Zaburi Sya Daud 119
119
Beati immaculati.
1Wasenga wala wakumalakika pa ndila:
Wakugenda‐genda pa torah lya Bambo.
2Wakusenga wala wakufigoha fila filasa ulungamakiso:
Wakundonda‐ndonda nu mwoyo goha.
3Wala kawili nakukita upulipuli:
Wakugenda‐genda pa ndila syake.
4Atitaukile fyakulolela kwako:
Tifilindalile munu‐munu.
5Uwi ngasiwikike nganila ndila syangu:
Nifilindalile fya kidumo fyako!
6Leka nganikosike waka lihamu:
Pala nigelewana mimbi syako syoha.
7Yanifumbule pa kugoloka mwoyo:
Pala yaniyigise malamulo gako ga kukita mali nga kwako.
8Yanifilindilile fidumulano fyako:
Uwi usanileka kilekile.
In quo corriget?
9Mpalo yawalase wuli magendo gake?
Pa kugalindaila kwa ndingo wa lilowe lyako.
10Nu mwoyo wangu goha nikulondite‐londite:
Uwi nisipuwa pa mimbi syako.
11Pa mwoyo wangu niliwikite lila ukita kumweya:
Nausi nisakukititila sambi.
12Wakulumbika ngati kihomo kyene wenga Bambo:
Ukaniyigise fidumulano fyako.
13Pa milomo yangu nipisite:
Malamulo goha ga pa ndomo pako.
14Niyangale pa ndila ya fila wafiwonisi:
Ngati bahapa pa kyuma kyoha.
15Pa fyakulolela kwako yanijowe nakape:
Yanikagagelewani magendo gako.
16Pa fya kudumula fyako yaniganise:
Nakuliyiwa lilowe lyako.
Retribue servo tuo.
17Uniyenesele wakukuhengela wako nilame:
Na yanililindilile lilowe lyako.
18Udindule miho gangu:
Nifigelawani fyakupambana fya torah yako.
19Nenga wakwihadisa pa nndima:
Usinifihila mimbi yako.
20Umi wangu gudumuka‐dumuka pa kugana:
Umo ugagana malamulo gako lukumbi lyoha.
21Wawalakalila wanyakinywinda wakulapakisa:
Wala wapuwa pa mimbi syako.
22Bilusu panani pa nenga kukochola ni lihamu:
Ndawa nifigohite fila wafiwonise.
23Manduna watameye wamjoweye nenga:
Koma wakukuhengela wako ajoweye ywakape fidumulano fyako.
24Fila wafiwonise kawili waluhungu wangu:
Wayitu awa wakupanga malango nanenga.
Adhaesit pavimento.
25Umi wangu ung’amatilana nu lufumbi:
Unilamise kwa ndingo wa lilowe lyako.
26Nawalingi ndila syangu, na wanihigite:
Ukaniyigise fidumulano fyako.
27Uniwalalise ndila ya fya kulolela kwako:
Wiwi yanijowe nakape ya fyakupambana fyako.
28Umi wangu guyengatuka pa kuniongoneka:
Ukaniyimike kawili kwa ndingo wa lilowe lyako.
29Uyipatule ndila ya mayeya na nenga:
Ukanipele torah yako kiganile.
30Niyihawile ndila ya kiyitakiso:
Fila walamwile nifiwikite wichu pa miho gangu.
31Nihumbatila pa fila wafiwonise;
Bambo, usanilekalela lihamu.
32Yanikimbalile pa ndila ya mimbi syako:
Pala yaukite mwoyo wangu wa kitando.
Legem pone.
33Unilasile, Bambo, ndila ya fidumulano fyako:
Na yanigohe mpaka kimalakile.
34Uniwalalise, na yanigohe torah lyako:
Ena, yanilindalile nu mwoyo wangu goha.
35Unipele ndila pa mseo wa mimbi syako:
Ndawa pa yila nigana.
36Ung’anamule mwoyo wangu kwa fila wafiwonise:
Nakuya kwa ugaga.
37Ugalutalise miho gangu, gasiwona mayeya:
Ukanilamise pa ndila syako.
