Matius 5

Kosonangan sobana-bana

(Luk 6:20-23)

1Nosiou-o po ni Yisus lobuw osuang-i, mindokodo yo Iyo so ido bulud.#5:1: bulud intawa kotud: Orati nu bulud tuui okon ko bulud opangkat, nga oyompop. Nokoogom Iyo, lumogaa yo ongo mompomaid Niyo ri dii so Iyo, 2om tumimpuuno yo Iyo montuduk so nosiro nu,

3“Osanang-o#5:3: Orati yo po nu osanang tuui kaalib po nu kosudu'an suat so onu-onu ya nololagan so wonuo tu, nga ono yo koworongan kiat so Kinoringan. lobuw koilo

nu d'ado kobosagan nu inawo

sondiang ko umarap so Kinoringan,

so' nosiro yo su koirasa nu kosonangan

so Pogkuosaan nu Kinoringan.

4Osanang-o lobuw kikoogutan,

so' insosomodan nosiro nu Kinoringan.#Yis 61:2

5Osanang-o lobuw obaba' inawo,

so' nosiro yo su kosongapan

nu onu-onu nijanji nu Kinoringan.#Lgu 37:11

6Osanang-o lobuw sobana ko moingin

momaal nu koinginan nu Kinoringan,

so' popusintopodan Niyo nosiro.#Yis 55:1-2

7Osanang-o lobuw oluluudan so sondad una',

so' Kinoringan nga oluluudan-a so nosiro.

8Osanang-o lobuw otoroido inawo so Kinoringan,

so' nosiro yo su kosiou so Iyo.#Lgu 24:3-4

9Osanang-o lobuw popusulut nu lobuw wokon,

so' nosiro yo su pinokaanak nu Kinoringan.

10Osanang-o lobuw indoraayon

ong mongowaid nu koinginan nu Kinoringan,

so' nosiro yo su koirasa nu kosonangan so Pogkuosaan Niyo.#1 Ptr 3:14

11Osanang kou ya pudi pokoraayon, simbaalan om raayon nu lobuw so' poimaid kou so Aku,#1 Ptr 4:14 12so' ongo poo'abar nu Kinoringan gulu ri nga inindoraai-a soko ono. Sumudu'an kou yo om posonango muyu ya inawo muyu no, so' osuang koworongan sinodia' nu Kinoringan so kou so surga,” koo si Yisus.#2 Kot 36:16; P'rapan 7:52

Mompomaid so si Yisus soko asin om onawau

(Mrk 9:50; Luk 14:34-35)

13Mutongaro po si Yisus nu, “Kou yo su soko asin so wonuo tu. Nga bang malo yo asin-o, d'ado yo sono kosudaan sondiang ko niada' om puiningkagan nu lobuw.#Mrk 9:50; Luk 14:34-35

14Kou yo su onawau so wonuo tu, mongonawau nu lobuw suang lumoga' so Kinoringan, soko waloi so timpak nu bulud, osiou nu kiawi' lobuw.#Yns 8:12; 9:5 15D'ado ya lobuw monikit nu politaan om tutuban sono nu montaya, sondiang ko nitimpak so pootimpakan nu politaan, tayon ong onawau kiawi' rinuang nu waloi-o.#Mrk 4:21; Luk 8:16; 11:33 16Soko ono yo mupatut waalon muyu. Pointolangon-o so lobuw suang gogoma'on owarong, su' mongorayou nosiro nu Amo so surga,” koo.#1 Ptr 2:12

