Yiib 13

1 # Kal 3:13; Luk 2:23 Ka Zugsɔb yɛl Moses ye, 2“Maalim bikpɛŋ wʋsa nyain tisim. Biribiŋ kpɛŋ wʋsa anɛ mam bʋn, o ya'a anɛ nid bɛɛ bʋnkɔnbʋgɔ.”

Bodobodo linɛ pʋ gɛndig danbin la Malʋŋ

3Ka Moses yɛl nidib la ye, “Tiɛnmi dabiskaŋa nwa' yɛla, dabiskanɛ ka Zugsɔb la da mɔri ya yi Egipt teŋin na la, zin'ikanɛ ka ya da an yammis la. O mɔri ya yina nɛ o paŋ tita'ar. Mid ka ya ɔnb bodobodo kanɛ mɔr danbin dabiskan la. 4Zina linɛ an Abib nwadig la ni ka ya yit kpɛla. 5Zugsɔb la ya'a mɔri ya keŋ teŋ kanɛ ka Keenan dim nɛ Hitti dim nɛ Amor dim nɛ Perizi dim nɛ Hivi dim nɛ Jebus dim bɛ la, teŋ kanɛ pʋbid bin'isim nɛ siind ka o da kaanb ye o na tisi ya yaanam la, yanam maalim malʋŋ di'em kaŋa nwadkaŋa ni. 6Ka lin yi zina ti paae daba ayɔpɔi, ɔmmi bodobodo dinɛ pʋ mɔr danbinnɛ, ka daba ayɔpɔi la daar, ya na maal malʋŋʋ tis Zugsɔb la. 7Ɔmmi bodobodo dinɛ ka danbin kae daba ayɔpɔi la wʋsa, da kɛ ka danbin bɛ disi'a ni baa bi'ela, bɛɛ li kpi'e ya teŋ laa. 8Daakan la yanam yɛlimi ya biis ye, ‘M maal nwa' nɛ ka li pa'al Zugsɔb la da tʋm si'em tis mam, man da yi Egipt na la.’ 9Ka malʋŋ di'em kaŋa na an wʋʋ zanbinnɛ bɛɛ fʋ nu'ugin, ka lɛm bɛɛ fʋ gbɛ'ogʋn, ka Zugsɔb nɔzi'ela la na bɛɛ fʋ nɔŋgbanin. Ka li pa'al ye Zugsɔb la mɔri ya yi Egipt na nɛ o mɛŋ paŋ. 10Li sʋm ye fʋ tɛnr malʋŋ di'em kaŋa yʋʋm woo, li saŋa ya'a paae.”

Bikpɛɛmnam yɛla ya'as

11Ka o lɛn yɛl ye, “Zugsɔb la ya'a mɔri ya keŋ Keenan dim teŋin ka tisi ya teŋ la, wʋʋ on da kaanbi tisi ya yaanam si'em la, 12#Yib 34:19-20; Luk 2:23 ya na nɔk bʋnkɔnbkanɛ du'a yiiga tis o. Bʋnkɔnbkanɛ wʋsa du'a bʋndaug yiiga la anɛ Zugsɔb bʋn. 13Ya bʋŋ ya'a dɛŋin du'a bʋndibig, yanam tiakimi nɛ pɛribigi tis Zugsɔb la. Amaa ya ya'a pʋ lɛm bɔɔd ye ya tiakɛ, ya tun'e kɔ'ɔg bʋŋ la niŋgɔɔnri kʋ. Ala mɛn ka ya na tiaki ya bikpɛɛmnam wʋsa. 14Ka bɛog sa, ya biis ya'a bu'osi ya ye, ‘Nwa' an bɔ?’ Yanam yɛlimi ba ye, ‘Tinamɛ da an yammis Egipt teŋin la, ka Zugsɔb la da faaɛn ti yi nɛ o mɛŋ paŋ tita'ar. 15Na'ab Faaro da maal zukpi'euŋʋ zan'as ye ti kʋ yi la, Zugsɔb la da kʋ Egipt nidib nɛ bʋnkɔnbid bikpɛɛmnam wʋsa. Dinɛ kɛ ka ti mɔr si'el wʋsa bikpɛɛm maan maana tisid Zugsɔb la, amaa di ya'a an ninsaal, ti nɔkid nɛ pɛ'ogʋ tiakid. 16Lina mɛ na an zanbinnɛ bɛɛ ya nu'usin nɛ ya gbɛ'ɛdin. Li anɛ linɛ pa'an ye li anɛ Zugsɔb la mɔri ti yi Egipt na nɛ o mɛŋ paŋ.’”

Saŋgbauŋ nɛ bugum la yɛla

17Ka Na'ab Faaro da bas nidib la ka ba keŋ la, Wina'am da pʋ mɔri ba dɔl suokanɛ dɔl Filistia dim teŋin la, la'an nɛ lin da pʋ lal Egipt nɛ Keenan teŋ la bɔzugɔ Wina'am da yɛl ye, “Nidib nwa' ya'a tʋ'ʋs zaba, ba na tiaki ba pʋtɛn'ɛr ka lɛb Egipt.” 18Ka Wina'am nɔki ba dɔl mɔɔgin ken Atɛuk Zɛn'ug la baba. Ka Israel dim la bas Egipt ka dɔl taaba ken dɔɔg-dɔɔg. 19#Pin 50:25; Jos 24:32 Ka Moses nɔk Josef kɔnba, bɔzugɔ Josef da yɛl Israel dim ye, “Pɔɔm tisinim ye Wina'am ya'a mɔri yaa lɛbi ya teŋin la ya na mɔri m kɔnba la keŋ.” 20Ba da yi Sukot teŋin keŋ zin'in Etam teŋ kanɛ pʋ lal nɛ mɔɔgin la. 21Zugsɔb la bɛɛ ba tuon wʋʋ saŋgbauŋ nintaŋ ka lɛn nwɛnɛ bugum yʋ'ʋŋʋ nie tisi ba. Dinɛ na kɛ ka ba ken yʋ'ʋŋ nɛ nintaŋ wʋsa. 22Ka saŋgbauŋ la zi'e nidib la tuon nintaŋ, ka bugum la mɛ zi'e yʋ'ʋŋ ka pʋ vurigida.

Currently Selected:

Yiib 13: kus_gh

Highlight

Copy

Compare