1 Peturu 1
1
Kuvumenena
1Yame no Peturu, kanganda ka Yesu Krisitu.
Naa ñorera anua Nyambi o ku hanguriwa awa na panthzaana no ku kekara enda mu Pontasi, Galatia, Kapadosia, Asia no mu Bitinia. 2Nyambi Tata wa mi dimukire kare no ku mi hangura, Mupepo wenthzi na u mi tende owakenu ci nga mu yuvere Yesu Krisitu no ku yoiwa konyinga wenthzi.#1.2 Diya 24.1-11, “ku shamawera onyinga.” Nyambi a mi pe kongi thsihemo no thsiyaro.
Okurupero o mwoyo o diyere
3Ku shangariwe Nyambi, Tata wa Fumu wetu Yesu Krisitu! Ko ñeke thzenthzi thzothzikuru na twerekiwa ope, inene Nyambi wa pindurire Yesu Krisitu kwafu. Pano honi twaa yoya kokurupero oukuru, 4karo mu di nepiwa i shoro, nji kwipa nji ku vunduka, eyi i na turekiwera amwe mu wiru. 5Ko thsitawo thsenu, Nyambi aa mi nyunga kokoro wenthzi shime ku ka kuma apa mwa ku tambwera kuyoyithsiwa oku ku na tatereriwa ku hokoriwa mu diyuwa dyo mahurerero.
6Mweyi yoihe mu nyanyuke, shaanga ikare ci mwaa roera ku nyandithsiwa mu thsikati thsothsipu mukaci ko makando o kucithsiathsia. 7Eyo iereka kenge ya ku monithsa ci thsitawo thsenu thsa shemwa, athso thsothsikuru mu thsivaka kupita gauda oyu nepanga shaanga ci aa erekiwanga mu mudiro. Thsitawo thsenu yoihe thsi tanara, kenge mwa ku shangariwa, no ku piwa kutethzima no direma mu diyuwa edi a ku hokoriwa Yesu Krisitu. 8Mwakwa ku mu shima shaanga ci ka mwa mu mona. Karo shaanga ci kadi mwakwa ku mu mona thsino thsikati, mwaa tawa ku kwenthzi no ku nyanyuka ko thsinyanyu thso kutethzima no kukana ku twethsa ku tongononiwa. 9Muyambo o thsitawo thsenu po kenge wa kwikara kuyoyithsiwa ko myoyo thzenu.
10Oku kuyoyithsiwa, kodiyo a fotithsithsire nawa akwakukethza ci a ku dimukere ou okethzire yothsi thsihemo ethsi thsa roithsiwerire amwe. 11A erekire ku fotithsithsa thsikati nedi nga ya ku tendahara eyi wa wa monithsire Mupepo wa Krisitu ou wekarire kukwo, ou okethzire yo makando a Krisitu no kutethzima oku nga kwa kukeya munyima thzao. 12Ya hokoriwire kukwo ci ka cikwamenine athsinda unone amwe, ou a ambire eyi a wa pire Nyambi ku amba enu eyi na mu tongweriwa kowa na hongo Muthzimbu Ouwa ku kwenu kokoro o Mupepo Oukenu ku tunda ku wiru. Mane shaanga tungeru nato twaa cikumbwethza ku fotithsithsa eyi enu.
Mwikare owakenu
13Mweyo, mu roithsere maano enu ku kwama, karo mu cihenge. Mu pake okurupero wenu ko kuyara pa thsihemo ethsi mwa ku piwa Yesu Krisitu ou a ku hokoriwa pa kukeya kwenthzi. 14Ko kwikara ana Nyambi awa a mu yuvera, mwa hukera karo mwoyo o kare wecikumbwethza yoimango ou mwekarire nao o ku mu shime ku dimuka Nyambi. 15Unone eci edi a di omukenu oyu na a mithsi, namwe mwikare owakenu mwinu yoihe eyi mu kwama. 16Inene ku na ñoriwa ci: “Mwikare owakenu, inene ame no mukenu.”
17Pakuninga ci yoihe mu rombera kwa Nyambi mwaa ethsanga ci Tata, aye oyu na raturanga etenda yo munu no munu ko kupira mavwevwe, mu yoye ko kuyapa Nyambi uno mu yoya eci matundakure muno mu kaye. 18Inene mu na dimuka ci nedi kadi kenu yo kwora yo kucipitura eci silivera no gauda eyi mwa paturithsiwire ku mwoyo u shikwathsa thsimweya, ou mwa wanine ku tunderera kwakwathsañuruenu. 19Unone shime mwa paturiwire konyinga oukuru mu thsivaka wa Krisitu, aye Dinguana dya Nyambi o kupira kapongonyi nji katamwethzi. 20Nyambi wa mu hangurire kukare kaye o kuka shime kumbiwa, pano honi na a mu hokora muno mu mayuwa o mahurerero mukaci kenu.
21Kenthzi aye Krisitu na mu tawa kwa Nyambi, aye oyu wa mu pindurire kwafu no ku mu pa kutethzima. Mweyo, thsitawo thsenu nokurupero wenu kwa Nyambi i di.
22Pakuninga honi ci na mu cikenithsa ku thsivi ko ku yuvera oshemwa ci nga mu cishime shemwa eci ana o dira dyofoci, mu cishime nene ko micima thzenu thzothzihe.
23Inene na mwerekiwa ope, kadi ko mbuto thzo ku twethsa kwora, unone thzi shoro, ko diywi dya Nyambi edi di yoya, karo dyo kukana ku pwa. 24Eci edi ku na ñoriwa ci,
“Anu wahe aa cipitura eci muhonyi,
karo kutethzima kwo kwaa cipitura eci matemo o mu murundu.
Muhonyi yoihe u kukuta no matemo aa kurumukako,
25unone diywi dya Fumu po dya diyere.”
Karo edyo diywi po Muthzimbu Ouwa uya wa hongiwire ku kwenu.
Currently Selected:
1 Peturu 1: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company
