:40; Lucas 11:39-42,44,47-52; 20:47)

13Depois Jesus hatete ba nai ulun relijiaun Judeu sira dehan, “Imi mestri relijiaun sira ho ema Farizeu sira, imi sei hetan susar. Imi koalia oin ida, hahalok oin seluk. Imi rasik lakohi tama Maromak nia reinu. Se iha ema seluk hakarak tama mos, imi taka odamatan ba sira, atu sira la bele tama.

14[Imi mestri relijiaun sira ho ema Farizeu sira, imi sei hetan susar. Imi koalia oin ida, hahalok oin seluk. Imi gosta haan-matak feto faluk sira hodi hadau sira nia uma, i finji harohan nar-naruk para taka falta imi nia hahalok aat. Nee duni Maromak sei kastigu imi todan liu fali ema seluk.]#23:14:Evanjelhu Mateus nee, iha kopia barak hosi tempu antigu. Kopia nebee foun liu hakerek versikulu 14 nee, maibee kopia nebee antigu liu lae.

15Imi mestri relijiaun sira ho ema Farizeu sira, imi sei hetan susar. Imi koalia oin ida, hahalok oin seluk. Imi lao lemo-lemo rai too hakur tasi hodi buka ema ida para tuir imi nia relijiaun. Maibee bainhira imi hetan tiha, imi halo nia moris aat liu fali too nia hetan kastigu iha infernu todan liu fali imi dala rua.

16Imi mestri matan delek! Imi sei hetan susar. Imi hanorin dehan, ‘Se ema ida jura temi Uma Kreda Boot nia naran, nia la halo tuir mos la buat ida. Maibee se nia jura temi osan mean nebee mak iha Uma Kreda laran, entaun nia tenki halo tuir.’ 17Imi ema matan delek i beik-teen! Ida nebee mak importante liu? Osan mean ka Maromak nia Uma Kreda nebee haketak osan mean nee hodi sai santu?

18Imi mos hanorin dehan, ‘Se ema ida jura temi altar iha Uma Kreda Boot, i nia la halo tuir la iha problema. Maibee se nia jura temi oferta nebee iha altar leten, nia tenki halo tuir.’ 19Imi nee ema matan delek duni! Ida nebee mak importante liu? Oferta ka altar nebee haketak oferta nee hodi sai santu? 20Nee duni, se ema jura temi altar, nee dehan katak nia temi buat hotu-hotu nebee mak iha altar leten. 21Se nia jura temi Uma Kreda Boot, nee dehan katak nia temi mos Ida nebee hela iha Uma Kreda nee. 22I se nia jura temi lalehan, nee dehan katak nia temi Maromak nia kadeira ukun i temi mos Ida nebee tuur iha kadeira ukun nee.#Isaías 66:1; Mateus 5:34

23Imi mestri relijiaun ho ema Farizeu sira, imi sei hetan susar. Imi koalia oin ida, hahalok oin seluk. Bainhira imi kuu modo tahan, imi badinas foo parte ida hosi sanulu hanesan dizimu ba Maromak. Too modo tahan kikoan-kikoan hanesan ortelaun ho ruku mos imi foo dizimu. Maibee imi la interese kona ba buat nebee mak importante liu iha Maromak nia lei, hanesan justisa, domin ho foo laran ba Maromak. Tuir loos buat sira nee mak tenki halo uluk. Maibee keta haluha foo mos dizimu ba Maromak.#Levitiku 27:30 24Imi mestri matan delek sira! Imi bele taes bee hodi hasai lalar nebee monu tama ba imi nia kopu laran, maibee kuda kamelu iha laran imi tolan tomak!#23:24 Nee dehan katak, sira badinas halo buat nebee laduun importante, maibee lei nebee mak importante liu, sira la interese.

25Imi mestri relijiaun ho ema Farizeu sira, imi sei hetan susar. Imi koalia oin ida, hahalok oin seluk. Imi badinas hamoos kopu ho bikan nia liur, maibee nia laran foer nafatin. Imi mos hanesan nee, gosta kaan no hadau ema nia sasaan.

26Imi ema Farizeu matan delek duni! Fasi uluk bikan nia laran, mak nia liur sai moos hotu.

27Imi mestri relijiaun ho ema Farizeu sira, imi sei hetan susar. Imi koalia oin ida, hahalok oin seluk. Imi hanesan rate nebee ema pinta mutin. Hosi liur haree ba furak, maibee iha laran iha mate ruin ho foer oi-oin nebee halo ema hakribit.#Apostolu sira nia Istoria 23:3 28Imi mos nunee. Bainhira ema haree imi hosi liur, imi ema diak. Afinal imi laran makerek no kontra Maromak nia ukun fuan.

29Imi mestri relijiaun ho ema Farizeu sira, imi sei hetan susar. Imi koalia oin ida, hahalok oin seluk. Imi hada Maromak nia profeta sira nia rate halo boboot, ema moris loos sira nia rate mos imi enfeita halo kapaas. 30Depois imi dehan, ‘Se ami moris iha ami nia bei-ala sira nia tempu, ami lakohi hamutuk ho sira hodi oho profeta sira nee.’ 31Afinal imi nia liafuan nee hatudu sai katak, imi nee jerasaun hosi ema sira nebee oho profeta sira. 32Entaun buat aat nebee mak imi nia bei-ala sira husik hela ba imi, husik imi hatutan ba too hotu!

33He! Imi hanesan samea nebee fila lia tuun-sae! Oinsaa imi bele halai sees hosi kastigu iha infernu? 34Tanba nee, rona didiak! Hau sei haruka nafatin ba imi profeta sira, ema matenek sira ho mos mestri sira nebee hanorin Maromak nia Liafuan. Maibee imi sei oho balu, i prega balu ba iha krus. Sira seluk imi baku ho sikoti iha imi nia uma kreda i duni hosi aldeia ba aldeia. 35Nunee, ema moris loos hotu-hotu nebee imi nia bei-ala sira oho, imi nebee moris agora mak sei lori todan. Nee sura hosi Abel, ema ida nebee moris loos, too iha Zacarias, Barakias nia oan. Ema oho Zacarias iha area Uma Kreda Boot besik meza sakrifisiu. 36Hau hatete loloos ba imi, sira hotu nia mate, imi nebee moris agora mak lori todan.”

Nai Jesus hanoin loos ema Jerusalém

(Lucas 13:34-35)

37“Koitadu ho imi ema Jerusalém! Imi oho Maromak nia profeta sira, i ema nebee Maromak haruka ba imi, imi tuda sira ho fatuk too mate. Dala barak Hau hakarak halibur imi hanesan manu inan halibur nia oan sira para luut, maibee imi lakohi. 38Rona mai, Maromak husik tiha ona imi nia hela fatin i sai fuik tiha ona. 39Hau hatete ba imi, imi sei la haree tan Hau ona too imi foo sai dehan, ‘Maromak foo bensaun ba Ema nebee mai lori Nai Maromak nia naran.’ ”

Currently Selected:

Mateus 23: BTDT

Highlight

Copy