38Yimika lila ukita kwa wakuhengela wako:
Lila liyile pa kukuyogopa kwako.
39Ukulutalise kudogoka kwangu kula ni kuyogopa:
Ndawa fya kulamula fyako finofu.
40Lola, nifiganite fila fyakulolela kwako:
Ukanilamise pa kukita malinga kwako.
Et veniat super me.
41Lukolo lwako kawili lunichile, Bambo:
Ena uyokosi wako, kwa ndingo wa lila ukita.
42Wiwi yanimhige yula wakunidoga:
Ndawa nilihuwalila lilowe lyako.
43Na usiyonja pa ndomo pangu malowe ga chakaka mpaka kimalakile:
Ndawa nilindakise malamulo gako.
44Yanilindalile torah lyako kitamile:
Kitamile pela mumu pela.
45Na yanigende‐gende pa kitando:
Ndawa nifilonda‐londa fya kulolela kwako.
46Yanijowe kawili ya fila wafiwonise palongolo pa watwa:
Ni nakukoseka lihamu.
47Na yaniganise pa mimbi syako;
Sila nisigana.
48Yanitutause kawili fisekeseke fyangu kwa mimbi syako sila nisigana:
Na yanijowe nakape fidumulano fyako.
Memor esto servi tui.
49Kumbukila lilowe lyako kwa mmbanda wako:
Pa lila wanilindikisa.
50Ili liyile manyamasiko gangu pa kuselela kwangu:
Ndawa lila ukita linilamise.
51Wa nyakinywinda wanigesite munu munu.
Koma pa torah lyako nayepite lepa.
52Nagakumbukile malamulo gako kitumbulile mumu pela, Bambo:
Ni ninyamise.
53Kuwina mwoyo kunigwilile:
Kuhuma pa wakuwipa wala walileka torah lyako:
54Fidumulano fyako fiyii kwa nenga zabur:
Pa nyumba ya kwihadisa kwangu,
55Nilikumbukile, Bambo, lihina lyako kilo:
Ni nililindalile torah lyako.
56Kila nayii nakyo:
Ndawa nafigohite fila fya kulolela kwako.
Portio mea, Domine.
57Bambo lilundu lyangu:
Nikite yanilindalile lilowe lyako.
58Nimiangite pa kyene pako ni mwoyo wangu goha:
Uniganile kwa ndingo wa gala ukite.
59Nisiwalinge ndila syangu:
Nakilawise njayo syangu kwa fila wawonise.
60Nayumbatike, nakusyela:
Nasilindalile mimbi syako.
61Mitego ya wawifu yinineamba‐neamba:
Koma pa torah yako naliyiwite lepa.
62Pagati pa kilo yaniuke kukufumbula:
Ndawa ya malamulo gako ga kukita malinga.
63Nenga wakuunganika na woha wakukuyagopa:
Na wala wafilindalila fila fya kulolela kwako.
64Nndima gumemite, Bambo, nu lukolo lwako:
Ukaniyigise fidumulano fyako.
Bonitatem fecisti.
65Ukite kinofu pamonga ni wakuhengela wako:
Bambo, kwa ndingo wa lilowe lyako.
66Uniyigise wichu kuwalalila ni kumanya:
Ndawa nisiyitakile mimbi syako.
67Palongolo nikali nakuseleseka nasowite:
Koma hino nilindalile fila ukita.
68Wannofu wenga, ni wakukita finofu:
Uniyigise fidumulano fyako.
69Wakulutila waninungalakila waka:
Nenga nu mwoyo goha yanifigohe fila fya kulolela kwako.
70Mwoyo wawe gunenepa ngati mafuta:
Koma nenga niganise pa torah lyako.
71Na hino kwa nenga kukita niselasike:
Niyigalise fidumulano fyako.
72Torah lya pa ndomo pako ni kinofu kwa nenga:
Kulutila elfu sya gold ni ndalama.
Manus tuae fecerunt me.
73Mawoko gako ganikita na ganiwikilanganila:
Uniwalalise, niyigise mimbi syako.
74Wala wakukuyogopa yawaniwone na yawahekelele:
Ndawa nilindalila lilowe lyako.
