Matius 9

Minomali' si Yisus nu lobuw kakung

(Mrk 2:1-12; Luk 5:17-26)

1Sumokoyo yo si Yisus so alud muripau so liu' ri, muli' so polak Niyo kondiri.#9:1: so polak Niyo kondiri, ono yo, Kapornaum (siowan Mat 4:13). 2Lumogaa yo sono su kolobuwan dii so Iyo mongowit nu ido koyuwan kakung mili-gili so poomoturuwan niyo ri. Nosiou-o po Niyo koimaidan nosiro ri, mutongaro yo Iyo so lobuw kakung iiri nu, “Oo anak! Pototapo ya koimaidan mu no. Noompunan-o kiawi' koraayan mu ri,” koo.

3Norongou nu moomontuduk nu Ukum ni Musa tinangar Niyo iiri, minutangar sono nosiro so inawo nu, “Mubaag ong lobuw iitu nu Kinoringan,” koo.

4Noilaan-a ni Yisus pikiran nosiro iiri, mutongaro yo Iyo nu, “Nokuro ka su oraai pikiran muyu no?” koo. 5“Ombo ka su ooluk tongaron, ‘Noompunan-o koraayan mu ri,’ intawa, ‘Tungago om panou-o,’ koo? 6Nga kosiono pointolang Aku so kou nu Aku yo su Anak nu Riniba om kikopogboya'an Aku so riniba tu mongampun nu koraayan,” koo. Tongaro yo Niyo lobuw kakung iiri nu, “Undii yo, kokato yo poomoturuwan mu no om uli' yo!” koo si Yisus.

7Mundiio yo sono lobuw kakung iiri, om mulio yo. 8Kiawi' lobuw nokosiou nu nourug iiri linumaa' om mongorayou nu Kinoringan, iri nopotaak nu kopogboya'an sobana ko maayo so lobuw.

Pinaau ni Yisus si Matius

(Mrk 2:13-17; Luk 5:27-32)

9Nopupus iri, mulaiwo yo si Yisus so tontong iiri. Nokolombus-lombus-a Iyo, nosiou aku sono Niyo mogom-ogom so ponorima'an ku nu sukai. Ngaran ku yo po si Matius. Tongaro aku yo ni Yisus nu, “Waid-o so aku,” koo.

Mundiio aku yo om maido aku yo so Iyo.

10Nokologa' yo po si Yisus om kai ongo mompomaid Niyo ri so waloi ku, pookano ku yo sono nosiro. Laid mai mongokan-i, lumogaa yo sono moomumpung nu sukai wokon, om lobuw kikoraayan maid so kai mongokan. 11Nosiou iri nu lobuw Parisi ri, duato yo nosiro mompomaid Niyo ri nu, “Nokuro ka su murung Moomontuduk muyu no mongokan so moomumpung nu sukai om lobuw kikoraayan?” koo.#Luk 15:1-2

12Norongou Niyo duduat nosiro iiri, sumombuto yo Iyo nu, “Lobuw kaatu' no ya, dai muru' nu duktur, ono ya lobuw dai kaatu' no. 13Orotio muyu yo tinangar so Buuk nu Kinoringan iitu nu, ‘Okon-a ko niongousaa' su koinginan Ku, sondiang ko sian-luluud,’ koo ri. Linumoga' Aku okon-a ko lobuw ado koraayan-i su diumon Ku, nga modium Aku nu lobuw kikoraayan-i, su' rumorogo nosiro momaal nu koraayan,” koo si Yisus.#Mat 12:7; Us 6:6

Duduat suat nu mupuasa

(Mrk 2:18-22; Luk 5:33-39)

14Lumogaa yo ongo mompomaid ni Yuanis dii si Yisus mongoduat suat so puasa nu, “Nokuro ka su kai om lobuw Parisi no mupuasa, nga mompomaid Mu no dai?” koo.

15Sumombuto yo Iyo nu, “Oyiyingaan ka ongo lobuw mususuung so rami-rami muontun ong mido-ido po pongantin kusoi-o so nosiro? Tantu dai! Nga bang kolaiw-o pongantin kusoi oono, oyiyingaan sono nosiro om mupuasa nai'.

16D'ado ya lobuw popipil nu kumut owagu po so sabung olaid-o, so' bang kumut otaan nipipil so sabung orobuk-o, rumarad pisi' nu sabung orobuk oono. 17Soko ono ya, d'ado lobuw pogalin nu sungoi nu anggur owagu so poianan olaid-o,#9:17: Iya oono, poianan-o po nu sungoi nu anggur nga kulit nu kambing intawa kulit nu dumba waalon. so' tumodak poianan-o. Sungoi nu anggur-o nga ouyaban, poianan-o nga ousiba'. Sungoi nu anggur owagu, subai nigalin so poianan owagu, su' kiduo-duo nga owarong,” koo.

