Matius 17

Mininda buatan ni Yisus

(Mrk 9:2-13; Luk 9:28-36)

1Koonoman kiat nu iri, owito yo ni Yisus si Pitrus, si Yakubus, om si Yuanis sulod ni Yakubus tumidong so bulud opangkat nu siro ya siro. 2Milok po su musiliwo yo buatan ni Yisus soko runat koonawau so tiningkuangon nosiro ri, om pokakas Niyo ri nga milat-kilat kooputi'. 3Mintolango yo sono si Musa om si Ilia osiowan nosiro mutangar-tangar so si Yisus. 4Mutongaro yo sono si Pitrus so Iyo nu, “Oo Tuhan, owarong bana toko tuui. Bang moingin Ko, momosalag aku tuui tolu, ono yo ido Dikau, ido ni Musa, om ido ni Ilia,” koo.

5Dai po nopupus si Pitrus mutangar, tumopuo yo sono su kawut dii so nosiro, om kiat so kawut iiri, nokorongou nosiro nu bongut nu, “Itu yo su Anak sinomodan Ku. Koinsanang bana Iyo nu inawo Ku no. Rongowo muyu yo totongaron Niyo no,” koo.#2 Ptr 1:17-18 #Pgn 22:2; Lgu 2:7; Yis 42:1; Mat 3:17; 12:18; Mrk 1:11; Luk 3:22; Pom 18:15

6Norongou nu mompomaid Niyo bongut iiri, sobana ko linumaa' nosiro om nokotungub so tana' ri. 7Nga lumogaa yo si Yisus dii so nosiro om mutongaro yo nu, “Tungag kou yo. Ikod kou kilaa',” koo. 8Yumongago nosiro monsiou, d'ado yo nosiou nosiro sondiang ko si Yisus po.

9Tumaad nosiro kiat so bulud-i, biati yo Niyo mompomaid Niyo ri nu, “Kodi muyu po obar-obari so isai yo po nopusiou muyu sisuna ri ong dai Aku po oluli'an, Anak nu Riniba,” koo.

10Mongoduato yo mompomaid Niyo ri nu, “Nokuro su minutangar moomontuduk nu Ukum nu si Ilia po su gulu lumoga'?” koo.#Mal 4:5

11Sumombuto yo Iyo nu, “Bana ya nu si Ilia po gulu lumoga'. Om iyo yo nai' su monodia' nu onu yo po. 12Nga mutangar Aku so kou nu, nokologa' yo si Ilia, nga dai ya otondu'an nu lobuw suang. Pubaag-baagan-a iyo nosiro maid nu koinginan nosiro kondiri, om soko ono ya waalon nosiro so Aku,” koo.#Mat 11:14

13Noorotian-o sono nu mompomaid Niyo ri, nu si Yuanis Moongodiu' yo su kuanon Niyo.

Minomali' si Yisus nu lolaing sinorungan nu moinat

(Mrk 9:14-29; Luk 9:37-43a)

14Nokopululi' yo po si Yisus om tolu koyuwan mompomaid Niyo ri so kinosuang nu lobuw-i, lumogaa yo sono ido kusoi sumurukud so tiningkuangon Niyo ri, 15om mutongaro yo nu, “Oo Tuan, luluudi yo anak ku no! Uumodan iyo om sobana ko osonsara' om obulit-o iyo kosubo so apui om kotuop so sungoi. 16Inowit ku yo iyo so mompomaid Mu no, nga dai ya opoli'an nosiro,” koo.

17Mutongaro yo Iyo so nosiro nu, “Kou su lobuw kisala' dai poimaid. Dai Aku osanang mido-ido so kou, nga tinaanan Ku ya nu laid iiri. Owito yo lolaing mu no tuui!” koo. 18Susubo yo Niyo moinat sinumarung so lolaing iiri, om sonduun-duun-a nopoli'an.

19Lumogaa yo sono mompomaid Niyo ri dii so Iyo mongoduat nu, “Nokuro su dai mai osusub moinat iiri?” koo.

20Sumombuto yo Iyo nu, “Dai muyu nosusub so' dai kou poimaid nu bana-bana ya nu kopomali' Kinoringan nu lolaing oono. Ondomo muyu yo nu, bang kikoimaidan kou pudi soko koo'antab-a nu linsou nu sonsam, insan bulud odapat muyu ya monuu' popinda, om onu yo po nga owaal muyu ya. #Mat 21:21; Mrk 11:23; 1 Kur 13:2 [ 21Moinat soko itu no, dai osusub ong dai mogdu'a om mupuasa po laid,” koo.]

Ponuturanan koinduo ni Yisus

nu kopotoyan Niyo

(Mrk 9:30-32; Luk 9:43b-45)

22Noimpug-o po mompomaid ni Yisus so Galilia, mutongaro yo Iyo so nosiro nu, “Dai yo olaid nikomouli' Aku, Anak nu Riniba, so kopogboya'an nu lobuw. 23Potoyon Aku, nga so kotolu no oluli'an Aku ya,” koo.

Sobana ko olunggui sono mompomaid Niyo ri.

Pongoborayan nu sukai nu Waloi Maayo nu Kinoringan

24Nokologa' si Yisus om ongo mompomaid Niyo ri so Kapornaum, lumogaa yo ongo moomumpung nu sukai-i dii si Pitrus om mongoduato yo nu, “Mongobarai ya ka guru muyu no nu sukai suat so Waloi Maayo nu Kinoringan ko' dai?” koo.#Kin 30:13; 38:26

25Sumombuto yo si Pitrus nu, “Oo, mongobarai-a,” koo.

Nokouli' yo po si Pitrus, duato yo iyo ni Yisus nu, “Dikau so pongiro-kiro, bang momumpung nu sukai raja so wonuo tu, isai su pokiborayan nosiro, poranak nosiro ko' porantau?” koo.

26“Porantau,” koo si Pitrus.

Mutongaro yo sono Iyo nu, “Bang soko ono, dai muru' poranak-o mongobarai. 27Nga dai toko moingin monginsakit nu inawo nu kolobuwan oono. Ian-o mongapon so liu', om pait aapon mu togna no, alap-o om ombiri-o, so' kisiin so kobang nu pait oono muuma' pongobarai to nu sukai,” koo.

Currently Selected:

Matius 17: TomPWPgLgPn

Highlight

Copy

Compare