YEREMIA 3
3
Lom Ma luk Israel
1 Yhensain taiq, Yukgis dvyuk gas nyah yhensain nyhiq lyis kangh tyamp las nyang thuq loh las gohtoeu dvyuk dah yhensain nyhiq duot loh lyis, nyang hauh vmesbih lyis ma doms yoh yoeus. Hauh zis gas mau lyis vwot v-oeu kuot zis nyang nghuot. Nghuot laus eq Israel jens eh, namoq hwank nyoshoq bos ku lha gvshih namoq ngah jyank mas tauh los mes! 2Jing thyoh mas yoeuh kat geh. Namoq nghe nyhiq nghe phoq ma kuot dah joqyos vjoq lah? Namoq gas choyvm chank yah hwank jens lyis sihyos mas Arab jens shoh lhom teh langh nyeis. Namoq nghe nyhiq nghe phoq kuot cho yah mau lyis vwot v-oeu kuot. 3Housoeh yvmvyah mau ma wus, maunhungh eq ma gyoh lo. Nvng ma daq xoq, nghe nyhiq teh dvdoeus lo.
4Gvshih nvng ngos lyis taiq, Nvng ngah uwus nghuot, ngos loshang yoq lyis yah nvng ngos lyis jyetdap goeus. 5Nvng vjangh nhaiq ma yo das; nvng ngos yah vcaiq vto ma tyi das, ge. Israel eh, houka nvng taiq zis nghuot laus eq, nvng ma gis zis yoh kuot nyhoq kuot goeus.
Nhaiqlom thaiq Chah
6Yosia hwankti zaih lyis Yhensain ngos lyis taiq, Lom ma luk dah vmesbih ge Israel jens cha kuot goeus zis nvng vnyvng lah? Nyang gas ngah jyank masyah tauh loh las jing nyhang khanghmuh mas, saiq nyaus zains khyei khanghmuh mas nghe nyhiq teh kuot goeus, ge. #2Hw 22.1—23.30; 2Ss 34.1—35.27 7Nyang haih dvnganh dye kuot thang lhyi ngah jyank jyoengh tauh los das oen ngos nghamh. Nghuot laus eq nyang ma tauh los. Hau dvnganh lyis lom ma luk dah nyah vnoeuh Yuda nyvng. 8Israel gas ngah jyank masyah tauh loh las nghe nyhiq duot yvmvyah ngos nyang lyis kangh tyamp las nhang kat. Hauh zis Yuda eq nyvng. Nghuot laus eq lom ma luk, Israel dah vnoeuh Yuda gas ma gyuk. Nyang eq nghe nyhiq bweh los. 9Nyang xoq eq ma xoq. Nyang lukzains yahge saiqzains lyis paiq zis yah lvng shuot las mau lyis vwot v-oeu kuot. 10Hai dvnganh dah thang lhyi, Israel dah lom ma luk vnoeuh Yuda gas ma jyoeng, ngah jyank mas tauh los guons dvkuot. Ngos, Yhensain taiq goeus.
11Hauh thang lhyi Yhensain ngos lyis taiq kyoh, Israel gas, nyah jyank masyah nungs phuk loh laus eq nyang gas lom ma luk Yuda thoq lyis gis shih cho kyink thuq kat. 12Nyang ngos lyis Israel jyank loh taiq aq. Lom ma luk Israel jens eh, ngah jyank mas tauh los geh. Ngos gas nhaiqnyen las nhaiq ma yo lo das. Ngos namoq lyis vcaiq vto nhaiq ma yo toh das. 13Nvng kuot chah zis gas nah yaunos kyingh dv-rhen noh. Nvng Yhensain, nah Mangso yah tyi loh, nvng lvbaus mangso lhyi saiq nyaus zains khyei khanghmuh mas paiq goeus, nvng ngah domsyos ma gyo kuot goeus, ge Yhensain taiq.
14Lom ma luk dah dius jens eh, tauh los geh, namoq ngos yah sen. Ngos gas namoq lyis dvwus mas dvyuk, dvhuh mas aiq yuk shwih las ngos namoq lyis Zion Boms mas shwih tauh los das. 15Ngos namoq lyis ngah domsyos gyo dah guon bang dyei das. Nyamoq gas namoq lyis joeui yahge seq cho yah guon das. 16Housoeh namoq hauh mau mas je los nyo los lyis dius jens gas ngah Thanghchvp Kwi cho ma taiq lo. Nyamoq hauh cho ma nghamh lo, ma soh lo. Nyamoq chah yangh ma chah lo, gohtoeu dvkoeuq eq ma kuot noh. 17Hauh shishenh jweh lyis Yerusalem lyis, Yhensain dah hwankti tank ge das. Dius nyau dvnganh gas ngos lyis paiq das zis houmha zain das. Nyamoq gas nyamoq nhaiqlom than zis yahge nyamoq dah ma gis ehnyet yah nyamoq lyis taiq zis ma kuot lo das. 18Israel gas Yuda yah coq das las dvgeh mautsung shot mau mas jonsdoeus loh masyah ngos namoq dah phauh thyeih moq lyis dyei toh dah vso mau mas tauh jweh los das.
Mangso dius jens phvra paiq
19 Yhensain taiq:
Israel eh, ngos nvng lyis ngah lo khyvlyis lhom yoeus mes las
mungkvn gonh mas yungh thank,
pyo dah mau dyei toh.
Nvng ngos lyis Uwus oen lui las ngah jyank masyah
khanhamp eq nungs ma doms phuk loh lo das zis ngos o.
20Nghuot laus eq nvng gas lom ma luk dah yhensain nyhiq teh
nvng ngos lyis lom ma luk.
Ngos, Yhensain taiq goeus.
21Jing thyoh masyah thwe dvkoeuq xauhgyo.
Houka Israel jens, yaunos kuot dah kang dwis zis yah
Yhensain, nyamoq dah Mangso lhyi tohnyhik tyamp yvmvyah,
ngaus las shangphu thwe nghuot.
22 Yhensain jyank masyah nungs phuk loh bang dvnganhmoq eh, tauh los geh.
Nyang namoq lyis yhoh dyei las lomluk bang kuot dyei das.
Nvng taiq, Nghuot goeus, Yhensain ka ngamoq dah Mangso nghuot yvmvyah ngamoq nyah jyank mas tauh los nyeis. 23Jingthyoh mas ngamoq mangso ma nghuot dah paiq cho ka ngamoq lyis cha vkyuh ma dyei. Israel dah pangh cho ka Yhensain, ngamoq dah Mangso mhayah kyingh dvlos. 24Nghuot laus eq xoq phoh mangso ge, Bala lyis paiq zis gas, ngamoq lyis noeu phung yvng phung, loloeu lonyi, gohlhain yoq lyis yah ngamoq phauh thyeih moq zwi khank toh dah vyhang dvnganh somh loh nhang. 25Ngamoq xoq zis yah lhain toh chah las ngamoq dah xoqphuh zis gas ngamoq lyis nghop nhang. Ngamoq yahge ngamoq dah phauh thyeih moq gas vjangh yah Yhensain, ngamoq dah Mangso yah tyi dah yaunos kuot goeus. Ngamoq gas nyang tyingtoh dang domsyos khanhamp eq ma gyo.
Currently Selected:
YEREMIA 3: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.