Pontudukan suat so Ukum ni Musa

17Sumunduro yo si Yisus mutangar nu, “Kodi muyu yo tokodo nu nokologa' Aku yo po om d'ado yo sono kosudaan nu Ukum ni Musa, om niongotuduk nu ongo poo'abar nu Kinoringan gulu ri. Tomod Ku yo po lumoga', nga potuduk om potarang nu orati nu kiawi' oono. 18Ondomo muyu yo, ido pona urup om titik so Ukum nga dai oliong, ong kakal po tana' om langit tu, musingkotuman nu kiawi' tomod nu Ukum oono.#5:18: musingkotuman nu kiawi' tomod nu Ukum oono; intawa: ong dai po otuman kiawi' oono.#Luk 16:17 19Ono yo ko', isai dai mongowaid nu Ukum ni Musa, pudi ido ya ukum nu dai oogot bana, om montuduk nu wokon dai popongowaid nu ono, iyo yo su tokodon nu Kinoringan nu d'ado pangkat iya nu mogkuasa Iyo so nosiro ong wagu. Nga isai mongowaid nu Ukum, om montuduk nu wokon popongowaid nu ono, iyo yo su tokodon nu Kinoringan nu maayo pangkat iya nu mogkuasa Iyo so nosiro ong wagu. 20Indadi ondomo muyu nu, dai kou koompit nu Pogkuosaan nu Kinoringan ong dai kou ya kaalib nu koobinsuut nu lobuw Parisi om moomontuduk nu Ukum momaal nu koinginan nu Kinoringan,” koo.

Pontudukan suat so koungotan

21Mutongaro po si Yisus nu, “Nokorongou kou yo nu nituduk nu odu aki toko nu gulu ri nu, ‘Adang momatoi nu lobuw. Isai yo po momatoi subai bisora'on,’ koo ri.#Kin 20:13; Pom 5:17 22Nga mutangar Aku kosiono so kou nu, isai mungot so lobuw,#5:22: isai mungot so lobuw; so tinu-tinu solinan silaid-i: isai mungot ado pounayan. bisora'on, om isai momaki nu lobuw, bisora'on so Poongobisora'an nu Ugama, om isai pokolowong nu lobuw, suu'on posubo so noraka. 23Pagka soko ono, bang kuwai so kou potaak nu onu-onu so Kinoringan, om oondoman niyo nu kuwai lobuw noinsokitan niyo nu inawo, 24niogol po nitaak niyo no om mian mokimuwarong nu lobuw oono, om mululi' nai' potaak nu ono so Kinoringan.

25Bang kuwai mongodaawa so ikau, dai po kologa' so pongobisora'an, mokimusulut ko yo so iyo. Bang okon ko soko ono, tantu nikomouli' ko niyo so moongobisara', om moongobisara' oono pokomouli' so ikau so pulis, om jiilon ko sono nu pulis-o. 26Mongaabar aku so ikau nu, tadi' ya kolabus ko kiat so jiil oono, ong kobarai ko yo,” koo si Yisus.

Pontudukan suat so lumapa'

27Mutongaro po si Yisus nu, “Nokorongou kou yo nu nituduk so Buuk nu Kinoringan nu ‘Adang lumapa',’ koo ri.#Kin 20:14; Pom 5:18 28Nga mutangar Aku kosiono so kou nu, isai yo po monsiou nu woinoi om mokisosorong, koorotian kolapa' yo lobuw oono so inawo niyo no. 29Bang mato wanan mu no su mongowit so ikau so koraayan, sungkito paada'. Owarong po bolou sompodi ko' osongkayu ko kosubo so noraka.#Mat 18:9; Mrk 9:47 30Bang longon wanan mu no su mongowit so ikau so koraayan, totoko yo. Owarong po sompopodi longon mu ko' osongkayu ko kosubo so noraka,” koo si Yisus.#Mat 18:8; Mrk 9:43

Pontudukan suat nu paada' nu sawo

(Mat 19:9; Mrk 10:11-12; Luk 16:18)

31Mutongaro po si Yisus nu, “Kuwai ya notangar so Buuk nu Kinoringan nu, ‘Isai yo po paada' nu sawo, subai monaak nu surat kopuoda'an so sawo niyo no,’ koo ri.#Pom 24:1-4; Mat 19:7; Mrk 10:4 32Nga mutangar Aku kosiono so kou nu, isai paada' nu sawo, bang okon-a ko nokolapa' sawo niyo oono, koorotian iyo yo kondiri su nokolapa' so sawo niyo oono. Om isai mongontun nu woinoi oono, koorotian nokolapa' ya,” koo si Yisus.#Mat 19:9; Mrk 10:11-12; Luk 16:18; 1 Kur 7:10-11

