Jakovo 5

Ku nomenithsa afumanyi

1Mu teerere amwe mwafumanyi, mu dire no ku kuana mukaci ko makando oakuru aa a mi keyera ku rupara. 2Rufumo rwenu ru noro, nevata yenu i na diwa ku menje. 3Gauda no silivera wenu i na yara ñarawe, karo ñarawe thzayo kenge thza kwikara ombangi omango wenu no kwañithsa erama yenu eci mudiro. Mu na ciungumekera rufumo mu mayuwa o mahurerero. 4Ka na mu horithsa anu awa na coro makanda enu. Mu teerere! Kucoyoka kowa na coro makanda enu mukaci ko ku wa pupirika kwaa mi direra. Thsidiro thso thsi na ka wera mu matwi a Fumu Shokoro Ouhe#5.4 Fumu Shokoro Ouhe Sabaoti..

5Na mu yoyo nawa no ku cikora muno mu kaye, na mu cinunithsera mwathsinda diyuwa dyo kwipaiwa. 6Na mu ratura no kwipaa anu#5.6 Mu Thsigerike thzaa monithsa “Munu o kupira murandu.” o kupira murandu, awo ka na mi kanena.

Mu cithzue micima mu makando

7Andengenu, mu kwate micima uno mu taterera kukeya kwa Fumu. Mu mone njimi edi a na cithzuanga mucima o ku taterera muve ci u rete dicora dyodikuru mu thsivaka, ku tatekera ku mvura o thsikaravanthzi shime ku ka kuma ku mvura o dikurahoke. 8Namwe mu kwate micima kengeyo. Mu ndumepe, inene kukeya kwa Fumu pepi ku di. 9Andengenu, mwa citatokatatoka mu kaci kenu ci katere mwa ku raturiwe. Mu mone, mukwakuratura o nemana pa thsero!

10Andengenu, mu anekere akwakukethza awa ambire mu dithzina dya Fumu edi a kwatire micima ou ekarire mu makando. Namwe mu temunune kukwata kwo micima. 11Mu na dimuka ci a di no thsiyauthzi anu awa na citanarithsanga mwikati yo makando. Mwa yuva ya Jovo edi a cithzuire mucima nedi a mu tendire Fumu ku hura, inene Fumu Nyambi po wa ku yara ñekeñeke no ñeke. 12Andengenu, thsothsikuru nene po ethsi, mwethza ngoro, ikare ko diwiru nji ko kaye nji ngara thsinu. Mu ambe pohuma ci “Ii” nji ci “Dyombo,” ci katere mwa ku raturiwe.

Thsirombero thso thsitawo

13Ene kwaa di ku kwenu oyu di mu dikando? A rombere kwa Nyambi. Ene kwaa di oyu na nyanyuka? Embe membo o ku shangara. 14Ene kwaa di ku kwenu oyu na koro? Ethse akuru o kereke ci na mu romberere, no ku mu wethsa maathzi mu dithzina dya Fumu. 15Thsirombero thso ku tenda ko thsitawo thsaa yoyithsa mukwakukora, karo Fumu kenge a mu pindura. Karo ngeci o di no thsivi, aa teteriwa. 16Mweyo, mu citongore evi yenu mu kaci kenu, no ku ciromberera ci mu porithsiwe. Thsirombero thso munu o muwawa, thsi di nokoro nene nekwama yoikuru.

17Eliya po nedi munu eci dyodi tu di atwe. Ou a romberire ko mucima wenthzi ouhe ci mvura a roka, kwa pitire myaka thzihatu no maonda mutanu na thzofoci mvura kadi wa ku roka mu kaye. 18Ou a romberire karo ci mvura a roke, diwiru dya rokithsire mvura no kaye ka menithsire edya.

Ku huthsera mu dikuñwa dyo shemwa awa na u mu thsitawo

19Andengenu, ngeci yumweya ku kwenu aa yonga ku tunda mu dikuñwa dyo shemwa, karo munu yumweya ayepo ka mu huthsa, 20mu dimuke ci munu yomuhe o ku tundithsa munu o thsivi mu dikuñwa dyenthzi dyo kwipa o na yoyithsa mwoyo oya munu no ku reta ci evi yenthzi yoingi yoihe i teteriwe.

Currently Selected:

Jakovo 5: mho

Highlight

Copy

Compare