JEREMIA 11
11
Ehangano tali teywa
1Oohapu dhOmuwa odha adha Jeremia tadhi ti: 2“Pulakeneni oohapu dhehangano. Lombweleni Aajuda nAajerusalem 3kutya ngame, Omuwa Kalunga kaIsrael, otandi thingi shaa ngoka itaa vulika koohapu dhehangano ndika. 4Olyo ehangano ndyoka nda hangana noohekulu, sho nde ya tembudha mo muEgipiti, mevi ndyoka lya li lya fa eziko lya hanya. Onde ya lombwele, ya vulike kungame noya gwanithe shoka tandi ti. Onde ya lombwele kutya ngele otaa vulika, otaa kala aantu yandje, nangame ote kala Kalunga kawo. 5Nena otandi dhiginine euvaneko lyandje nde li uvanekele oohekulu kutya otandi ya pe evi ndika eyamba nolyo ondoka ye li na ngashingeyi.”
Onda yamukula nda ti: “Oshili, Omuwa.”
6Omuwa okwa lombwele ndje a ti:
“Inda kiilando yaJuda nomomapandaanda gaJerusalem. Uvithila ko oohapu dhandje u lombwele aantu ya pulakene oohapu dhehangano noya vulike kudho. 7Oohekulu sho nde ya tembudha muEgipiti, onde ya londodha nokugana, ya vulike kungame, nonda dhiginine okulondodha aantu yandje sigo onena. 8Ihe inaa pulakena nenge ya vulike. Shaa ngoka okwa tsikile uutangalali nuuwinayi shi vule nale. Onde ya lombwele, ya dhiginine ehangano, ihe oya tindi. Onkee onde ya undulile omageelo ngoka ga nyolelwa mo.”
9Omuwa okwa lombwele ndje a ti: “Aajuda nAajerusalem oya tsa ondumbo nangame. 10Oya shuna muulunde woohekulu, mboka ya tindi okulonga shoka nda ti; oya longele ookalunga yalwe; Israel naJuda oya teya ehangano ndyoka nda hangana noohekulu. 11Onkee ano ngashingeyi ngame Omuwa otandi ya londodha kutya otandi ya undulile ehanagulo, oyo noitaa ka hunuka mo. Nongele taa kugile ndje ekwatho, itandi ke ya pulakena. 12Aajuda nAajerusalem otaa ka ya kiikalunga mbyoka ye yi yambele omafikilondjambo notaye yi kugile ekwatho. Ihe iikalunga mbyoka itayi vulu oku ya hupitha, uuna ehanagulo tali ya. 13Mpoka pu thike omwaalu gwiilando muJuda, opo pu thike omwaalu gwiikalunga yawo; naampoka pu thike omwaalu gwomapandaanda muJerusalem, opo pu thike omwaalu gwiiyambelo yomafikilondjambo ya tungilwa Baal, oshikalunga shi nyanyalitha. 14Jeremia, ino galikana ndje nenge u indile ndje molwaantu mbaka. Ngele oye li muudhigu taa kugile ndje, itandi ke ya pulakena.”
15Omuwa ota ti: “Aantu mboka ndi ya hole, otaa longo uuwinayi. Oye na uuthemba washike okukala motempeli yandje? Otaa dhiladhila kutya otaa vulu okukeelela oshiponga, sho taa uvaneke omauvaneko notaa yamba oontselelandjambo? Otashi ya pe elago shika? 16Onde ya luku omuolivi gwa hetukila, gwa kanyata iiyimati yo opala; ihe ngashingeyi otandi ka hwameka omafo gagwo, notaku uvika endundumo, note pompona ko iitayi yagwo.
17“Ongame, Omuwa Omunankondoawike, nda tsike Israel naJuda; ihe ngashingeyi otandi ya undulile oshiponga. Oye shi iyetele yo yene, oshoka oya yono; oya geyitha ndje, sho ya yambele Baal omafikilondjambo.”
Jeremia ta tsilwa ondumbo
18Omuwa okwa tseyithile ndje ondumbo ndjoka aatondi yandje ya pangele molwandje. 19Onda li nda fa onzigona tayi falwa koshidhipagelo; inandi tseya kutya otaa kondjitha ndje, sho ya dhiladhilile ndje uuwinayi. Oya li taa ti: “Omuti natu gu komangele po, manga gwa ziza nawa, natu mu dhipageni po, opo pwaa kale ngoka te mu dhimbulukwa we.”
20Onda galikana nda ti: “Omuwa Omunankondoawike, ngoye omutokolihapu omuyuuki, oto konakona omatedho nokuyeleka oomwenyo dhaantu. Ondi itula miikaha yoye, tonatela ndje; aantu mbaka ya galulila uuwinayi.”
21Aantu yokuAnatot oya hala okudhipaga ndje po, ngele otandi dhiginine okuuvitha oohapu dhOmuwa. 22Onkee ano Omuwa Omunankondoawike okwa ti: “Otandi ke ya geela! Aagundjuka aamati yawo taa ka sila miita; aanona yawo otaa ka sa kondjala. 23Ondu utha ethimbo lyokweetela Aayanatot oshiponga, nuuna ethimbo ndyoka tali thiki, kape na nando ogumwe gwawo ta hupu ko.”
Currently Selected:
JEREMIA 11: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
