Matius 7

Suat so monginsala' nu lobuw

(Luk 6:37-38,41-42)

1Mutongaro po si Yisus nu, “Adang kou yo monginsala' nu wokon, su' dai kou insola'on nu Kinoringan, 2so' onu-onu koo ya poonginsala' muyu nu wokon, soko ono ya poonginsala' nu Kinoringan so kou, om sukuban pokayon muyu suat so lobuw, ono ya su pokayon nu Kinoringan suat so kou.#Mrk 4:24 3Nokuro su mongombiri kou nu limbota so mato nu una', ampa kou kondiri kilimbota nu watang, dai mu ya oirosaan. 4Dai otoop ko mutangar nu, ‘Oo lakitu, idu'on ku ya limbota mu no,’ k'ikau, ampa insan limbota mu kondiri dai mu osiou. 5Oo su lobuw musingkobana-bana! Iduo po laid limbota so mato mu no, om oidu' mu nai' limbota nu una' mu no.

6Kodi muyu yo sumadi so asu onu-onu boorogo so Kinoringan, kalu obuton kou. Om kodi muyu yo odai kumala no so unsod, su' dai ingkagan nu ulod,” koo.

Mokitaak, modium, om monoritik nu pintu

(Luk 11:9-13)

7Mutongaro po si Yisus nu, “Pokitaak-o su' otaakan kou, podium kou yo su' kooyang kou, om koritiko muyu yo pintu no su' sukaban kou, 8so' lobuw mokitaak, tantu taakan, lobuw modium tantu kooyang, om lobuw mongoritik nu pintu, tantu sukaban. 9Bang kianak kou yo om mokitaak iyo nu baang-baang, dai musuat ong taakan mu iyo nu watu, 10intawa mokitaak iyo nu pait om taakan mu iyo nu lopung.#7:10: lopung; intawa: ulang 11Pudi pona oraai akal muyu no, tantu koilo kou ya nu onu owarong nitaak so anak. Makin po ong Amo toko so surga nga monaak nu Atod Niyo so lobuw mokitaak so Iyo no.

12Onu yo po koinginan muyu waalon nu lobuw so kou, soko ono ya waalon muyu so nosiro. Itu yo su orati nu Ukum ni Musa, om nituduk nu poo'abar nu Kinoringan gulu ri,” koo.#Luk 6:31

Pintu opiit

(Luk 13:24)

13-14Mutongaro po si Yisus nu, “Asuw kou yo so pintu opiit-o, so' ono yo su toliban mian so kowiawan musingkolaid maid so Kinoringan. Kuwai maam pintu olaab om oruoi toliban, nga ono yo su sundur so kopotoyan om osuang lobuw lumalan nai. Nga ono pintu opiit mian so kowiawan musingkolaid maagut lolanan, om owako lobuw kolalan nai,” koo.

Puun om bua'

(Luk 6:43-44)

15Mutongaro po si Yisus nu, “Ingati muyu yo lobuw musingkopoo'abar nu Kinoringan. Lumoga' nosiro nai so kou sumopari nu dumba nga sobana ko orongit nosiro soko ingongansad. 16Otondu'an muyu ya nosiro so gogoma'on nosiro no. Ugop nu koruwian dai mubua' nu anggur. 17Bang ookang puun-o, owarong-a bua' no, nga bang orukung puun-o, oraai-a bua' no. 18Puun ookang, dai mubua' nu oraai, om puun orukung, dai mubua' nu owarong. 19Puun dai mubua' nu owarong, togadon om susulan.#Mat 3:10; Luk 3:9 20Soko ono ya lobuw musingkopoo'abar nu Kinoringan. Otondu'an muyu ya nosiro so koompusan nu gogoma'on nosiro no,” koo si Yisus.#Mat 12:33

Gogoma'on, okon ko totongaron

(Luk 13:25-27)

21Mutongaro po si Yisus nu, “Kolobuwan momaau-a so Aku nu, ‘Oo Tuhan,’ koo, dai ya otigkan osiliw nu lobuw nu Kinoringan, sondiang ko ono-ono ya mongowaid nu koinginan nu Amo Ku so surga no. 22Ologa' yo Runat Pongukuman, osuang lobuw mutangar so Aku nu, ‘Oo Tuhan, maid nu kuasa Mu nobotuturan kai nu tinongaran Mu, minonusub kai nu ongo moinat, om minomaal kai nu koiran-iran,’ koo nosiro. 23Nga sombutan Ku nu, ‘Dai Ku kou otondu'an! Pulaiw kou ya, kou yo su moomaal nu koraayan,’ k'Aku.”#Lgu 6:8

Duo moomuwaloi — Oilo om olowong

24“Lobuw mongkinongou om murogama' nu totongaron Ku no, oilo iyo soko lobuw momuwaloi so tana' okotou. 25Insan muran lumoni' ya om muos nu opogon kotouruk nu waloi oono, dai ya miob so' otagap pinowonsukan-o.

26Nga lobuw mongkinongou nu totongaron Ku no om dai murogama' nu ono, olowong iyo, soko lobuw momuwaloi so pantai. 27Bang muran lumoni' om muos nu opogon kotouruk nu waloi oono, miob sono, om okon ko nogina-gina kousiba'an-o,” koo si Yisus.

Kopogboya'an ni Yisus

28Nopupus po si Yisus montuduk, osuang lobuw noiranan nu poomontuduk Niyo, 29so' montuduk Iyo maid nu kopogboya'an, okon ko soko moomontuduk nu Ukum nosiro ri.#Mrk 1:22; Luk 4:32

Currently Selected:

Matius 7: TomPWPgLgPn

Highlight

Copy

Compare