YEREMIA 2
2
Israel lyis Loqzamh zwi
1 Yhensain ngos lyis taiq, 2Yerusalem mas bang yuk khanghmuh lyis haih loeus taiq hoeuh aq.
Namoq wotyamh uhlyis kha iq lomluk yvlyis eq,
yang vsaiq phoengh hwank uhlyis namoq ngos lyis khasoeh jyet zis eq,
yos ma kuot ku dah mhanhdyvp chank, hau mhanhdyvp chank namoq ngah thang mha chank los zis ngos soh.
3Israel jens eh, nvng gas ngos yah kyingh dvsen.
Namoq gas ngos sain dah gyingshang bang nghuot khoq.
Ngos namoq lyis nos nhang soeu khanghmuh thoq mas shanghsenh cho yahge
dyoqbis zainsmuh nhang.
Ngos, Yhensain taiq goeus.
Israel Phauh thyeih Yaunos
4Israel vkoq, Yakop dah vnyau vshih jens eh, Yhensain dah loeus lyis gyo geh. 5Yhensain taiq:
Namoq phauh thyeih moq ngos lyis tyi lha kauq cho cha chi los?
Nyamoq lyis ngah jyank masyah
cha yah nungsdoms loh nhang?
Nyamoq vkyuh ma bos dah phvra lyis tsain paiq las
nyamoq vkyuh ma bos bang bweh loh.
6Ngos nyamoq lyis Egutu masyah khyuot las
dwang khyoh yah dyingh las kyuk dah sihyos,
dius hank ma nyeis, suh e bang yangh ma bos,
gyukphoh dah mhanhdyvp mau chank shwih los laus eq
nyamoq ngos lyis chaxwe ma nhang.
7Ngos nyamoq lyis nyeis coeu bos las
hauh jyo xauh yhomh zo das zis yahge gohtoeu gis dah vyhang joq dah mau mas shwih los.
Nghuot laus eq hauh gungsthaiq nyamoq gas ngah mau lyis thyoqpi.
Ngos nyamoq lyis dyei dah mau lyis vwot v-oeu kuot.
8Phudyei bang gas, Yhensain khalhye nyeis? ge ma nyei.
Ngvnyang dah phudyei bang ngos lyis ma seq.
Guon bang ngos lyis tyi lha gomloeus toq.
Lvpe jens eq Bala phvra nyings yoeus taiq las
vkyuh ma bos dah phvra lyis paiq.
Yhensain dah Soe
9Housoeh yvmvyah ngos Yhensain ka ngah soe ngah dius jens yah tyi lha doms taiq das.
Nyamoq dah vnyau vshih lyis tyi lha yen das.
10Kupru goeujo buiswvng pheh loh las,
dvyuk yuk lyis buisthuq shot Keda mau mas nhang aq.
Nvng heisoeh teh zis xikpheh khanhamp eq ma bweh ku zis nyvng das.
11Gohtoeu khah dius nyau gas
nyamoq dah mangso ma gyingh laus eq khanhamp eq ma thaiq loh.
Nghuot laus eq ngah dius jens gas
nyamoq lyis nyoqnho ngelang she los dyei dah Mangso ngos yah,
nyamoq lyis cha ma yoh kuot dyei dah mangso jens yah thaiq goh tyamp.
12Housoeh las ngos maukhung lhyi,
mauh las dvn shoq gyukphoh nhont aq oen, vmingh dyei.
13Khasoeh ge lyis ngah dius jens gas yaunos aiq ja kuot cu goeus.
Nyamoq cingh dah jeisthuq dwang ge, ngah jyank masyah phanh loh las,
nyamoq nyang jeisdwang tsain doeu.
Houka jeis ma yoh lungh dah
jeisdwang vgang dvtsain nghuot.
Lom ma luk dah vthang
14Israel gas jons ma nghuot.
Nyang gas jons lo khoeu los zis ma nghuot.
Houlhyi nyang lyis chamus nyah jeswus jens yah khat khyoq?
15Nyamoq gas nyah jyank mas khangkhyi jens teh nyings los.
Nyamoq nyah mau lyis sihyos kuot goeus.
Nyah wus jens eq dyoq gyoh joq goeus. Shank shoq tyamp toh goeus.
16Nghuot goeus, Memphi yahge
Tapanhe dius jens gas nyah uhchoq khwih dyei goeus.
17Israel eh, haih zis nvnyang dvshe los.
Ngos nvng lyis dvcho gonh shwih uhshe los uhlyis
ngos Yhensain, nah Mangso lhyi tyamp khoq.
18Nvng Nile lvng mas jeis shuk das zis
Egutu pheh e zis vkyuh bos oen nghamh lhyeh?
Uphrat lvng mas jeis shuk das zis
Asiria pheh loh zis vkyuh bos oen nghamh lhyeh?
19Nvnyang dah ma gis cho ka nvng lyis joeng das.
Nvng ngah jyank masyah tauh loh cho ka nvng lyis dang thang thyet das.
Ngos Yhensain, nah Mangso lhyi tyamp las
ngos lyis lom ma luk lo zis gas
kha iq khoh las shuot zis nghuot yvlyis nvng xuq das.
