Romḛ-a 4
4
Abraham tɨ wa̰y tɨ ɓla
1Kəy jaa jo yi ɓə ja tuna i kaa tɨ Abraham sul a? Kəy wa̰y jo may ten tuna ər ndula ya̰m sul a? 2Jo Abraham tɨ wo tugla tɨ Ndɨla kwi na ər mum tɨ kar gɨna, ər ɓə na ər tən ɗɨb. Lɛ ər lɛm kar in tɨ Ndɨla kwi lo. 3Kəy jaa jo maktub tɨ Ndɨla maan ja a? Ər ja ɓə: «Abraham ko Ndɨla hul nejo Ndɨla ɓra ər kuna wo tugla la.#4.3 Gen 12.1-5» 4Wo tɨ cida kar ten ər wa̰y tɨ daa sul. Wa̰y tɨ daa sul ne ti kuna ɓari ne wo ka gɨ ər lo, lɛ tuna cida ne ər ka sul. 5Lɛ gorne wo ka cida lo, lɛ ər ko Ndɨla ne duga wo tɨ ɓijim kar wo tugla hul gɨna, Ndɨla ka ər wo tugla ər hul kula jaa. 6Dabid may ja jaa kuna paa ne tuna wo ne Ndɨla ləg ər tɨ wo tugla tɨ ər kwi bla ər cida tɨ kar ɓə:
7«Ndula laar gɨ bi ton Ndɨla hul ɗina ər tɨ a mum gajele sul la ton ər jul a ɓijim tɨ kar la!
8Ndula laar gɨ bi ne Baali Ndɨla ɓra a ɓijim tɨ kar lo la!#4.8 Psa 32.1-2»
9Ndula laar ne tɨ gɨ bi tɨ cina ɓina ngoy ɓee gɨ bi tɨ cina ɓina lo la a? Tɨ ɓari yi ja toni ɓə «Ndɨla ka Abraham kuna wo tugla tuna ər hul kula sul.» 10Lɛ na kərkwi Ndɨla ləg ər kuna wo tugla a, toni barita ər ɓya̰ ər cina ɓee tɨ ər cina ɓina bəgri a? M-m tɨ cina ɓina bəgri lo lɛ toni tɨ ər cina ɓina kwi. 11Lɔ tɨ plaa, Abraham ten cina ɓina kuna wa̰y ɓla: Tɨ hura tawulu ne ɓla ɓə Ndɨla ləg Abraham kuna wo tugla tuna ər hul kula, gorne lula sul ne ər bya̰ ər cina lo ɗang. Abraham duga tɨ bi gun ne ko Ndɨla hul bla a cina ɓina na a ba. Ndɨla ləg a kuna bi tugla la. 12Gɨna Abraham duga bi tɨ cina ɓina na a ba. Ər tɨ a ba tuna cina ɓina sul ngoy lo lɛ kəysul a so ər ɗa̰y gor na ər hul kula gorne ɗang ər ɓina cina lo.
Ndɨla so gṵ tɨ gɨ bi tɨ hul kula mum naa
13Ndɨla naa gṵ tɨ gɨ Abraham-a na ər kəgɨ nəgri sul naa, ər gṵ hul oy jaa lo lɛ, tɨ ər hul kula jaa jo ər naa gɨ ər na gṵ. 14Jo mum ne Ndɨla ha̰w gṵ tɨ naa tɨ bi tɨ gṵ hul oy maan ngoy gɨna, hul kula ji ɓa̰ in teni, la Ndɨla na gṵ ha̰w ji teni. 15Kəysul gṵ hul hina na Ndɨla na hul laa. Un ne gṵ hul teni tɨ nin, ɓijim kaw teni la. 16Nejo wa̰y ne Ndɨla ha̰w gṵ tɨ naa yi ten ər na hul kula, nɨ ka ər ti wa̰y kede ne Ndɨla naa gɨ Abraham na kalɔ gun. Wa̰y ne tuna bi ne oy gɨ Ndɨla gṵ hul jo ngoy lo, lɛ gɨ bi ne ko Ndɨla hul kuna Abraham no̰ la, kəysul Abraham tɨ yi ba gun. 17Kuna a kya̰ tɨ maktub tɨ Ndɨla maan hul ɓə: «Ən ka əm bi dɨbla na kalɔ ba.»#4.17 Gen 17.5 Ər tɨ yi ba tɨ Ndɨla ne ər ko ər hul kwi. Yḭr ne ər naa gɨ bi tɨ ulu tɨm jili la ər ɗo wa̰y na jaa ne wag tɨ ər mu tɨ un ne wa̰y teni tɨ nin la. 18Abraham hiina ɓə ho̰ni kay tɨ wa̰y ɓudu sul cam lo tɨ bi ji, lɛ Abraham kay ho̰ni yɔd la, ər ko Ndɨla hul la. Tɨ ne kum jo ər duga na «bi dɨbla na ba». Ti kuna paa ne jo Ndɨla maktub may ja ɓə: «Əm kalɔ ɓə tɨm bi dɨbla.» 19Abraham na an lɛm ndog na aru lɛ ər par ər hul kula sɨgra. ər una ɓə wa̰y ne gə̰y gɨ ər tɨ ulu jo ngoy. Ər ii tɨ Sara kaw hiini nari teni, ər ɓə lɛm ɓa̰ yina cam lo bad. 20Abraham tori Ndɨla na gṵ ha̰w lo la ər hul ər dugun lo la. Ər ten dwari na ər hul kula la ər teen Ndɨla la. 21Ər una ɓari ɓə Ndɨla lɛm wa̰y ne ər so gṵ tɨ kar, kar. 22Kuna ne, Ndɨla ka Abraham kuna wo tugla. 23Lɛ Jaa ne a kya̰ tɨ Ndɨla maktub hul ɓə: «Ndɨla ka Abraham kuna wo tugla», tuna yḭr sul ngoy lo. 24lɛ gɨ yi ne Ndɨla ɓə i kar kuna bi tugla kəysul yi ko wo ne wag na i Baali tɨ Jesu tɨ bi tɨ ulu daan. 25Ndɨla nɨm Jesu tɨ biɓari daa nejo a hun ər yi ɓijim jaa, la Ndɨla jul ər tɨ bi tɨ ulu daan tɨ na i duga bi tugla tɨ Ndɨla kwi.
© 2023, ATALTRAB