JESAJA 40
40
Eithano lyomuhunganeki
1Kalunga ketu ota ti:
“Hekelekeni, hekelekeni aantu yandje.
2Aajerusalem ya tseni omukumo.
Ya lombweleni kutya ehepeko lyawo olya hulu,
noondjo dhawo ngashingeyi odha dhimwa po.
Onde ya geele egeelo lya gwana molwoondjo dhawo.”
3Ewi tali kolomoka tali ti:
“Longekidhileni Omuwa ondjila mombuga!
Paleleni Kalunga ketu epola montale!
4Omasilu agehe naga filwe po;
oondundu adhihe nadhi kumunwe po.
Iikulundundu nayi palwe,
niisilukutumba nayi yelekanithwe.
5Eadhimo lyOmuwa otali iholola:
naana yaantu otaye ke li mona ko.
Omuwa oye mwene e shi uvaneke.”
6Ewi olya ti: “Uvitha!”
Onda pula nda ti:
“Nandi uvithe shike?”
“Uvitha to ti: Aantu ayehe oya fa omwiidhi;
nesimano lyawo olya fa oongala dhokelundu.
7Omwiidhi otagu kukuta,
noongala otadhi ganya, uuna Omuwa te dhi pepithile ombepo.
Aantu kaa vulathane nomwiidhi.
8Eeno, omwiidhi otagu kukuta,
noongala otadhi ganya,
ihe oohapu dhaKalunga ketu
otadhi kala sigo aluhe.”
Ehunganeko lyeihololo lyaKalunga kaantu
9Jerusalem, londa pombanda kondundu
nou uvithe elaka etoye!
Sion, igidha newi lyopombandambanda,
u tomone onkundana ombwanawa!
Kugagana shili ngoye ino tila!
Lombwela iilando yaJuda kutya Kalunga kawo ote ya!
10Omuwa Omupangeliawike ote ya okulela,
oye omunankondoawike.
Ote etelele aantu mboka a mangulula,
11ongomusita ta litha oshigunda she;
oonzigona ote dhi gongele pamwe
noku dhi humbata momaako ge;
oonyali ote dhi sisidha nawa.
Esimano lyaKalunga kali shi kuyelekwa
12Oku na tuu ngoka ta vulu okuyeleka efuta neshambekela,
nenge a yeleke eyalelo nolundya lwe?
Oku na tuu ngoka ta pungula ontsi yevi montungwa,
nenge a vihe oondundu niikulundundu moshiviha?
13Oku na tuu ngoka ta vulu okulombwela Omuwa shoka e na okuninga?
Olye ta vulu oku mu longa,
nenge e mu pe omayele?
14Kalunga ota pula oondunge kulye,
opo a tseye ye uve ko
nokwiilonga kutya iinima ohayi ningwa ngiini?
15KOmuwa iigwana kayi na po sha;
kuye oya faathana neta limwe lyomeya,
iipuupuka moshiviha ya fa ontsi.
Nge ta tumbu oontuntu,
odho oompu dha fa owala ontsi.
16Iiyamakuti ayihe momakuti gaLibanon
inayi gwana okuyambelwa Kalunga ketu,
nomiti adhihe kadhi shi odhindji
dhi ninge iikuni yokutema omulilo.
17Iigwana ayihe kayi shi sha koshipala she,
kayi na omwago gwasha kuye.
18Kalunga ota yelekwa nalye?
Otamu mu faathanitha nashike?
19Ita faathanitha noshimenka sha hongwa kiikaha yaantu,
oshilonga shiiyela ya kolongwa noshingoli
nosha tulwa mekota lyoshisiliveli.
20Omuntu ngoka ita vulu okulanda oshisiliveli nenge oshingoli,
ota hogolola omuti gu na olute lwa kola.
Ota ka konga onkulungu, a honge oshiyelekelakalunga,
shi dhikwe itaashi tenguka.
21Kamu shi shi?
Inamu shi lombwelwa nale?
Inamu kundana, uuyuni nkene wa tameka po?
22Owa shitwa kungoka a kuutumba koshipangelapundi
mookathele mwi handiyaka yeyalelo;
aantu kombanda yevi oya fa uudhidhi.
Egulu ote li yala lya fa onguwo,
ote li alele ngetsali lyokukala mo.
23Aawa ote ya kutha ko kiipundi,
aapangeli yomuuyuni ote ya shundula.
24Oya fa iimeno opo ya tsikwa,
opo tayi tsapuka omidhi.
Omuwa nge a pepitha ombepo,
otaa pepuka po,
taa yi ombepo ya fa etutu.
25Kalunga omuyapuki ota vulu okuyelekwa nalye?
Oku na tuu ngoka e mu fa?
26Tala owala utale kegulu!
Olye a shiti oonyothi ndhoka wa tala?
Oye ngoka te dhi enditha dha fa etangakwiita.
Adhihe okwe dhi tseya nawa,
nokehe yimwe ote yi tumbula kedhina lyayo!
Oonkondo dhe oonenenene,
odha kolelela nokape na ndjoka e yi hunutha po.
Esiloshimpwiyu lya mana mo
27Israel, omolwashike to ngungutula to ti,
Omuwa ina tseya uudhigu woye
nenge e ku kwathe, sho to hepekelwa uuyuuki?
28Ku shi shi nani?
Nani ino shi uva kutya Omuwa oye Kalunga kaaluhe?
Oye a shiti omakankameno gevi.
Oye iha vulwa ye iha loloka.
Owino ye oya nyengana okutseyika.
29Oye ta tsu omukumo oonakuvulwa
naamboka yaa na oonkondo,
oonkondo dhawo ote dhi indjipaleke odhindji.
30Aagundjuka ohaa vulwa nohaa adhika kuutongwe,
aalumentu aagundjuka otaa punduka e taa ihata po,
31ihe mboka taa inekele Omuwa,
ohaa mono oonkondo oompe.
Oya fa oontsa tadhi yelutha omawawa pombanda;
ohaa matuka yo itaa vulwa;
otaye ende noitaa loloka.
Currently Selected:
JESAJA 40: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