75Nimanya, Bambo, kakita malamulo gako gakukita malinga:
Na kwa kiyitakiso waniselesa.
76Chonde lukolo lwako lutame lwakuninyamasa:
Kwa ndingo wa lila wakite kwa wakuhengela wako.
77Lipyana lyako linichile, nilame:
Ndawa torah lyako waluhungu wangu.
78Wakulutila walekeleke lihamu; ndawa na mageya wanisinga:
Nenga yanijowe nakape fila fya kulolela fyako.
79Woha wakukuyogopa wanikiliukile nenga:
Na yawafimanye fila fyoha wafilasite.
80Mwoyo wangu guye wakumalakika pa fidumulano fyako:
Nawusi nasilekeleka lihamu.
Defecit anima mea.
81Umi gulalila uyokosi wako:
Koma nilindalile lilowe lyako.
82Miho gangu galilalila lila wakite:
Pala nikita, Lili yauninyamase?
83Ndawa nipatite kuya ngati lihako pa lyosi:
Koma fidumulano fyako nafiyiwite lepa.
84 Galinga magono ga wakuhengela wako:
Lili yaukite kulamula pa wala wakunikimbisa?
85Wakulutila wanihimbila mikwemo:
Wala nakuya kwa ndingo wa torah lyako.
86Syoha mimbi syako sya kiyitakiso:
Wanikimbisa kwa mayeya; ukanitangatile.
87Pafupi ngawanilalise pa nndima:
Koma nenga nafilekite lepa fya kulolela fyako.
88Kwa ndingo wa lukolo lwako unilamise:
Na yanifilindalile fila filase pandomo pako.
In œternum, Domine.
89Kitamile mumu pela, Bambo:
Lilowe lyako liwikike Kunani.
90Kwa kihogosi ni kihogosi kiyitakiso kyako:
Uguwikile ngani nndima, nu guyima.
91Kwa ndingo wa malamulo gako fiyima ngililino:
Ndawa fyoha fya kukuhengela fyako.
92Ngati nikakite lepa torah lyako waluhungu wangu:
Nganitagike pa kuselela kwangu.
93Mumu pela nakuyiwa fya kulolela fyako:
Ndawa pa fila unilamise.
94Nenga wako, uniyokole:
Ndawa nifilondite‐londite fya kulolela kwako.
95Wawifu wanikumbatila kuniyananga:
Koma fila ufilasa yanifiwalalile.
96Niweni kumala kwa kumalasika kyoha:
Kuma luwimbi lwako lwoha lwene kitando munu.
Quomodo dilexi!
97Uwi niligana torah lyako:
Musi goha nijowa nakape ya lila.
98Luwimbi lwako lunikita waluhala kulutila wakuniwipila wangu:
Ndawa niyii nago mumu pela.
99Niyii na malango manofu kulutila walimu wangu woha:
Ndawa nijowa nakape ya fyakulolela kwako.
100Niwalalila kulutila wakugogoloka:
Ndawa nifigoha fya kulolela fyako fyoha.
101Nikanise njayo syangu pa kuluta pawifu payii poha:
Nawusi nilindilile lilowe lyako.
102Napatwike lepe pa malamulo gako:
Ndawa unilasile.
103Uwi gakunyong’onya njeje syangu gala ukita:
Ena, kulutila wuchi pa ndomo pangu!
104Kuhuma pa fila fya kulolela kwako yaniwalalile:
Wiwi nifyomite na pakulute poha pa mayeya.
Lucerna pedibus meis.
105Lilowe lyako nyali kwa lwayo lwangu:
Nu lulangalila kwa msewo wangu.
106Nilapile, ni niliyimise:
Kukita yanagagohe malamulo gako ga kukita malinga.
107Niselasike mpaka kulutila:
Ukanilamise, Bambo, kwa ndingo wa lilowe lyako.
108Usiyitikile tikumpembesa, Bambo, nyambiko sya kwipimakisa sya pa ndomo pangu:
Ukaniyigise malamulo gako.
