ປະຖົມມະການ 35

ຢາໂຄບກັບຄືນໄປເບັດເອນ

1ຫລັງຈາກນັ້ນ ພຣະເຈົ້າໄດ້ກ່າວແກ່ຢາໂຄບວ່າ, “ຈົ່ງຂຶ້ນໄປຍັງເບັດເອນ ແລ້ວຕັ້ງຖິ່ນຖານຢູ່ທີ່ນັ້ນ ແລະ ຈົ່ງສ້າງແທ່ນບູຊາຂຶ້ນທີ່ນັ້ນຖວາຍແກ່ພຣະເຈົ້າ ຜູ້ໄດ້ປາກົດແກ່ເຈົ້າເມື່ອເຈົ້າປົບໜີຈາກເອຊາວອ້າຍຂອງເຈົ້າ”.

2ດັ່ງນັ້ນ ຢາໂຄບຈຶ່ງໄດ້ເວົ້າກັບຄອບຄົວຂອງລາວ ແລະ ທຸກຄົນທີ່ຢູ່ກັບລາວວ່າ, “ຈົ່ງກຳຈັດບັນດາພະຂອງຊາວຕ່າງດ້າວທີ່ພວກເຈົ້າມີຢູ່ກັບພວກເຈົ້າ ແລະ ຊຳລະພວກເຈົ້າເອງໃຫ້ບໍລິສຸດ ແລະ ປ່ຽນເຄື່ອງນຸ່ງຂອງພວກເຈົ້າ. 3ແລ້ວຈົ່ງມາ ໃຫ້ພວກເຮົາຂຶ້ນໄປທີ່ເບັດເອນ, ບ່ອນທີ່ເຮົາຈະສ້າງແທ່ນບູຊາຖວາຍແກ່ພຣະເຈົ້າ ຜູ້ໄດ້ຕອບຄຳອະທິຖານຂອງເຮົາໃນວັນທີ່ເຮົາມີຄວາມໂສກເສົ້າ ແລະ ຜູ້ໄດ້ຢູ່ກັບເຮົາໃນທຸກບ່ອນທີ່ເຮົາໄປ”. 4ດັ່ງນັ້ນ ພວກເຂົາຈຶ່ງໄດ້ເອົາພະຂອງຊາວຕ່າງດ້າວທັງໝົດທີ່ພວກເຂົາມີຢູ່ ແລະ ປົດຕຸ້ມຫູຂອງພວກເຂົາມາມອບໃຫ້ຢາໂຄບ ແລະ ຢາໂຄບກໍຝັງເຄື່ອງເຫລົ່ານັ້ນໄວ້ຢູ່ກ້ອງຕົ້ນໂອກທີ່ຊີເຄມ. 5ຫລັງຈາກນັ້ນ ພວກເຂົາຈຶ່ງໄດ້ອອກເດີນທາງ ແລະ ຊາວເມືອງທີ່ຢູ່ອ້ອມຂ້າງພວກເຂົາກໍເກີດຢ້ານກົວພຣະເຈົ້າ ດັ່ງນັ້ນ ຈຶ່ງບໍ່ມີຜູ້ໃດໄລ່ຕາມພວກເຂົາໄປ.

6ຢາໂຄບ ແລະ ປະຊາຊົນທັງໝົດທີ່ຮ່ວມເດີນທາງກັບລາວກໍໄດ້ມາເຖິງເມືອງລູເຊ (ຄືເບັດເອນ) ໃນດິນແດນການາອານ. 7ຢູ່ທີ່ນັ້ນລາວໄດ້ສ້າງແທ່ນບູຊາຂຶ້ນ ແລະ ເອີ້ນບ່ອນນັ້ນວ່າເອນເບັດເອນ,#35:7 ແປວ່າ ພຣະເຈົ້າແຫ່ງເບັດເອນ ເພາະວ່າພຣະເຈົ້າໄດ້ເປີດເຜີຍພຣະອົງເອງແກ່ລາວຢູ່ທີ່ນັ້ນເມື່ອເວລາທີ່ລາວກຳລັງໜີຈາກອ້າຍຂອງລາວ.

8ບັດນີ້ ເດໂບຣາ ເອື້ອຍລ້ຽງຂອງເຣເບກາ ກໍໄດ້ຕາຍໄປ ແລະ ໄດ້ຖືກຝັງໄວ້ຢູ່ກ້ອງຕົ້ນໂອກທີ່ຢູ່ນອກເມືອງເບັດເອນ. ດັ່ງນັ້ນ ທີ່ນັ້ນຈຶ່ງໄດ້ຊື່ວ່າອານໂລນບາຄູດ.#35:8 ແປວ່າ ຕົ້ນໄມ້ໃຫຍ່ແຫ່ງການຮ້ອງໄຫ້

