Romḛ-a 3
3
Wo tugla in teni
1Juyb na bi ura maan tɨ kəy a? Ɓee cina ɓina na ndini tɨ kəy a? 2Ər ndini tɨ dɨbla na ul gun. Kəysul toni bari, tɨ ya̰ jo Ndɨla naa gɨ a ər jaa lɔ dɨbla ka a ɓaw. 3Kuri, bi tapeer tɨ a daan ka mum na ɗa̰y gor lo gɨ Ndɨla, lɛ kəy ara! Pay a wa̰y kar na ɗa̰ygor lo lɛm Ndɨla na wa̰y kar na ɗa̰ygor kway a? 4M-m, tɨ kuri lo! ka bi una ɓə Ndɨla jaa ja kuri, la jakaw una ɓə yḭr tɨ wo tɨ ɓura kuna a kya̰ tɨ Ndɨla Maktub hul ɓə: Ka bi una ɓə əm jaa tɨ ja tɨ kuri, la gorne bi tung jaa tɨ əm sul gɨna, əm ɓə a bunga la. 5Lɛ jo yi mum tugla lo tɨ kar ɓla Ndɨla na tugla gɨna, kəy jaa jo yi ɓə ja cam a? yi ɓə ja ɓə Ndɨla tɨ wo tugla lo gorne ər hul laa tɨba tɨ i sul a? (Ən ja jaa ne kuna wo biɓari na ja tɨ ja.) 6M-m, ti kuna paa ne lo bad, kəysul jo Ndɨla ti tugla lo, ər ɓə jaa tungni tɨ bi tɨ dunya̰ sul waa waa a? 7Jo ən ka ɓura la ən ɓura ɓla tɨ bayri ɓə Ndɨla ja jaa kuri tɨ gɨ ər taan wur gɨna, kəyja jo Ndɨla ɓə jaa tungni tɨ ən sul kuna yin tɨ wo tɨ ɓijim kar a? 8Bi taapeer ɓurum i, a ja ɓə yḭ jo i ja ɓə: «Ka i ka ɓijim nɨ bi ləg na Ndɨla na ɓari!» Ndɨla na jaa tungni ɓə bi ne le sul par! Nejo ndini gɨ a.
9Kəy jaa yi ɓə ja cam a? Pay yi ne i tɨ Juyb-a i ura bi a? M-m, in lo bad! Ən ja toni bi ne tɨ Juyb-a la bi ne tɨ Juyb-a lo la, yi gun i wur i sul ti tɨ ɓijim lɔ. 10Ndɨla maktub ja:
«Wo tugla ɓudu in teni,
ɓudu kam lag lag kaw teni,
11wo tɨ wa̰y una teni,
wo tɨ Ndɨla taam ɓudu in teni la.
12A nɨm ul ndinimani la,
a wag wa̰y tɨ Ndɨla kwi cam lo.
Wo ne ka wa̰y ndinimani in teni,
ɓudu kam lag lag kaw teni.
13A gṵ man hul ti kuna ngalɨm ne mu təng,
a ndila ti tɨ bi tan,
kuna ngɔl na seem ne wag tɨ a mu la#3.13 Psa 5.10
14a mu sir jaa somni tɨ bi dobɨn.#3.14 Psa 10.7
15A ɗa̰y sɔmni tɨ a lɔ tɨ saal bi humna la,#3.15 Esa 9.7-8
16a yunga mum tɨ un gun ne a wag tɨ nin la
a wur bi jindemni na un gun la,
17a una ul tɨ lapya lo.
18A oy gɨ Ndɨla lo bad.#3.18 Psa 36.2»
19Yi una ɓə mum gun ne gṵ hul ja ər ja, ər ja gɨ bi ne ti tɨ gṵ hul lɔ, ka wo in ɓə lɛm ər mu təng tɨ jaa ja tɨ ər sul kula lo la, nɨ ka jaa par na bi tɨ dunya̰ gun sul tɨ Ndɨla kwi. 20Kuna nejo wo ɓudu in lɛm tɨm tugla tɨ Ndɨla kwi lo na ər gṵ hul oy lo, kəysul gṵ hul ɓla gɨ bi ul mu tɨ a ɓijim lɔ nɨm.
Ndɨla duga bi tugla na hul kula
21Lɛ ndogle, Ndɨla ɓla gɨ bi waa taa ər ɓə bi duga tugla tɨ ər kwi bla gṵ hul. Moys na gṵ hul la, nebi-a la, ja jaa toni tuna ul ne sul. 22Ndɨla duga bi tugla tɨ ər kwi na a hul kula na Jesu Krist, ər ka gɨ bi gun ne ko Krist hul, kəysul Ndɨla jul wo ji lo. 23Bi gun ka ɓijim nejo a ɓə lɛm kori ndog na Ndɨla na taan lo. 24Lɛ na ər ɓari tɨ kar, Ndɨla duga ka a bi tugla tɨ ər kwi na Jesu Krist na wag ne wag na a tɨ ɓijim hul. 25Tɨ yḭr jo Ndɨla naa ər kuna wa̰y tɨ hima ɓina, tɨ ɓijim jul na ul mu tɨ hima la hul kula la. Ndɨla ka kuna paa ne tɨ gɨ bi ɓla ɓə yḭr tɨ wo tugla, kəysul ər ɓə a dangay kar tɨ a ɓijim tɨ toni jaa lo. 26Na lula sul tɨ ər hul ɗula, Ndɨla ɓla gɨ bi ɓə yḭr tɨ wo tugla ndogle, kəysul ər taam tɨm tugla la ər taam ɓə bi gun ko Jesu hul la duga bi tugla la.
27Pay wa̰y paa tɨ ten ɗɨb wo nin cam a? M-m, wa̰y teni bad. Na kəy gṵ hul a? Na gṵ hul na oy a? M-m, kəysul Ndɨla duga na i bi tugla na hul kula. 28Yi ja ɓə tɨ Ndɨla jo duga woɓari wo tugla na ul mu tɨ hul kula, wala na ul mu tɨ gṵ hul tuna mum tɨ kar sul lo. 29Ndɨla tɨ Juyb-a na Ndɨla ngoy a, ɓee yḭr tɨ bi ne tɨ Juyb-a lo Ndɨla la a? Kuri, yḭr tɨ bi ne tɨ Juyb-a lo maan la. 30Kuna Ndɨla tɨ ɓudu kam lag-lag, tɨ yḭr jo ər ka bi ton tɨ Juyb la, ton tɨ Juyb lo bi tugla tɨ ər kwi. 31Jo tɨ in gɨna, pay yi ɓə gṵ hul ləg kuna wa̰y bla na i hul kula a? M-m! Yi ɓla na i hul kula ɓə gṵ hul yar i.
Currently Selected:
Romḛ-a 3: nie
Highlight
Copy
Compare
Share
Want to have your highlights saved across all your devices? Sign up or sign in
© 2023, ATALTRAB