109Umi wangu pa fisekeseke fyangu nakupumula:
Koma nakuliyiwa torah lyako.
110Wawifu wanitegela ntego:
Koma nasowite lepa pa fila fya kulolela kwako.
111Niyingile lipwela lya kugawa kitamile mumu pela kya fila wafilasite:
Ndawa kya kuyangala kwa mwoyo wangu fila.
112Niyinamise mwoyo wangu kukita fidumulano fyako:
Kitamile mumu pela, mpaka pakumalakila.
Iniquos odio habui.
113Nifyoma na wala wakugawikana:
Koma torah lyako nilingana.
114Chakunifunakila ni kikopa kyangu wenga
Nilindakisa lilowe lyako.
115Muhamaye pa nenga, wawifu mwenga:
Nikasigohe mimbi sya Mlungu wangu.
116Uniyimalile kwa ndingo wa lila ukita nikalame:
Nasilekaleka lihamu pa fila nitama ni kihuwalilo mumu.
117Uniyimalile, na yanikayokoke:
Yanikafiwangalilile fidumulano fyako kitamile.
118Wawahepesa woha wakupuwa pa fidumulano fyako:
Ndawa kuchenjesa kwawe kwa mayeya.
119Uwapumulise kikotokele woha wakuwipa wa nndima ngati mafi ga kyuma:
Wiwe nifigana fila wawonise.
120Pa woga wako nyama yangu ikita nyamu nyamu:
Ni nagayagopa malamulo gako.
Feci judicium.
121Nikite lilamulo ni kukita malinga:
Usanilekalela baho kwa wala wakunisumula.
122Utame kilindo kwa wakuhengela wako kwa unnofu:
Wakulutila wasinisumula.
123Miho gangu galalite kugulonda uyokosi wako:
Na lila ukita lya kukita malinga kwako.
124Kita ni wakukuhengela wako kwa ndingo wa lukolo lwako:
Ukaniyigise fidumulano fyako.
125Wakukuhengela wako nenga, ukaniwalalise:
Nakafimanye fila walasite.
126Lukumbi kwa Bambo kukita:
Pakukita wilikita torah lyako lya wako.
127Wiwi nisigana mimbi syako:
Kulutila gold, ena kulutila gold yakuwalalika.
128Wiwi nifiwalange fyakugoloka fyoha fya kulolela kwako pa kindu kiyii kyoha:
Balabala yiyii yoha ya mayeya nifyoma nayo.
Mirabilia.
129Fila ufilasa fya kupambana:
Wiwi umi wangu ufigoha.
130Kulidindulila lilowe lyako kumulika:
Kuwawalalakisa wala nakuchenjela.
131Pa ndomo pangu nayaywile, ni kukekela:
Ndawa nasikumbatile mimbi syako.
132Unilasile kyene; ukaniganile:
Kwa ndingo wa nkuwo wako kwa wala waligana lihina lyako.
133Usiwikilenganila njayo syangu pa lila ukita:
Ni fya wako fisanilamulila.
134Unikombole pa kusumula kwa wana wa adam:
Yanikafilindalila fila fyakulolela kwako.
135Umulikise kyene kyako pa wakukuhengela wako:
Ukaniyigise fidumulano fyako.
136Miho gangu gaselela nu tumikuka twa machi:
Ndawa walindalile lepa torah lyako.
Justus es, Domine.
137Wakukita malinga wenga, Bambo:
Na gakugoloka malamulo gako.
138Ufitaukile pa kukita malinga fila wafilasite:
Ni fya kuyitakilika munu.
139Uwifu wa nyumba yangu unilasite:
Ndawa wamitumba wangu wagayiwa malowe gako.
140Lila ukita liwululwike pa mwoto muno:
Na wakukuhengela wako aligana.
141Nanchoko nenga, na wakulekaleka lihamu:
Koma fila fya kulolela kwako nifiyiwa lepe.
142Kukita malinga kwako kuyii kukita malinga kwa kitamile mumu pela.
Ni torah lyako fya chakaka.
143Kufinyikisa ni kulaga kunikolile:
Koma mimbi syako waluhungu wangu.