Anak ni Yairus, om woinoi minonudul

nu sabung ni Yisus

(Mrk 5:21-43; Luk 8:40-56)

18Dai po nopupus si Yisus mokimutangar-tangar so mompomaid ni Yuanis Moongodiu' ri, lumogaa yo si Yairus, wowaidon so waloi sosombooyangan. Sumurukudo yo iyo so tiningkuangon ni Yisus om mutongaro yo nu, “Minatoi anak ku woinoi sisuna, nga waid po s'aku, potopop nu palad Mu so koyuwan niyo su' oluli'an,” koo.

19Mundiio yo si Yisus, om maido yo Iyo om mompomaid Niyo ri so si Yairus.

20Lumogaa yo sono kiat so tinoudion nosiro ido woinoi morosakit tumuntug, opulu yo om duo tinounan laid. Rumonio yo woinoi iiri dii si Yisus, om tudulo yo sabung Niyo ri. 21Winaal niyo soko iri, so' inawo niyo sobana ko poimaid nu, “Tantu opoli'an aku ong otudul ku po sabung Niyo no,” koo.

22Kumowiio yo sono si Yisus, om tongaro yo woinoi iiri nu, “Oo anak, pototogo yo inawo mu no. Pagka poimaid ko so Aku, opoli'an ko,” koo, om sonduun-duun-a nopoli'an woinoi-i.

23Lumombuso yo Iyo mian so waloi ni Yairus. Nosiou-o po Niyo ongo lobuw poopukai nu toburi, om wokon botongi'an, 24mutongaro yo Iyo so nosiro nu, “Labus kou kiawi'. Moturuw-a lolaing iitu, okon-a ko minatoi,” koo. Nga inoyak-oyakan nai' Iyo nosiro. 25Nokolabus-o po kolobuwan-i, mosuwo yo Iyo so bilik nu lolaing minatoi iiri, kuyuti yo Niyo longon-i, om sonduun-duun-a noluli'an. 26Nokolongkop-o sono abar iiri dii.

Minomali' si Yisus nu duo koyuwan bolou

27Momponowo yo si Yisus kiat dii. Laid Niyo manou-panou, muut-suut sono so Iyo duo koyuwan bolou maid nu monsok-gonsok nu, “Oo su Mongkupu ni Raja Daud, luluudi kai yo!” koo.

28Nokaasuw-o po Iyo so ido waloi, lumogaa yo duo koyuwan bolou iiri dii so Iyo. Duato yo sono Niyo nu, “Poimaid kou ya ka nu opoli'an Ku kou?” koo. Sumombuto yo nosiro,

“Oo, poimaid kai ya,” koo.

29Ingkamo yo sono Niyo mato nosiro ri om mutongaro yo nu, “Pagka poimaid kou, tumbaidon Ku ya indomoon muyu no,” koo. 30Duo koyuwan iiri nga kosiou-o sono. Pogoso yo Niyo nosiro nu dai nipogalak-galak so isai-isai ginama' Niyo so nosiro ri.

31Nga linumongkop-a nosiro so wonuo iiri paabar nu gogoma'on ni Yisus.

Minomali' si Yisus nu lobuw bobou

32Iya nu mungkayas duo koyuwan baya' bolou iiri, ido koyuwan bobou sinorungan-a nu moinat inowit dii si Yisus. 33Susubo yo Niyo moinat sinumarung-i, om sonduun-duun-a koputangar lobuw iiri nu osayu. Noiranan sobana lobuw suang-i om mutangar nu, “Dai toko po insan nokosiou nu soko nosiou toko iitu no pudi so Israil,” koo.

34Nga mutongaro yo lobuw Parisi ri nu, “Wowaidon-o nu komoinatan su minonaak so Iyo nu kuasa monusub nu moinat,” koo.#Mat 10:25; 12:24; Mrk 3:22; Luk 11:15

Oluluudan si Yisus nu lobuw suang

35Lumongkopo yo si Yisus so bandar om kampung. Minontuduk Iyo so ongo waloi sosombooyangan, potuturan nu Abar Owarong suat so Pogkuosaan nu Kinoringan, om momali' nu lobuw boroginis rorooton.#Mat 4:23; Mrk 1:39; Luk 4:44 36Nosiou-o po Niyo lobuw suang iiri, noluluudan sono Iyo so' soko osuang koogutan om d'ado moonabang, soko baanan nu dumba d'ado moongipat.#Pong 27:17; 1 Raj 22:17; 2 Kot 18:16; Ijik 34:5; Mrk 6:34 37Mutongaro yo sono Iyo so mompomaid Niyo ri nu, “Osuang po poroyon, nga owako momaroi. 38Pagka soko ono, indamo kou yo so songapan nu umo oono su' poowit po nu lobuw popomoroyon,” koo.#Luk 10:2

Currently Selected:

Matius 9: TomPWPgLgPn

Highlight

Copy

Compare