9ຫລັງຈາກຢາໂຄບໄດ້ກັບມາຈາກປັດດານອາຣາມ,#35:9 ນັ້ນແມ່ນ ຢູ່ທາງຕາເວັນຕົກສ່ຽງເໜືອຂອງເມໂຊໂປຕາເມຍ; ເໝືອນກັນ ໃນ ຂໍ້ 26 ພຣະເຈົ້າໄດ້ປາກົດແກ່ລາວອີກ ແລະ ໄດ້ອວຍພອນລາວ. 10ພຣະເຈົ້າໄດ້ກ່າວແກ່ລາວວ່າ, “ຊື່ຂອງເຈົ້າແມ່ນຢາໂຄບ,#35:10 ອາດມີຄວາມໝາຍວ່າ ລາວຈັບສົ້ນຕີນ (ເປັນສຳນວນໃນພາສາເຮັບເຣີທີ່ແປວ່າ, ລາວຫລອກລວງ) ແຕ່ເຈົ້າຈະບໍ່ຖືກເອີ້ນວ່າຢາໂຄບອີກຕໍ່ໄປ; ຊື່ຂອງເຈົ້າຈະຖືກເອີ້ນວ່າອິດສະຣາເອນ,#35:10 ອາດມີຄວາມໝາຍວ່າ ລາວຕໍ່ສູ້ກັບພຣະເຈົ້າ” ດັ່ງນັ້ນ ພຣະອົງຈຶ່ງໄດ້ຕັ້ງຊື່ໃຫ້ລາວວ່າອິດສະຣາເອນ.

11ແລະ ພຣະເຈົ້າກໍໄດ້ກ່າວແກ່ລາວວ່າ, “ເຮົາເປັນພຣະເຈົ້າຜູ້ມີລິດອຳນາດຍິ່ງໃຫຍ່;#35:11 ພາສາເຮັບເຣີວ່າ ແອວຊາດາຍ ຈົ່ງມີລູກຫລານຈຳນວນຫລວງຫລາຍ ແລະ ເພີ່ມທະວີຈຳນວນຂຶ້ນ. ຊົນຊາດ ແລະ ຊຸມຊົນຂອງຫລາຍຊົນຊາດຈະເກີດມາຈາກເຈົ້າ ແລະ ກະສັດທັງຫລາຍຈະມາຈາກເຊື້ອສາຍຂອງເຈົ້າ. 12ດິນແດນທີ່ເຮົາໄດ້ມອບໃຫ້ແກ່ອັບຣາຮາມ ແລະ ອີຊາກນັ້ນ ເຮົາກໍມອບໃຫ້ແກ່ເຈົ້າເໝືອນກັນ ແລະ ເຮົາກໍຈະມອບດິນແດນນີ້ໃຫ້ແກ່ເຊື້ອສາຍຂອງເຈົ້າທີ່ຈະມາພາຍຫລັງດ້ວຍ”. 13ແລ້ວພຣະເຈົ້າກໍໄດ້ຂຶ້ນໄປຈາກລາວຄືຈາກບ່ອນທີ່ພຣະອົງໄດ້ກ່າວກັບລາວນັ້ນ.

14ຢາໂຄບຈຶ່ງຕັ້ງເສົາຫີນຂຶ້ນໜຶ່ງເສົາໃສ່ບ່ອນທີ່ພຣະເຈົ້າໄດ້ກ່າວກັບລາວ ແລະ ລາວກໍໄດ້ເທເຄື່ອງດື່ມຖວາຍບູຊາລົງເທິງເສົານັ້ນ; ລາວຍັງໄດ້ເທນ້ຳມັນລົງເທິງເສົານັ້ນເໝືອນກັນ. 15ຢາໂຄບໄດ້ເອີ້ນບ່ອນທີ່ພຣະເຈົ້າໄດ້ກ່າວກັບລາວນັ້ນວ່າເບັດເອນ.#35:15 ແປວ່າ ເຮືອນຂອງພຣະເຈົ້າ

ການຕາຍຂອງນາງຣາເຊັນ ແລະ ອີຊາກ

(1ຂຄ 2:1-2)

