JESAJA 30
30
Egipiti itali vulu okukwatha
1Omuwa okwa popi a ti: “Yaye mboka haa lele Juda, oshoka oya tsile ndje ondumbo. Otaa landula oondunge inaadhi za mungame. Otaa hangana ehangano tali kondjitha ehalo lyandje nokundumbila oondjo mumwe. 2Otaa ka konga ekwatho kuEgipiti yo inaa pula ndje. Oya hala Egipiti li ya popile, nomukwaniilwa gwalyo e ya gamene. 3Ihe omukwaniilwa ita ka vula oku ya popila, negameno lyokuEgipiti otali ka hulila momupya. 4Nando aakalelipo yawo ya thika muEgipiti ya kale miilando Zoan naHanes, 5Aajuda otaa ka pongola, sho yi inekela oshigwana shaa shi kwiinekelwa, oshigwana shoka tashi nyengwa oku ya kwatha.”
6Ndika elaka lyaKalunga tali popi iithitukuti yomombuga kuumbugantu tali ti: “Aakalelipo otaye ende taa taakana oshilongo shi na iiponga, oonime, omayoka guuzigo niikoko hayi tuka. Otaa kutile omilongelo dhi na ondilo kuusino nokoongamelo dhawo, ye dhi fale koshigwana itaashi vulu oku ya kwatha. 7Ekwatho ndyoka Egipiti te li gandja, itali tompola sha. Onkee nda luku Egipiti oshilukadhina ‘Munalwango lwa mwenekwa.’ ”
Aantu aatangalali
8Kalunga okwa lombwele ndje, ndi nyolele membo onkalo yaantu, sho shi kale ehokololo tali holola kutya yo aawinayi. 9Aluhe oya tsile Kalunga ondumbo, aluhe otaa fundju, aluhe otaa tindi okupulakena omalongo gOmuwa. 10Otaa ganda aahunganeki ya mwene. Otaa ti: “Inamu tu lombwela uuyuuki mboka. Tu lombweleni shoka twa hala tu uve. Etheni tu kale nomafafaeko getu. 11Zii po putse, inamu tula omandangalati mondjila yetu. Tse inatu hala okuuva, sho tamu popi Kalunga kaIsrael omuyapuki.”
12Ihe Kalunga kaIsrael omuyapuki ota popi ta ti: “Ne kamu na ko nasha naashoka tandi mu lombwele nomwi itula ekuni mekoto. 13Otamu hunu. Omwa fa ekuma eleeleka lya tenda omusa li gwe po; ohaluka tamu ka ongotela po. 14Otamu ka nyanyulwa mwa fa oshuma sheloya sha tatuka nayi, noshikangwakangwa shokuhumbata omulilo nenge shoku ka talitha omeya kiipeleki, osho ngaa inaashi hupa po.”
15Omuwa Omupangeliawike, Kalunga kaIsrael omuyapuki, ota lombwele oshigwana ta ti: “Galukeni, itedhululeni ne mu inekele ndje meimweneneno, notamu kala mu na oonkondo e tamu hupithwa.” Ihe ne omwa tindi oku shi ninga. 16Omwa dhiladhila, mu ye ontuku aatondi yeni mwa kayila uukambe u na ondapo. Eeno, omu li mondjila, efadhukopo otamu li vulu! Omwa dhiladhila, uukambe weni ou na ondapo shili, ihe mboka taye mu tidha, oye mu vule! 17Eyuvi lyomune otali ka ya ontuku, nge tali mono omukwiita gumwe gwomaatondi naakwiita yatano oya gwana oku mu fadhukitha po amuhe. Kape na nando ogumwe gwomomatanga geni ta thigala po, shila epandela alike tali kala kondungu yondundu. 18Natango tuu Omuwa ota tegelele e mu sile ohenda. Okwi ilongekidha e mu sile olukeno, oshoka aluhe oha ningi ashike shoka shu uka. Aanelago oyo mboka ye mu inekela.
Kalunga ota ka yambeka aantu ye
19Ne aantu mboka mwa kala muJerusalem, itamu ka lila we. Omuwa oye omunamutimahenda; uuna tamu mu kugile onkugo, ote mu kwatha. 20Omuwa ote mu pititha momathimbo omadhigu, ihe oye mwene ta ka kala mo oku mu longa noitamu ka kala we noku mu konga. 21Nge tamu peguka mo mondjila mu ye kolulyo nenge kolumoho, otamu ka uva ewi konima yeni tali ti: “Ondjila oyo ndjika. Yi landuleni.” 22Otamu ka kutha iimenka yeni ya kolongwa noshisiliveli niimenka ya kolongwa noshingoli e tamu yi ekelehi ya fa onyata notamu igidha tamu ti: “Ukeni hwii!” 23Nongele mwa kunu oombuto dheni, Omuwa ota ka lokitha omvula e dhi menithe dhi koke, notamu ka mona eloolo lyeteyo, niimuna yeni tayi ka kala nomaunapelo ga andjuka. 24Oonani nuusino hau pulula omapya geni, otau ka lya omwiidhi gwehetuhetu. 25Esiku ndyoka uuna omapopilongulu gaatondi yoye taga kwatwa po, naantu yawo taa dhipagwa po, omilonga dhomeya otadhi ka tondoka tadhi kunguluka tadhi zi koondundu adhihe nokiikulundundu ayihe. 26Omwedhi otagu ka minikila gwa fa etango, netango otali ka yelelela li vule shito luheyali, uuyelele wa fa womasiku gaheyali wa gongelelwa esiku limwe. Mbika ayihe otayi ka ningwa, Omuwa sho ta manga nota aludha iilalo yaantu ye.
Omuwa ta geele Assur
27Oonkondo dhOmuwa nesimano lye otali imonikila oshinano oshile. Omulilo nolwithi otayi holola ondjahi ye. Ota popi, noohapu dhe odha hwama omulilo. 28Omufudho gwe ogwa fa efundja tali kungulula po ayihe. Otagu kombo po iigwana notagu hulitha po omadhiladhilo gayo omawinayi. 29Ihe ne, aantu yaKalunga, otamu ka kala mu na elago notamu ki imba, ngaashi hamu ningi moshituthi oshiyapuki uusiku. Otamu ka kala mu na elago mwa fa mboka taa ende nokuhika oohiya yu uka kotempeli yOmuwa, omupopili gwaIsrael.
30Omuwa ota ka uvithitha ko omuntu kehe embolongondjo lyewi lye, opo a kale u uvite oonkondo dhondjahi ye. Otaku ka kala omalaka gomulilo, omipwalakato miikogo, omvula yepoola noyoompawe. 31Aayassur otaa ka haluthwa, uuna taa uvu ewi lyOmuwa noyu uvite oonkondo dhepangulo lye. 32Omuwa nge te ya dhenge ishewe niishewe, nena aantu otaa kala taa hiki oontunda nuuharpa. Kalunga mwene ta ka kondjitha Aayassur. 33Onalenale ndjoka eziko enenenene olya longekidhwa li kale li na ehwamo tali fike po omupangeli gwaAssur. Oli li po eleeleka nolya mbwalangandja, lya longelwa iikuni oyindjiyindji. Omuwa ota ka fudha omufudho gwomulilo notagu yakitha ehwamo lyagwo.
Currently Selected:
JESAJA 30: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
