JESAJA 42
42
Omupiya gwOmuwa
1Omuwa ota ti:
“Omupiya gwandje oye nguka, ngoka tandi mu nkondopaleke —
Oye tuu ngoka nde mu hogolola, omuntu nde mu hokwa.
Onde mu udhitha Ombepo yandje,
oye nota ka uthila iigwana ayihe nuuyuuki.
2Ita ka igidha nenge a kololoke
nenge ewi lye li kugagane momapandaanda.
3Oshihenguti sha tanduka ite shi nyanyagula
nonyeka tayi tsina ite yi dhimi po.
Ota ka uthila ayehe pauyuuki.
4Ita ka tenguka nenge a tyololoke;
ota taandelitha uuyuuki kombanda yevi.
Oontuntu dhomefuta otadhi tegelele elongo lye.”
5Kalunga okwa shiti egulu nokwe li alele;
oye a yala nokwaaneka evi naayihe mbyoka yi li mo;
aantu ayehe okwe ya pe omwenyo nomufudho.
Ngashingeyi Omuwa Kalunga ota lombwele omupiya gwe ta ti:
6“Ongame Omuwa nde ku ithana
e tandi ku koleke noku ku nkondopaleka,
u tale, uuyuuki ngele otau gwanithwa tuu kombanda yevi.
Omungoye tandi ka hangana naantu ayehe;
mungoye otandi ka minikila iigwana.
7Oto ka tonatitha omeho gaaposi
nokumangulula mboka ya kuutumba momilema moondjedhililo.
8“Ongame awike Omuwa, Kalunga koye.
Itandi gandja esimano lyandje kugulwe;
itandi etha okusimanekwa kwandje ku ye kiimenka.
9Iinima nda hunganekithile nale, oya ningi yoshili.
Ngashingeyi otii mu lombwele iinima iipeepeka,
tandi shi ningi nokuli, manga inaayi ningwa.”
Eimbilo lyekandanga
10Imbileni Omuwa eimbilo epe;
mu imbileni ondjimbohambelelo, ooha ne dhuuyuni!
Mu hambeleleni, one mboka hamu thayile kefuta;
mu hambeleleni, iishitwa ayihe yomefuta!
Imbeni oondjimbohambelelo, oontuntu ne dhomefuta
none oonakukala mudho!
11Ombuga niilando yayo nayi tange Kalunga;
omikunda dhaKedar nadhi mu hambelele!
One mboka mwa kala moshilando Sela,
igidheni nokuligola koondunga dhoondundu!
12Hambeleleni, mboka mwa kala moontuntu dhomefuta,
ne mu simaneke Omuwa!
13Omuwa ota piti mo a ka kondje ngashika omukwiita ofule;
okwi ilongekidha nokwa pupyalela olugodhi.
Ota tsu onkalu, ta hiki ohiya yolugodhi;
aatondi ye ote ya hololele oonkondo dhe.
Kalunga ta kwatha aantu ye
14Kalunga ota ti:
“Onda mwena unene ethimbo ele nda tya thilu.
Ine yamukula nando aantu yandje.
Ngashingeyi ethimbo lyokulonga lya thiki;
otandi keme nda fa omukiintu ta thetwa.
15Otandi hanagula po iikulundundu noondundu,
otandi kukutike omwiidhi nomiti.
Omilonga otandi dhi shitukitha oontuntu
nomatale otandi ga pwinike.
16“Otandi ka enditha aaposi
moondjila inaaye enda mo nale.
Omilema dhawo otandi dhi shitukitha uuyelele,
nevi lyiisilukutumba otandi li ya yelekanithile.
Ngaka ogo omauvaneko gandje,
notandi ga tsakanitha pwaa na ekandakando.
17Ayehe mboka yi inekela iimenka,
mboka taa galikana iiyelekela, aniwa ookalunga kawo,
otaa ka fupipikwa nokusithwa ohoni.”
Israel a nyengwa okuuvu ko
18Omuwa ota ti:
“Pulakeneni, ne oombolo!
Tongololeni nawa, ne aaposi!
19Oku na tuu omuposi e vule omupiya gwandje?
Oku na tuu ombolo yi vule omutumwa gwandje tandi mu tumu?
20Israel, wa mono oshindji unene,
ihe ino pupa ko.
Ou na omakutsi gokuuva,
ihe owu uvu shike?”
21Omuwa oye Kalunga,
ngoka a sa uulaadhi okuhupitha,
onkee okwa ningi ompango ye ya kola noya simana.
22Ihe aantu ye oya yugwa,
oye edhililwa moondholongo
noya patelwa moondjedhililo.
Oya yugwa noya luwa,
nokape na ngoka e ya mangulule.
23Ope na tuu gumwe mune ta pulakene shika?
Okuza ngashingeyi olye ta pupu ko shili kushika?
24Olye a gandja po Jakob a luwe, naIsrael a yugwe?
Oye Omuwa, ngoka twa yono kuye,
oshoka inatu hala okulandula oondjila dhe
nokuvulika kiipango ye.
25Okwe tu tilile ondjahi ye ya hwama niita iilulululu.
Ondjahi ye oya tukulukile Israel ya fa omulilo;
ihe ina ndhindhilika ye ina tseya sha.
Currently Selected:
JESAJA 42: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
