1 Pedro 2
2
Jesus Kristu hanesan fatuk prinsipal
1Tanba nee, soe tiha hahalok aat hotu-hotu! La bele bosok, la bele koalia oin ida hahalok oin seluk, la bele laran moras ema, i la bele hatete aat ema seluk. 2Hanesan bebee ida nebee foin moris hamrook hakarak hemu susu been hosi sira nia inan, nunee mos imi tenki hamrook ba Nai Maromak nia liafuan. Tanba Nia liafuan hanesan susu been diak ba imi nia klamar, halo imi loron ba loron buras ba bebeik, iha imi nia salvasaun. 3Tanba imi senti ona ita nia Nai nia laran diak.#Salmu sira 34:10
4Imi hakbesik ona ba Jesus Kristu. Nia hanesan fatuk isin nebee moris. Ema soe tiha fatuk nee, maibee Maromak hili Nia i konsidera Nia folin karun teb-tebes 5Nunee imi ida-idak mos hanesan fatuk isin nebee moris, i Maromak hada dadauk imi hotu too imi hamutuk sai uma ida para Nia Espiritu hela. Maromak mos halo imi sai hanesan nai-lulik nebee moris ho laran moos hodi foo sakrifisiu espiritual ba Nia. I sakrifisiu nee Nia simu ho haksolok, liu hosi Jesus Kristu. 6Tanba iha Livru Sagradu Nai Maromak dehan,
“Haree baa! Hau tau hela fatuk ida
iha sidade Siaun.
Fatuk nee folin boot teb-tebes,
i Hau hili fatuk nee para sai fatuk ida nebee importante liu iha sidade nee.
See mak fiar ba Nia
sei la moe.”#Isaías 28:16
7Fatuk nee mak Jesus Kristu. Nia folin karun teb-tebes ba imi nebee fiar Nia. Maibee ba ema nebee la fiar, Livru Sagradu hakerek dehan,
“Fatuk ida nebee badaen sira soe tiha ona,
agora sai fali fatuk nebee importante.”#Salmu sira 118:22
8I hakerek mos nunee:
“Fatuk nee halo ema sidi,
i halo sira monu.”#Isaías 8:14-15
Sira sidi iha fatuk nee tanba sira lakohi rona Nai Maromak nia liafuan. I Nai Maromak mos desidi nanis ona atu sira sai nunee.
9Maibee imi laos nunee. Imi Nai Maromak hili tiha ona hodi sai Nia povu. Imi hanesan nai-lulik nebee mak serbii liurai. Imi hanesan nasaun ida nebee moris loos. Imi Maromak nia povu. Maromak hili imi nunee para imi bele konta sai buat diak nebee mak Maromak halo tiha ona ba imi. Tanba Nia mak bolu imi sai hosi nakukun hodi tama ba iha Nia naroman ida nebee furak teb-tebes.#Ezodu 19:5-6; Isaías 43:20-21; Deuteronomio 4:20; 7:6; 14:2; Tito 2:14; Isaías 9:2 10Uluk imi laos Nai Maromak nia povu, maibee agora imi sai ona Nia povu. Uluk imi seidauk simu Maromak nia domin, maibee agora imi simu ona.#Oséias 2:23
Hakaas aan para moris loos
11Maluk doben sira, imi nee ema lao rai deit, imi hela iha mundu nee la kleur ida. Tanba nee hau husu atu imi hadook aan hosi imi nia hakarak nebee aat, tanba imi nia hakarak aat sempre halo funu hasoru imi nia aan. 12Imi tenki hakaas aan para moris loos iha ema nebee laos judeu sira nia leet. Nunee, se sira duun matak imi, sira bele haree deit imi nia hahalok diak, i bainhira Jesus fila fali mai hosi lalehan, ema sira nebee laos judeu sira sei foti aas Nai Maromak nia naran.
Hakruuk ba ukun nain sira
13Ita nia Nai hakarak imi tenki hakruuk ba ukun nain sira. Imi tenki hakruuk ba liurai, tanba nia mak ukun nain nebee boot liu. 14Hakruuk mos ba ukun nain sira seluk, tanba liurai foti sira para kastigu ema nebee mak halo aat i gaba ema nebee mak hahalok diak. 15Tanba Nai Maromak hakarak para imi halo buat nebee diak, atu ema beik-teen sira nebee mak la hatene buat ida, la iha liafuan ida atu koalia hasoru imi. 16Imi simu ona liberdade hosi Maromak. Nunee imi tenki moris hanesan ema nebee livre ona. La bele uza imi nia liberdade nee hodi halo fali buat aat, maibee moris hanesan Maromak nia atan. 17Hatudu respeitu ba ema hotu-hotu, hadomi imi nia maluk sarani sira, hamtauk Nai Maromak, i respeita liurai.
Aguenta iha terus laran hanesan Jesus Kristu
18Atan sira, hakruuk ba imi nia patraun, i respeita sira. La bele hakruuk deit ba patraun nebee mak laran diak i ibun midar. Maibee hakruuk mos ba patraun nebee mak laran aat. 19Se ema kastigu imi maski imi la sala, i imi aguenta ho pasiensia nafatin, tanba imi hatene Maromak nia hakarak, maka Nia sei hatudu nia laran diak ba imi. 20Se karik imi halo sala mak ema baku, imi manaan saida se aguenta ho pasiensia? Maibee se imi hetan terus tanba halo buat diak, i imi aguenta, ida nee mak Maromak simu ho laran haksolok. 21Maromak bolu imi para moris nunee, tanba Kristu mos terus ba imi. Nunee Nia sai ezemplu atu imi lao tuir nia ain fatin. 22Iha Livru Sagradu hakerek nunee:
“Nia nunka halo sala.
Liafuan bosok nunka sai hosi Nia ibun.”#Isaías 53:9
23Bainhira ema tolok Nia, Nia la kontra hasoru. Bainhira ema halo Nia terus, Nia la ameasa atu halo aat fali sira. Maibee Nia entrega Nia Aan ba Nai Maromak nia liman, tanba Maromak mak tesi lia ho loloos.#Isaías 53:7 24Kristu rasik mak lori ita nia sala iha ai krus leten para ita nebee mate ba sala bele moris iha lia loos. Nia kanek sira nee mak kura ona imi.#Isaías 53:6 25Uluk imi hanesan bibi malae nebee mak lao sala dalan. Maibee agora imi fila fali ona ba imi nia Bibi Atan, i Nia mak tau matan ba imi.
Currently Selected:
1 Pedro 2: BTDT
Highlight
Copy
Compare
Share
Want to have your highlights saved across all your devices? Sign up or sign in
© 2024 Wycliffe Timor-Leste.
