Zaburi Sya Daud 107
107
Cofitemini Domino.
1Mumfumbulaye Bambo: ndawa unofu:
Ndawa lukolo lwake kitamile mumu pela.
2Wala wakukomoleka wa Bambo ngati yaya wakitaa wiwi:
Wala wawakombola ngati yaya wawe pa kiwoko kya wa mitumba.
3Na awaunganise kuhuma pa milima:
Kuhuma ku mpungo ni ku chombe, kuhuma ku lulinga ni ku luchi.
4Wosowite pa lipululu pa ndila ya kikayukile:
Walikolile lepa likaya lya kutama wandu.
5Wene njala na wene nywita:
Umi wawe wasindwike pa wombe.
6Na wakugile Bambo pa kufinyikisa pawe:
Na awafuwile pa fyakufingikisila fyawe.
7Na awagendesa mundila kawili pa ndila yakugoloka:
Wabite kilikaya lyakutama wandu.
8Uwi ngawamfumbwile Bambo kwa lukolo lwake:
Na kwa fyakupambana fyake kwa wana wa adam.
9Ndawa atupalisa umi wamfilamila:
Na agumemesa umi wa njala ni finofu.
10Nawo wakutama pasi pa lwisi na pa kifwili kya kifwa:
Wakukungika mmigoyi pa kuhumbusika ni kyuma.
11Ndawa gakanile gala akita Mlungu:
Na wakuhepite kupanga malango kwa Yula wa Panani pene.
12Na awayinamisa mwoyo na matata:
Wayikuwise, na pawaka wakutangatila.
13Na wankugile Bambo pakufinyika pawe:
Na awafuwile pa fyakufinyikisa fyawe.
14Awawusite pa lwisi ni kifwili kya nyifwa:
Na ayidumwile migoyi yawe yakukungila.
15Uwi ngawafumbwile Bambo kwa lukolo lwake:
Na kwa fyakupambana fyake kwa wana wa adam!
16Ndawa wagadumula matanga ga nkuwa:
Na wadumula ngani madindilo ga kyuma.
17Wakuhimuka ndawa ya ndila ya fyakuhoka fyawe:
Ni ndawa ya upulipuli wawe, wakuseleleka.
18Umi wawe ukiwipila chakulya kyoha:
Na awandamila mpaka pa matanga ga kifwa.
19Na wankugila Bambo pakufinyika pawe:
Na awayokwile pa fyakufinyikisila fyawe.
20Atumisa lilowe lyake naawalamisa:
Na awayokola pa kuyanangika kwawe.
21Uwi ngawamfumbwile Bambo kwa lukolo lwake:
Na kwa fyakupambana fyake kwa wana wa adam!
22Na wakadumule nyambiko syakudumula syakusengusa:
Wakafiwalange fila akita ni kululuta.
23Wala waselela ku nyanja pa yoombo:
Wala wakita fyakutumika pa machi mingi:
24Wawa wawona fila akita Bambo:
Na fyakupambana fyake pa machi gakunyoleka.
25Nakite, nisisamusa mbepo ya limbupulu:
Na gasipinda mbilinga syake.
26Wakukwela Kunani, waselalela ku madimba:
Umi wawe uyengatuka pa kiwifu.
27Wakita syungu, na aponangana magulu ngati wakugala:
Nu luhala lwawe lyoha lumilika.
28Na wankugila Bambo pakufinyikisa pawe:
Na pa fila fyakufinyikisila awausa.
29Ang’anamwile limbupulu kutama wata:
Ni mbilingo syake sitanda.
30Na ahekalela ndawa asindamile:
Wiwi awapelekesa pakukingila pala walonda.
31Uwi ngawamfumbwile Bambo kwa lukolo lwake:
Na fyakupambana fyake kwa wana wa adam!
32Wakannyanyamule kawili pa lipuga lya nnsafi:
Wakandumbe pa kutamila pasi wakulu‐wakulu.
33Ayisandusa mikuka kuya lipululu:
Na pa kupitila machi kuya pene luyumilo.
34Ndima wa fipambiko kuya pene mwinyo:
Kuhuma pa fiwifu fya wala watama mumu pasi.
35Alisandusa lipululu kuya liliwa:
Nu nndima wa lulanga kuya pa kupitila machi.
36Bahapa awatamisa wene njala:
Na awikila nganila likaya lyakutama wandu.
37Na amicha mbeyu pa nngunda, naapanda migunda ya mbelesa:
Na akita fipambiko fyakupindalila.
38Awapela kawili kihomo, naayolokesa munu‐munu:
Ni nakuleka fyakukwawa fyawe kulemuka.
39Na alemuka kawili, naayinama:
Kwa kusiwalakisa, mpingusi, ni kuwipa.
40Apungulila lihamu panani pa wakamba:
Na awasowesa pakutimbilikanya pa kusatangana ndila.
41Koma ankwelesa nng’aju pakukwelela kuyokoka pa kuseleseka:
Na ansandusa kuya misafi ngati mawigi ga mambelele.
42Wakugoloka pa mwoyo yaakiwone, na yahekelele:
Ni chakubimbitasa kyoha yakidinde pa ndomo.
43Ayii ywoha mwene luhala yaafilindalile ifi:
Ni yawawalalile wichu lukolo lwa Bambo.
Currently Selected:
Zaburi Sya Daud 107: MGSPSA
Highlight
Copy
Compare
Share
Want to have your highlights saved across all your devices? Sign up or sign in
First published in 1913, by the Universities' Mission to Central Africa Mission Press
