Yiib 14
14
Atɛuk Zɛn'ug lɔ'ɔŋir yɛla
1Ka Zugsɔb yɛl Moses ye, 2“Yɛlim nidib Israel dim la ye ba dɔlli kpa' Pihahirot nɛ Migdol dinɛ kpi'e nɛ Atɛuk la. Zin'inimi Baal-Zafon nya'aŋ, atɛuk la gʋʋr. 3Ka Na'ab Faaro na tɛn'ɛs ye, ‘Israel dim la bɔdignɛ. O na ye mɔɔg nɛ Atɛuk la gu' ba nɛ.’ 4Ka m na kɛ ka Faaro sʋnf digilim ka o kadi ya bugir. Mam gban'anɛ nwa' ye m paam girima Faaro nɛ o soogianam la san'an, ka li nya'aŋ ka Egipt dim na baŋ ye mam an Zugsɔb la.” Ka Israel dim la da niŋ ala.
5Ka labaari paae Egipt na'ab la ye Israel dim la kʋ lɛn lɛb Egipt na la, ka Na'ab la nɛ o kpɛɛmnam tiaki ba pʋtɛn'ɛr ka yɛl ye, “Gɔsima, bɔɔ lɛɛ kɛ ka ti bas Israel dim la ka ba keŋɛ? Ba wʋsa yii gaad ka kʋ lɛn aan ti yammisɛ!” 6Ka o lɔɔ o widi ka yɛl o soogianam ka ba dɔl o. 7O da nɔk nɛ zaba widi tɛreko sʋma la kɔbisyuobʋ (600), nɛ zaba tɛrekonam banɛ kpɛlim Egipt teŋin la wʋsa nɛ ba zaba kpɛɛmnam. 8Ka Zugsɔb digilim Egipt Na'ab Faaro sʋnf ka o kad Israel dim banɛ da yi nɛ sʋnkpi'euŋ la. 9Ka Egipt dim la nɛ ba Na'ab la nɛ widi nɛ tɛrekonam la, nɛ wiedban'adib nɛ soogianam la wʋsa kad Israel dim hali ti paae ba ka ba bɛ atɛuk dinɛ kpi'e Pihahirot, Baal-Zafon nya'aŋ la.
10Ka Na'ab Faaro da paadi ba la, Israel dim la da nyɛ ka Egipt soogianam la dɔlli ba nya'aŋ ka dabiem kpɛn' ba ka ba kaasi tis Zugsɔb la 11ka yɛl Moses ye, “Li anɛ yaadi ka' Egipt la zug ka fʋ mɔri ti na ye ti kpi mɔɔgin kpɛla, bɛɛ? Bɔ kimm kɛ ka fʋ mɔri ti yi Egipt na? 12Ti daa pʋ yɛlif ye fʋ basimi ti Egipt teŋin ka ti tʋmmi tisidi baa? Ti ya'a tʋmmi tisidi ba, li naan kʋ sɔn'ɔn tinamɛ ye ti kpi mɔɔgin nwaa?” 13Ka Moses yɛli ba ye, “Da zɔti dabiem! Zi'enimi santir ka nyɛ Zugsɔb la na yisi ya si'em. Yanamɛ nyɛt Egipt dim nwa' si'em zina la, ya kʋ lɛn nyɛɛ ba ya'asɛ. 14Zugsɔb na zabi tisi ya, kʋdim zi'enimi santir!”
15Ka Zugsɔb yɛl Moses ye, “Bɔ ka fʋ kaasidi ziinnɛ ma? Yɛlim Israel dim la ye ba kem tuon! 16Ʋkimi fʋ dansaar la agɔl ka tiesi kpa' atɛuk la ka ku'om la na pʋdig, ka Israel dim la na dɔl teŋ kpi'emisi gaad. 17Ka m na digilim Egipt dim la sʋnya ka ba dɔlli ya ka m paam girima yi Faaro nɛ o wiedban'adib nɛ soogianam la san'an. 18Ka m ya'a nyaŋ Faaro nɛ o soogianam la, Egipt dim la na baŋ ye manɛ sid an Zugsɔb la, di na kɛ ka m paam girima ka li yinɛ Faaro nɛ o soogianam la san'an.”
19Ka Wina'am maliak onɛ daa bɛ Israel dim tuon la daa lɛb nya'aŋ; ka saŋgbauŋ la mɛ lɛb nya'aŋi zi'en, 20ka bɛ Egipt soogianam nɛ Israel dim la teŋsʋk. Ka yʋ'ʋŋ kan la wʋsa zin'ig yinne da anɛ lik ka zin'ig yinne an nɛɛsim ka sɔ' pʋ nyaŋi paae o tiraana.
21Ka Moses da tiɛn o nu'ugʋ kpa' atɛuk la. Ka yʋ'ʋŋ kan la wʋsa ka Zugsɔb buak ku'om la nɛ sisi'etita'ar kanɛ yi ya-nya'aŋ na, ka zin'ikanɛ ka ku'om la buak la lieb kpi'emis. 22#2Ko 10:1-2; Hib 11:29 Ka Israel dim la nɔɔ atɛuk la pʋʋgin teŋ kpi'emisi gaad, ka ku'om la mɛ zaŋguom datiuŋ nɛ dagɔbʋg. 23Ka Egipt dim la dɔl, ka Na'ab Faaro widi nɛ tɛrekonam nɛ wiedban'adib la wʋsa dɔlli sigi atɛuk la ni. 24Ka bɛkɛung ka Zugsɔb da bɛ bugumin nɛ saŋgbauŋin gɔsid Egipt soogianam la, ka kɛ ka dabietita'ar kpɛn' ba ka ba pin'ili zɔt yaaŋ-yaaŋ. 25O daa kɛ ka ba tɛrekonam la nɔba fir ka ba pʋ tun'e kenna. Ka Egipt dim la yɛl ye, “Kɛlli ka ti zɔ ka bas Israel dim la ka Zugsɔb la zabidnɛ tisidi ba!”
26Ka Zugsɔb la yɛl Moses ye, “Tiɛnmi fʋ nu'ugʋ kpa' atɛuk la ka ku'om la lɛb na di Egipt dim la nɛ ba tɛrekonam nɛ ba wiedban'adib la wʋsa.” 27Ka Moses tiesi o nu'ugʋ kpa' atɛuk la, ka bɛogʋ ti yɔe nier la ka ku'om la lɛbi li naŋnaŋin, ka Egipt dim la mɔɔd ye ba zɔɔ yi la, Zugsɔb la tusi ba lɛbis ku'omin la. 28Ka ku'om la lɛb na di tɛrekonam la nɛ wiedban'adib la hali nɛ Faaro soogianam banɛ dɔlli sig atɛukʋn la wʋsa, baa ba nid yinne pʋ kpɛlim. 29Amaa ka Israel dim la on lɛɛ keŋ teŋ kpi'emisi yi atɛukʋn la na, ka ku'om la maal zaŋguommi ba datiuŋ nɛ ba dagɔbʋg.
30Ala ka Zugsɔb la da faaɛn Israel dim la yis Egipt dim nu'usin; ka ba nyɛ ka Egipt dim la kpii digi dig atɛuk la gbɛog. 31Ka Israel dim la da nyɛ Zugsɔbi zaŋ o paŋtita'ari nyaŋ Egipt dim si'em la ka niŋ o yadda ka mɛ niŋ Moses yadda.
Currently Selected:
Yiib 14: kus_gh
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
