Matius 4

Kininaman si Yisus nu Wowaidon nu Moinat

(Mrk 1:12-13; Luk 4:1-13)

1Owito yo si Yisus nu Atod nu Kinoringan so padang pantai, tayon ong kinaman nu Wowaidon nu Moinat.#Ibr 2:18; 4:15 2Awi runat dai Iyo minongokan solaid opat nopulu runat, om nopupus iri, winitilon-o sono Iyo. 3Lumogaa yo sono su Wowaidon nu Moinat dii so Iyo om mutongaro yo nu, “Bang bana nu Anak Ko nu Kinoringan, popusiliwo yo ongo watu iitu nu baang-baang,” koo.

4Sumombuto yo Iyo nu, “Nokosurat so Buuk nu Kinoringan nu, ‘Okon ko ookanon-a su kowiau nu lobuw tu, nga ono yo su kowiau, kiawi' pinutangar nu Kinoringan,’ koo ri,” koo si Yisus.#Pom 8:3

5Nopupus iri, owito yo Iyo nu Wowaidon nu Moinat so bandar Yirusalim om potimpako yo Iyo so limboungan nu Waloi Maayo nu Kinoringan-i, 6om tongaro yo nu, “Bang bana nu Anak Ko nu Kinoringan, tuuno so tana' no, so' nokosurat so Buuk nu Kinoringan nu,

‘Monuu' Kinoringan nu susuu'on Niyo popongipat so ikau.

Soludon ko nosiro

nu palad nosiro no

su' dai kosondot akod mu no so kowotuan,’

koo ri,” koo Wowaidon nu Moinat-i.#Lgu 91:11-12

7Sumombuto yo Iyo nu, “Nokosurat so Buuk nu Kinoringan nu, ‘Ikod-o ponginam nu TUHAN, Kinoringan mu,’ koo ri,” koo.#Pom 6:16

8Nopupus iri owito po Iyo nu Wowaidon nu Moinat-i so ido bulud sobana ko opangkat om posiowo yo niyo si Yisus nu onu yo po so wonuo tu om kiawi' kokoyaan. 9Tongaro yo Iyo nu Wowaidon nu Moinat-i nu, “Kiawi' nosiou Mu oono itaak ku so Ikau ong usaa'on Mu aku,” koo.

10Nga tongaro yo iyo ni Yisus nu, “Pulaiw-o su Wowaidon nu Moinat! Nokosurat so Buuk nu Kinoringan nu, ‘Ido-ido ya TUHAN, ono yo Kinoringan kowasa usaa'on mu,’ koo iri,” koo.#Pom 6:13

11Mulaiwo yo sono Wowaidon nu Moinat-i, om lumogaa yo ongo susuu'on nu Kinoringan monabang so si Yisus.

Tinumimpuun-o si Yisus mugogoma'on

so Galilia

(Mrk 1:14-15; Luk 4:14-15)

12Norongou-o po ni Yisus nu nojiil si Yuanis, mululio yo Iyo so Galilia.#Mat 14:3; Mrk 6:17; Luk 3:19-20 13Minulaiw Iyo so Najarit om mogolo yo so Kapornaum, ido bandar so imbing nu Liu' Galilia so wonuo nu bansa Jibulun om Naptali.#Yns 2:12 14Minogol Iyo so Kapornaum, tayon ong otuman tinangar ni Yisaya poo'abar nu Kinoringan gulu ri nu,

15“Oo su ongo lobuw molak so tana' Jibulun om Naptali,

so lalan mian so liu' ri,

so sondipawon nu Bowang Yurdan-i,

Galilia wonuo nu lobuw okon ko Yaudi.

16Kou yo su ongo bansa soko miniau so kotuongan,

dai kosiou nu gama' miau musuat,

nga kosiono nokosiou kou yo

nu kowiawan wagu kiat so Kinoringan,

iri soko onawau so kou.

Om suat so lobuw d'ado kowiawan kiat so Iyo,

inowit sono Niyo so konowawan,

koo ri,” koo.#Yis 9:1-2

17Kiat nu iri, tinumimpuuno si Yisus montuduk nu, “Rorogo kou yo momaal nu koraayan, so' oduruk-o Kinoringan mogkuasa!” koo.#Mat 3:12

Minomaau si Yisus opat moomukot

(Mrk 1:16-20; Luk 4:14-15; 5:1-11)

18Iya nu manou-panou si Yisus so imbing nu Liu' Galilia ri, nokosiou Iyo nu duo musulod moomukot mosaan momukot, ono yo si Simun (ngaran koduo si Pitrus) om toudi niyo si Andrias. 19Tongaro yo Niyo nosiro nu, “Waid kou yo s'Aku. Tudukan Ku kou nu gama' mongingol nu lobuw maid s'Aku,” koo. 20Ogoli yo nosiro pukot nosiro ri, om maido yo so Iyo.

21Lumombuso yo si Yisus om nokosiou po Iyo duo ya musulod ingoranan so si Yakubus om si Yuanis, inonakan ni Jibidius, makoi-sakoi maid nu amo nosiro ri, mongatag nu pukot. Paawo yo Niyo nosiro nu powaidon so Iyo. 22Ogoli ya sono nosiro alud, pukot om amo nosiro ri, om maido yo so si Yisus.

Montuduk, paabar, om momali' si Yisus

(Luk 6:17-19)

23Lumongkopo yo si Yisus so wonuo nu Galilia montuduk nu lobuw so ongo waloi sosombooyangan-i, om monuturan nu Abar Owarong suat so Pogkuosaan nu Kinoringan ong wagu, om momali' nu lobuw kiosakit nu boroginis.#Mat 9:35; Mrk 1:39 24Nokolongkop-o sono tuturan suat so Iyo so wonuo nu Siria, sampai osuang lobuw linumoga' dii so Iyo. Minongowit nosiro nu lobuw morosakit nu boroginis, kuwai sinorungan nu moinat, uumodan, om kuwai ya kakung. Kiawi' nosiro pinoli'an Niyo. 25Nopupus iri osuang sono lobuw minaid so Iyo, ono yo lobuw kiat so Galilia, so Opulu Bandar, so Yirusalim, so Yudia, om so sondipawon nu Bowang Yurdan.

Currently Selected:

Matius 4: TomPWPgLgPn

Highlight

Copy

Compare