Ngos, Yomzains, Maukhung Jesphung Yhensain taiq goeus.
Yhensain lhyi Paiq cho Ngoek
20YomzainsYhensain taiq:
Gohlhain namoq Israel jens ngah toeuh lyis peq tyamp.
Nvng ngah domsyos gyo das zis yahge ngos lyis paiq das zis ngoek.
Nvng gas jing nyhang khanghmuh mas,
saiq nyaus zains khyei khanghmuh mas
nghe nyhiq mangso lhyi tsain paiq.
21Ngos nvng lyis gis thank zvbiq nyau masyah
khyen tsungh teh khyoq toh.
Nghuot laus eq yoeuh aq, nvng cha bweh joq!
Nvng gas bop las phauh ma dap zvbiq nwis teh nghuot.
22Nvng gas soq than thank sapya yah cheih lyis yangh
ngos nah yobos lhoeuh zis nyvng shih.
23Nvng nvnyang gungs lyis vwot v-oeu ma kuot,
Bala lyis khanhamp eq ma paiq oen khasoeh yoh taiq lah?
Yoeuh aq, nvng langhkhau mha yaunos khasoeh kuot;
Nvng cha kuot zis yoeuh aq.
Nvng gas shichank mes las dvkhau yah pant yenh dah
ye gola-u zains teh nghuot.
24Sihyos mas duon loh.
Nyang shichank mes yoq lyis hauh yvlyis hank yoh joeu?
Nyang lyis o dah khah vlus eq nyungdaus zis ma kham.
Shichank yoq lyis nyang lyis vjangh yoh yhung.
25Israel eh, nah khyei chen mus shoq,
nah khyunghkang kyuk shoq gohtoeu mangso lhyi vchank khat.
Nghuot laus eq nvng taiq zis gas,
Ma nghuot, ngos ma yoh tauh los lo,
ngos lvbaus mangso jens lyis jyet las
nyamoq thang chank loh das, ge.
Israel jens lyis Joeng Mon
26 Yhensain taiq, khauh soeu ka xauh nyhik lyis xoqphuh teh, Israel hwankti jens, zau jens, phudyei bang, lvpe jens yahge dius jens dvnganh gas nyoqnho ngelang gyoh das. 27Namoq saiqzains lyis uwus, luk-uk lyis ungwes ge bang dvnganh xoqphuh das. Ngah jyank mas los das gungsthaiq ngah jyank masyah nungsdoms loh yvmvyah haih zis bweh los das. Nghuot laus eq nvng yaukyenh uhlyis nvng ngos lyis los khyuot yoeus aq ge sang.
28Namoq nyang xiklyis kuot dah mangso jens khalhye nghuot? Namoq yaukyenh uhlyis nyamoq yoh khyuot yoeus lyis khyuot yoeus nhang aq. Yuda jens eh, namoq wus nyo nyhoq mangso jens eq nyo joq. 29Namoq cha lop? Namoq chamus ngos lyis tyi lha gomloeus toq? 30Ngos namoq lyis joeng laus eq hauh zis ma gis los; namoq ngos lyis ma soq nhang. Nhaiqyo dah khangkhyi teh namoq dah lvpe jens lyis sat. 31Israel dius jens eh, ngos cha taiq nyeis zis gyo geh. Ngos nah xiklyis sihyos teh nghuot khoq lhyeh? chuot las gyukphoh jes mau nghuot khoq lhyeh? Housoeh lyis nvng nhaiqdoeus khyvlyis kuot das oen chamus sang? Nvng ngah jyank mas khanhamp eq ma tauh los lo. 32Lonyi gas nyah phauhdap shunk zis lhyi, lonyi saiq gas nyah phoengh wvng dyimis thau lhyi tohnyhik lhyeh? Nghuot laus eq ngah dius jens gas ngos lyis yoh suon dah buisnyeis thoq lyis zes las tohnyhik toh. 33Nvng hwank khasoeh xo das zis top seq. Loh thank ma gis dah vmesbih yangh nah jyank masyah yoh xuq. 34Nah dyimis gas shohjyen bang yahge tswi ma bos bang dah suih yah lhoeuh joq. Khauh bang dah suih yah ma nghuot.
Nghuot laus eq hai dvnganh dah gungsthaiq 35nvng taiq zis gas, ngos tswi ma bos; jyoengh Yhensain ka ngos lyis nhaiq ma yo lo, ge. Nghuot laus eq ngos Yhensain nvng lyis joeng das: khasoeh ge lyis nvng yaunos ma kuot ge he. 36Gohtoeu dius nyau jens dah mangso jyank pheh xoeu loh zis yah nvnyang phauh ma tap zo. Nvng gas Asiria gvng mas yom gyau teh Egutu gvng mas yom gyau das. 37Nvng xoqphuh zis yah nah uhloms gop las Egutu masyah tauh los das. Nvng loms toh yvlyis ngos, Yhensain peq tyamp. Nvng houmhayah cha ma xauh yoeus das.
Currently Selected:
YEREMIA 2: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.