JEREMIA 10
10
Iimenka naKalunga kashili
1Aaisraeli ne, pulakeneni kelaka ndyoka Omuwa te mu lombwele. 2Ota ti:
“Inamu landula omikalo dhiigwana yaapagani;
inamu haluthwa komandhindhiliko gokeyalelo,
nando ohaga halutha iigwana mbyoka.
3Eitaalo lyaantu mboka olyowala.
Tala, omuti otagu komangelwa mokuti,
onkulungu otayi gu mbunzu nawa nekuya lyayo,
4notagu tulwa uulenga woshisiliveli nowoshingoli.
Otagu kwatelwa peha lyagwo noomboha,
dhi gu koleke gwaa gwe po.
5Iimenka ya tya ngaaka oya fa enduguya mepya lyomatanga.
Itayi vulu okupopya;
ohayi humbatwa, oshoka kayi shi kweenda.
Inamu yi tila; itayi mu ningi sha,
oshiwanawa nenge oshiwinayi.”
6Omuwa, kaku na ngoka e ku fa;
ongoye omunankondo,
nedhina lyoye enene noli na oonkondo.
7Olye ando itee ku simaneke,
omukwaniilwa gwiigwana ayihe?
Owi ilongela esimano.
Kaku na ngoka e ku fa mokati kaanandunge ayehe yomiigwana
nenge mokati kaakwaniilwa yayo.
8Ayehe yomuyo oyo aagoya nomathethe.
Miimenka ya hongwa miiti, otaa koneke mo shike?
9Iimenka yawo oya kolongwa noshisiliveli shokuSpania
noshingoli sha za kuUfas.
Oyo iilonga yaahambudhi oonkulungu.
Oya zala oonguwo oombulau noontiliganembwilili
dha tungika kaayogohi yoompumpo.
10Ihe ngoye, Omuwa ongoye Kalunga kashili.
Ongoye Kalunga omunamwenyo
nomukwaniilwa gwaaluheluhe.
Nge to geye, uuyuni otau telagana;
iigwana itayi vulu okwiidhidhimikila ondjahi yoye.
11(Ya lombwela kutya iikalunga mbyoka inayi shita egulu nevi,
otayi ka hula ko kombanda yevi alihe.)
Ondjimbo yokuhambelela
12Omuwa okwa shiti evi koonkondo dhe;
nokuunongo we okwa umbu uuyuni
nokwa alele omagulu.
13Okoohapu dhe omeya gomeyalelo taga ndunduma:
ote eta iikogo okuza kooha dhevi.
Ota shelitha oombadhi miikogo,
nota tumu ombepo tayi zi moompungulo dhe.
14Omuntu kehe omugoya noke na ontseyo;
mboka haa hongo iimenka, oya thethelekwa,
oshoka iimenka mbyoka taa hambula,
oyiifundja nokayi na omwenyo.
15Oyo iinima yowala noyi na okudhinika;
otayi ka hanagulwa po kOmuwa,
ngele te ya e yi pangule.
16Kalunga kaJakob ine yi fa;
oye ngoka a shiti ayihe,
nokwa hogolola Israel a ninge oshigwana she mwene.
Omuwa Omunankondoawike olyo edhina lye.
Uupongekwa tau ya
17Gongeleni iinima yeni, mu tembuke mo moshilongo, moka mwa thitikilwa. 18Omuwa ote ke mu ekelahi mo moshilongo shika; ote ke mu nyanyagula, sigo itaaku hupu nando ogumwe gwomune. Omuwa oye a popi.
19Aajerusalem otaa kugu taa ti:
“Otwa nyankagulwa ngiini ngeyi!
Iilalo yetu itayi aluka nando.
Otwa dhiladhila tu shi idhidhimikile!
20Omatsali getu oga finyunwa po;
oongodhi dhago odha tokolwa.
Aanona yetu oya yiwa nayo;
inapa kala nando ogumwe, a dhike po ishewe omatsali getu;
kaku na ngoka ta yelutha omalapi gago.”
21Onda yamukula:
“Aawiliki yetu oya ningi aagoya;
itaa pula Omuwa e ya wilike.
Omolwashoka oya ndopa,
naantu yetu oya halakanithwa po.
22Pulakeneni! Otaku zi omulombo!
Oku na einyengo enene moshigwana shokuumbangalantu;
etangakwiita lyasho otali shitukitha iilando yaJuda ombuga,
moka tamu kala oombandje.”
23Omuwa,
ondi shi shi kutya omuntu iha vulu okupangela shoka u uthilwa;
kaku na omuntu hu utha okukalamwenyo kwe.
24Dhenga ndje, Omuwa,
ihe hanoshikanyauko,
ngoye ino tu geela muupyundjahi;
otashi ningi shi kale ehulilo lyetu.
25Ondjahi yoye yi poolela miigwana mbyoka ihaayi ku longele,
omaantu mboka ihaa ithana edhina lyoye.
Oya dhipaga po aantu yoye;
oye tu hanagula po sheke
noya kumuna po oshilongo shetu.
Currently Selected:
JEREMIA 10: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
