Matius 6

Pontudukan suat so monaak

1Mutongaro po si Yisus nu, “Bang poinsiou-siou-a tomod muyu momaal so tiningkuangon nu lobuw suang nu otoop waalon muyu lobuw poimaid so Kinoringan, dai kou borokatan nu Amo muyu so surga.#Mat 23:5

2Indadi bang monaak kou so lobuw kikurang kabus, kodi muyu yo intolang-tolangi so lobuw suang soko lobuw wokon so ongo waloi sosombooyangan om so lolanon, tayon ong royowon sono nu lobuw. Ondomo muyu, ado ya otorima' nosiro sondiang ko rorayou nu lobuw so wonuo tu. 3Nga bang monaak kou so lobuw kikurang kabus, adang-o nipoinsiou-siou so lobuw wokon, 4so' Kinoringan, Amo mu so surga su koilo nu waalon mu oono om monaak so ikau nu koworongan so surga,” koo si Yisus.

Pontudukan suat so mogdu'a

(Luk 11:2-4)

5Mutongaro po si Yisus nu, “Bang mogdu'a kou, ikod kou yo kiinsuw nu lobuw musingkopoimaid-poimaid. Ototom nosiro mogdu'a mundii so waloi sosombooyangan om so lalan tayon ong osiou nu lobuw. Ondomo muyu, d'ado ya otorima' nosiro sondiang ko rorayou nu lobuw so wonuo tu.#Luk 18:10-14 6Nga bang mogdu'a kou, asuw kou yo so bilik om tutubo muyu su pintu, om mogdu'a kou nai' so Amo muyu dai osiou oono. Onu-onu waalon muyu nu dai osiou nu inong lobuw, osiou-a nu Amo muyu so surga, om taakan kou Niyo nu koworongan so surga.

7Bang mogdu'a kou, adang-o puuli'-uli'on tongaron ado kosuat-suatan soko lobuw dai poimaid. Ponontaman nosiro ong olanggau-o po du'a nosiro, rongowon sono nu Kinoringan. 8Adang-o soko nosiro! Oilaan-o laid nu Amo muyu so surga onu pokitaakon muyu, nu dai muyu po koimbosang. 9Indadi bang mogdu'a kou, soko itu yo du'a muyu, ono yo,

Oo Amo mai so surga,

orumaton-o ngaran Mu,

10Logai yo Pogkuosaan Mu

so wonuo tu.

Otuman-o koinginan Mu

so wonuo tu,

soko otuman-o so surga.

11Taaki kai yo nu okanon

nu runat tu muuma' so kai.#6:11: nu runat tu muuma' so kai; intawa: nu muuma' so kai suab.

12Ompuno yo kiawi' koraayan mai ri,

soko kai nga mongampun-a

nu lobuw kikoraayan so kai.

13Kodi kai yo posimaidi

oliongan nu koimaidan

ong kinaman kai,

nga polaiwo kai yo

ungkiat so kiawi' koraayan.

[Ikau-o so pogkuosaan maayo

om kikuasa

om kikoorumatan musingkolaid. Amin.]

14Bang mongampun kou nu lobuw kisala' so kou, ompunon kou ya nu Amo muyu so surga. 15Nga bang dai kou mongampun nu lobuw kikoraayan so kou, Amo muyu so surga nga dai ya mongampun so kou,” koo si Yisus.#Mrk 11:25-26

Pontudukan suat so mupuasa

16Mutongaro po si Yisus nu, “Bang mupuasa kou, adang-o momos-tomos soko lobuw musingkopoimaid-poimaid. Musinglunggui nosiro tayon ong oilaan nu lobuw nu mupuasa nosiro. Ondomo muyu, ado ya otorima' nosiro sondiang so wonuo tu. 17Nga bang mupuasa kou, puragup om pusisir#6:17 sisir; intawa: sudai kou yo, 18su' d'ado koilo nu mupuasa kou sondiang ko Amo muyu so surga, iri koilo nu onu-onu waalon muyu nu kosusut-o, om taakan kou nu koworongan so surga,” koo si Yisus.

Orata' so surga

(Luk 12:33-34)

19Mutongaro po si Yisus nu, “Ikod kou yo pongimpug nu orata' so wonuo tu, so' osuang gagat om togor mongusiba', om tokowon nu lobuw.#Yak 5:2-3 20Pongimpug kou yo nu orata' so surga, nu d'ado gagat om togor mongusiba', om d'ado lobuw monakou. 21Ombo ya polak nu orata' muyu no, so wonuo tu ko' so surga, nai ya inawo muyu no,” koo.

Lampu nu koyuwan

(Luk 11:34-36)

22Mutongaro po si Yisus nu, “Bang imaidon muyu nu pontudukan Ku no, soko otarang mato muyu no om kiawi' nga osiou muyu. 23Nga bang dai kou mongowaid nu pontudukan Ku no, soko osowut mato muyu no om kiawi' nga dai owowayan,” koo.

Kinoringan intawa orata'

(Luk 16:13; 12:22-31)

24Mutongaro po si Yisus nu, “Ido uripon dai kodapat muripon so duo tuan, so' rumoraayan iyo nu ido no, om osamod nu koduo no, intawa mongimaid iyo so ido no, om dai mongimaid so koduo no. Soko ono ya pudi kou. Dai kou kowaid so Kinoringan ong toroidoon muyu ya kokoyaan so wonuo tu.

25Mutangar Aku so kou nu, ikod kou yo kigagau nu kowiawan muyu no suat so kookanan, inumon, intawa pokakas muyu. Oogot po kowiawan ko' kookanan om oogot po koyuwan ko' pinokokasan. 26Udioo muyu ya kobombologan-o. Dai ya nosiro mutonoman, nga pookanon-a nu Amo muyu so surga. Indadi, boorogo kou po ko' kobombologan-o! 27Ado ido so kou kodapat polanggau sabat pona nu umur niyo, pudi bogagau iyo.

28Ondomo muyu tanom-tanom momuwusak so korikutan-o. Dai ya mugogoma'on intawa mongoraro 29nga, insan si Raja Salumu ya silaid su landu osuang pokakas owarong, dai ya koimbas nu koowarong nu tanom-tanom oono.#1 Raj 10:4-7; 2 Kot 9:3-6 30Ong tanom-tanom momuwusak, kiwusak nu runat tu, nga pogsusuab ondikuton-a polonot om susulan. Pinoriara' ya nu Kinoringan tanom-tanom momuwusak oono, nadi boorogo ko po ko' tanom-tanom momuwusak oono. Oo su ongo lobuw dai poimaid!

31Adang-o gumagau suat so onu okanon, inumon, intawa pokokason muyu. 32Ono yo kiawi' su didiumon nu lobuw dai poimaid so Kinoringan. Nga oilaan-a nu Amo mu so surga nu oogot kou nu ono. 33Indadi pogului muyu po umarap so Kinoringan om mongowaid nu koinginan Niyo no. Bang soko ono waalon muyu, kiawi' nu ono otaakan kou ya. 34Pagka soko ono, kodi muyu po kiro-kiroo kogogawan muyu ong suab, so' suab sondiang po koogutan. Kinaman po koogutan nu runat tu, adang-o ruangan po,” koo si Yisus.

Currently Selected:

Matius 6: TomPWPgLgPn

Highlight

Copy

Compare