16ຫລັງຈາກນັ້ນ ພວກເຂົາກໍໄດ້ຍົກຍ້າຍອອກຈາກເບັດເອນ. ໃນຂະນະທີ່ພວກເຂົາຍັງຢູ່ໄລຍະຫ່າງໄກຈາກເອຟຣາທາຢູ່, ນາງຣາເຊັນກໍເລີ່ມເຈັບທ້ອງເກີດລູກ ແລະ ນາງໄດ້ເຈັບປວດຫລາຍທີ່ສຸດ. 17ແລະ ໃນຂະນະທີ່ນາງມີຄວາມເຈັບປວດຫລາຍທີ່ສຸດໃນການເຈັບທ້ອງເກີດລູກຢູ່ນັ້ນ, ໝໍຕຳແຍກໍໄດ້ເວົ້າກັບນາງວ່າ, “ຢ່າຢ້ານເລີຍ, ເພາະເຈົ້າໄດ້ລູກຊາຍອີກຄົນໜຶ່ງ”. 18ໃນຂະນະທີ່ນາງໃກ້ຈະໝົດລົມຫາຍໃຈ ຄືນາງກຳລັງຈະຕາຍນັ້ນ ນາງກໍໄດ້ຕັ້ງຊື່ໃຫ້ລູກຊາຍຂອງນາງວ່າເບັນໂອນີ.#35:18 ມີຄວາມໝາຍວ່າ ລູກຊາຍແຫ່ງຄວາມເຈັບປວດຂອງເຮົາ ແຕ່ພໍ່ຂອງລາວໄດ້ຕັ້ງຊື່ໃຫ້ລາວວ່າເບັນຢາມິນ.#35:18 ມີຄວາມໝາຍວ່າ ລູກຊາຍແຫ່ງມືຂວາຂອງເຮົາ

19ດັ່ງນັ້ນ ນາງຣາເຊັນກໍໄດ້ຕາຍໄປ ແລະ ໄດ້ຖືກຝັງໄວ້ຢູ່ແຄມທາງທີ່ຈະໄປເອຟຣາທາ (ຄືເບັດເລເຮັມ). 20ຢາໂຄບໄດ້ຕັ້ງເສົາໃສ່ເທິງຂຸມຝັງສົບຂອງນາງເສົາໜຶ່ງ ແລະ ຈົນເຖິງທຸກວັນນີ້ເສົານັ້ນຈຶ່ງເປັນເຄື່ອງໝາຍຂອງຂຸມຝັງສົບຂອງນາງຣາເຊັນ.

21ອິດສະຣາເອນໄດ້ຍົກຍ້າຍອອກໄປອີກ ແລະ ໄດ້ຕັ້ງເຕັນຂອງລາວຂຶ້ນຢູ່ກາຍຈາກມິກດັນເອເດໄປ. 22ໃນຂະນະທີ່ອິດສະຣາເອນຍັງອາໄສຢູ່ໃນທ້ອງຖິ່ນນັ້ນ, ຣູເບັນກໍເຂົ້າໄປໃນ ແລະ ຮ່ວມຫລັບນອນກັບນາງບິນຮາ ຜູ້ເປັນເມຍນ້ອຍຂອງພໍ່ລາວ ແລະ ອິດສະຣາເອນກໍໄດ້ຍິນເຖິງເລື່ອງນີ້.

ຢາໂຄບມີລູກຊາຍສິບສອງຄົນຄື:

23ລູກຊາຍຂອງເລອາມີຄື:

ຣູເບັນລູກຊາຍກົກຂອງຢາໂຄບ,

ຊີເມໂອນ, ເລວີ, ຢູດາ, ອິດຊາຄາ ແລະ ເຊບູໂລນ.

24ລູກຊາຍຂອງນາງຣາເຊັນມີຄື:

ໂຢເຊັບ ແລະ ເບັນຢາມິນ.

25ລູກຊາຍຂອງນາງບິນຮາຄົນຮັບໃຊ້ຂອງນາງຣາເຊັນມີຄື:

ດານ ແລະ ເນບທາລີ.

26ລູກຊາຍຂອງນາງຊີລະປາຄົນຮັບໃຊ້ຂອງນາງເລອາມີຄື:

ກາດ ແລະ ອາເຊ.

ທັງໝົດນີ້ຄືບັນດາລູກຊາຍຂອງຢາໂຄບ ທີ່ໄດ້ເກີດໃຫ້ລາວໃນປັດດານອາຣາມ.

27ຢາໂຄບໄດ້ກັບມາທີ່ເຮືອນອີຊາກພໍ່ຂອງລາວຢູ່ທີ່ມຳເຣ ເຊິ່ງຢູ່ໃກ້ກິຣິອາດອາກບາ (ຄືເມືອງເຮັບໂຣນ), ບ່ອນທີ່ອັບຣາຮາມ ແລະ ອີຊາກໄດ້ອາໄສຢູ່. 28ອີຊາກມີຊີວິດຢູ່ 180 ປີ. 29ແລ້ວອີຊາກກໍໄດ້ໝົດລົມຫາຍໃຈ ແລະ ໄດ້ຕາຍໄປ ແລ້ວກໍໄດ້ຖືກຮວບຮວມໄວ້ກັບຄົນຂອງເພິ່ນ, ເພິ່ນຕາຍໄປເມື່ອເຖົ້າແກ່ຫລາຍແລ້ວ. ແລ້ວເອຊາວກັບຢາໂຄບຜູ້ເປັນລູກຊາຍກໍໄດ້ຝັງສົບຂອງເພິ່ນ.

Currently Selected:

ປະຖົມມະການ 35: LCV

Highlight

Copy