144Kukita malinga fila ufilasa mumu pela:
Uniwalalise, yanikalame.
Clamavi in toto corde meo.
145Nikemile ni mwoyo wangu goha, ukanihige Bambo:
Fidumulano fyako yanifigohe.
146Nikukemalile; ukaniyokole:
Yanikafilindalile fila ufilasa.
147Nalongolile pa kupepeta mpungo, ni naywawite:
Nayilindakise lilowe lyako.
148Miho gangu galongolile pakulindilana kilo:
Nijowe nakape pa lila ukita.
149Uyiyufwanile njwawila yangu kwa ndingo wa lukolo lwako:
Kwa ndingo wa malamulo gako, Bambo, ukanilamise.
150Wahicha pafupi wakugakisa maholo ga waka:
Wayii patali ni torah lyako.
151Wa pafupi wenga, Bambo:
Ni mimbi syako syoha sya chakaka.
152Mwandi namanya kuhuma pa fila ufilasa:
Kukita ufiyimise kitamile mumu pela.
Vide humilitatem.
153Lola kuselela kwangu, ukanifuwule:
Ndawa niyiwa lepe torah lyako.
154Ukokose mihala yangu, ukanikombole:
Kwa lila ukita ukanilamise.
155Uyokosi uyii patali na wakuwipa:
Ndawa wafilonda‐londa lepe fidumulano fyako.
156Lukolo lwako lwingi, Bambo:
Kwa ndingo wa malamulo gako ukanilamise.
157Wingi wanikimbisa na wamitumba wangu:
Koma pa fila wafilasite nibenama lepa.
158Nawaweni wakukongesa, ni nayiwipise nawo:
Ndawa wafilindalile lepa fila ukita.
159Lola umu nifiganile fila fya kulolela kwako:
Bambo, ukanilamise kwa ndingo wa lukolo lwako.
160Kuwalangika kwa mfilamile kwa lilowe lyako fya chakaka:
Ni lilamulo liyii lyako lya kukita malinga kwako kitamile mumu pela.
Principes persecuti sunt.
161Wanduna wanikimbiseye waka:
Koma mwoyo wangu guwagaya pa malowe gako.
162Niyangala bahapa pa lila ukita:
Ngati wakafikolela fya kufufula fingi.
163Nifyoma ni cha mayeya ni kukiyeyaukila:
Koma torah lyako niligana.
164Kahano na kawili nikulumba ligono ni ligono:
Bahapa pa fya kulamula fya kukita malinga kwako.
165Kindamba kikulungu wayii nakyo wakuligana torah lyako:
Wayii lepe ni kya kukuwisa.
166Niteme ni kihuwalilo pa uyokosi wako:
Ni nisikita mimbi syako.
167Umi wangu gufilindalile fila ulasa:
Nifigana muno.
168Nilindalile fya kulolela kwako na fila ulasa:
Ndawa ndila syangu syoha palongolo pako.
Appropinquet deprecatio.
169Kululuta kwangu kuhiche papipe pa kyene pako, Bambo:
Ukaniwalalakise kwa ndingo wa lilowe lyako.
170Kwipembesa kwangu kuhiche pa kyene pako:
Ukanifuule kwa ndingo wa lila ukita.
171Milomo yangu yilapusa malumbo:
Ndawa uniyigisa fidumulano fyako.
172Lumilo lwangu luyimbile lila ukita:
Ndawa syoha mimbi syako kukita malinga.
173Kitamaye baho kiwoko kyako kunitangatila:
Ndawa nifihawile fya kulolela kwako.
174Niguhanite uyokosi wako, Bambo:
Ni torah lyako waluhungu wangu.
175Umi wangu gulame, yagukakulumbe:
Na malamulo gako ganitangatile.
176Nisowite ngati limbelele lya kutagika:
Mulonde‐londe wakukuhengela wako; ndawa nakusiyiwa mimbi syako.
Currently Selected:
Zaburi Sya Daud 119: MGSPSA
Highlight
Copy
Compare
Share
Want to have your highlights saved across all your devices? Sign up or sign in
First published in 1913, by the Universities' Mission to Central Africa Mission Press