Pontudukan suat so mongibot

33Mutongaro po si Yisus nu, “Nokorongou kou ya nu nituduk so lobuw nu gulu-gulu ri nu, ‘Tumano muyu yo onu yo po nojanji muyu so tiningkuangon nu Kinoringan maid nu ibot,’ koo ri.#Ot 19:12; Pong 30:2; Pom 23:21 34Nga mutangar Aku kosiono so kou nu, bang mongojanji kou, ikod kou yo pongibot. Ikod kou yo pongibot momakai nu langit, so' ono yo po pogkuosaan nu Kinoringan.#Yak 5:12; Yis 66:1; Mat 23:22 35Om ikod kou yo pongibot momakai nu wonuo tu, so' wonuo tu yo su pointoronan nu akod Niyo. Om ikod kou yo pongibot momakai nu Yirusalim, so' Yirusalim-o po bandar pogkuosaan nu Kinoringan, ono yo Raja maayo.#Yis 66:1; Lgu 48:2 36Ikod-o pongibot momakai nu ulu mu no, so' ikau kondiri dai kopogbaya' poputi' intawa poitom pudi soginting-a nu obuk mu no. 37Tongaro ya nu, ‘Oo’ intawa ‘Dai’. Bang sondiang ko ono totongaron mu, ono yo ungkiat so Wowaidon nu Moinat,” koo si Yisus.

Pontudukan suat so sumuli'

(Luk 6:29-30)

38Mutongaro po si Yisus nu, “Nokorongou kou yo nu pontudukan soko itu, ‘Mato gonti'an nu mato, nipon gonti'an nu nipon,’ koo ri.#Kin 21:24; Ot 24:20; Pom 19:21 39Nga mutangar Aku kosiono so kou nu, adang-o sumuli' nu koraayan so lobuw mongoraai so ikau. Ala' nai' bang sompakon nu lobuw ilaan wanan mu no, posompaki po ilaan gibang mu no. 40Om bang doowaan ko nu lobuw so' mokipopongalap nu sabung mu dai owarong-o, taaki nai' so iyo sabung mu owarong-o. 41Bang sosogan kou nu lobuw mokiiba nu gonggamon songkilumitor rawu', ibaa duo nokilumitor rawu',” koo. 42“Bang mokitaak lobuw nu onu-onu ya so ikau, taaki yo, om bang mongidam lobuw nu onu-onu ya so ikau, poidamo yo,” koo.

Osamod so alod-alod

(Luk 6:27-28,32-36)

43Mutongaro po si Yisus nu, “Nokorongou kou ya nu nituduk nu, ‘Somodi muyu yo kouna'an muyu, om bisigo muyu alod-alod muyu,’ koo ri.#Ot 19:18 44Nga mutangar Aku kosiono so kou nu, somodi muyu yo alod-alod muyu no, om pogdu'a kou yo suat so lobuw mononsara' so kou no. 45Bang waalon muyu soko ono, pointolang kou nu inonakan kou nu Amo muyu so surga, so' minongurug Iyo nu runat om posondot nu uran suat so lobuw owarong om oraai pona. 46Dai kou ya borokatan nu Kinoringan ong ono ya su koluluudan muyu lobuw oluluudan so kou no, so' pudi ong lobuw oraai, iri moomumpung nu sukai, momaal-a soko ono. 47Om bang ono ya su poduli'on muyu kouna'an muyu no, onu kooliban muyu so lobuw wokon? Lobuw dai poimaid nu Kinoringan nga momaal-a soko ono! 48Soko Amo muyu so surga osamod nu kiawi' lobuw nu otoroido inawo, kou nga subai soko ono ya,” koo si Yisus.#Ot 19:2; Pom 18:13

Currently Selected:

Matius 5: TomPWPgLgPn

Highlight

Copy

Compare