Matius 19

Pontudukan ni Yisus suat so muada'

(Mrk 10:1-12)

1Nopupus-o po si Yisus montuduk nu kiawi' iiri, momponowo yo Iyo kiat so Galilia, mian so Yudia so diipau nu Bowang Yurdan. 2Osuang lobuw minaid so Iyo, om pinoli'an Niyo nosiro dii.

3Lumogaa yo sono lobuw Parisi monginam so Iyo nu, “Mongowaid nu Ukum ni Musa, kowasa ya ka paada' nu sawo nu onu yo po pounayan?” koo.

4Sumombuto yo si Yisus nu, “Tantu nokobasa' kou yo so Buuk nu Kinoringan nu, ‘Kinoringan-o su minongurug nu lobuw tu, pinopupinaa nu kusoi om woinoi.#Pgn 1:27; 5:2 5Ono yo ko' koputondiang kusoi nu ino amo niyo om muido molak nu sawo niyo no, om ourug sono nosiro nu soko ido yo,’ koo ri.#Pgn 2:24 6Nadi nosiro nu ono okon-o sono ko duo po koyuwan, nga ido yo. Ono yo ko', onu yo po pinopuido yo nu Kinoringan, dai kowasa poputondiangon nu lobuw,” koo.

7Mongoduato po lobuw Parisi iiri so Iyo nu, “Bang soko ono, nokuro su minonuu' si Musa nu lobuw poponaak nu surat kopuoda'an so sawo niyo no om polaiwon sono?” koo.#Pom 24:1-4; Mat 5:31

8Sumombuto yo si Yisus nu, “Linila'an kou ni Musa paada' nu sawo so' osigor kou tongaron, nga sobana yo okon ko soko ono kiat nu togna. 9Nadi rongowo muyu yo itu nu, isai yo po paada' nu sawo ong okon-a ko linumapa' woinoi oono, om montun nu woinoi sondiang, kusoi oono nokolapa' yo,” koo si Yisus.#Mat 5:23; 1 Kur 7:10-11

10Mutongaro yo mompomaid Niyo ri nu, “Bang soko ono pala oturan suat nu sompusosondamin, gaam nai' adang montun,” koo.

11Sumombuto yo Iyo nu, “Okon-a ko kiawi' lobuw taakan nu Kinoringan nu pongoorotian, su' kopongowaid nosiro nu pontudukan oono. 12Kuwai lobuw dai koontun so' kiat nu koolangus, kuwai ya nu dai koontun so' tomod-a niyo dai montun, om kuwai ya nu dai moingin montun tayon ong kotoroido mugogoma'on suat so Kinoringan. Nadi isai yo po mongowaid nu pontudukan iitu no waidon-o bana,” koo si Yisus.

Minongoborakat si Yisus nu kololaingan

(Mrk 10:13-16; Luk 18:15-17)

13Owito yo nu ongo lobuw kololaingan dii si Yisus nu ipotopop so Iyo ulu nosiro mongoborakat, nga inungotan kolobuwan-i nu mompomaid Niyo ri. 14Mutongaro yo sono Iyo so mompomaid Niyo ri nu, “Posimaidi muyu ya kololaingan oono lumoga' tuui so Aku! Kodi muyu ya pogoso, so' kolobuwan-o soko itu su koirasa nu kosonangan so Pogkuosaan nu Kinoringan,” koo.

15Topopo yo sono ni Yisus ulu nu kololaingan-i mongoborakat. Noopod iri lumombuso yo Iyo.

Omulok doyaan

(Mrk 10:17-31; Luk 18:18-30)

16Ido runat, lumogaa yo ido kusoi dii si Yisus mongoduat nu, “Oo Guru, onu ka nu gogoma'on owarong waalon ku su' kikowiawan aku musingkolaid?” koo.

17Sumombuto yo Iyo nu, “Nokuro su mongoduat ko nu onu su owarong? Kinoringan-o su sobana ko owarong. Bang moingin ko nu kikowiawan musingkolaid, totog-o mongimaid nu niongosuu' Niyo,” koo.

18“Ombo nu suu'?” koo lobuw-i.#Kin 20:13-16; Pom 5:17-20

Sumombuto yo Iyo nu, “Adang momatoi, adang lumapa', adang monakou, om adang monimbaal. 19Orumato yo ino amo mu, om somodi yo inong lobuw, soko poonamod nu kondiri,” koo.#Kin 20:12; Pom 5:16; Ot 19:18

20“Kiawi' ponuu'an oono nowaal ku yo. Onu po ka opatut waalon ku?” koo omulok-i.

21Mutongaro yo si Yisus nu, “Bang oingin ko nu tantu kikowiawan musingkolaid, wolii yo kiawi' orata' mu, om taaki orogo no so lobuw omiskin. Bang waalon mu ono, kikokoyaan ko sono maid so Kinoringan nu dai musiba'. Oopod ono pululi' yo tuui om waid-o so Aku!” koo.

22Norongou-o po nu omulok iiri tinangar ni Yisus, momponowo yo iyo maid nu oogutan, so' sobana ko dooyan iyo.

23Mutongaro yo sono si Yisus so mompomaid Niyo ri nu, “Obaran Ku kou nu orogon sobana lobuw doyaan osongapan nu Kinoringan. 24Insan po tongaron Ku nu, oruoi po unta sumuluw so uang nu lawus, ko' lobuw doyaan osongapan nu Kinoringan,” koo si Yisus.

25Norongou-o po nu mompomaid Niyo pinutangar Niyo iiri, noiranan nosiro, om mongoduato yo so Iyo nu, “Bang soko ono, isai yo su osopulan nu Kinoringan?” koo.

26Siowi yo Niyo nosiro om mutongaro yo nu, “Bang lobuw-a, dai kopongurug nu ono, nga Kinoringan kopongurug nu onu yo po,” koo.

27Mutongaro yo sono si Pitrus nu, “Nga onu koo ka so kai nu nopoogol-o nu onu yo po om minaid so Ikau! Onu nitaak so kai nu Kinoringan?” koo.

28Mutongaro yo Iyo so nosiro nu, “Poimaid kou yo. Dii so surga, Aku, Anak nu Riniba mogom so oogoman nu sobana ko kikoorumatan, om iya yo oono kou kiawi' mompomaid Ku, mogom so opulu om duo oogoman nu kikoorumatan, mogkuasa nu opulu om duo bansa Israil.#Mat 25:31; Luk 22:30 29Om isai yo po nopoogol-o nu waloi, kosusulodan woinoi kusoi, ino amo, ko' inonakan, intawa umo niyo so' mompomaid Ku iyo, lobuw oono kotorima' inggatus kosuang nu niongoogol niyo iiri, om kikowiawan po musingkolaid maid so Kinoringan. 30Nga osuang lobuw nu ono sono tu kipangkat ourug nu d'ado pangkat, om lobuw d'ado pangkat-o ourug nu kipangkat,” koo.#Mat 20:16; Luk 13:30

Currently Selected:

Matius 19: TomPWPgLgPn

Highlight

Copy

Compare