JESAJA 15
15
Kalunga ta teya po Moab
1Ehunganeko ndika otali popi Moab
Iilando Ar naKir otayi hanagulwa po muusiku umwe, neimweneneno tali siikile evi lyaMoab. 2Aadibon: otaa londo kiikulundundu, ya ka lilile pomahala giinonoma. Aamoabi otaa lilagana moluhodhi omolwiilando Nebo naMedeba; oya kulula omitse dhawo noombenzi dhawo moluhodhi. 3Aantu momapandaanda oya zala omahahi; momahalandjandja goshilando nokombanda yoongulu aantu taa lili yo taa kugu. 4Aaheshboni nAaelale taa kugu, nonkugo yawo otayi uvika sigololo okuJahas. Nokuli aakwiita otaa kakama; omukumo gwawo ogwa kana. 5Omwenyo gwandje tagu lili Moab. Aantu oya yi ontuku sigo okuZoar nokuEglat Shelishija. Yamwe otaa londo ondjila yokuLuhit taa yi taa lili; yamwe otaa ka holama kuHoronajim taa kugagana omolwehanagulo. 6Okalonga Nimrim otaka pwine, omwiidhi gwe ka kunduka otagu kukuta, noitaku kala we sha sha ziza. 7Aantu otaa tokola esilukuti lyomipopeli taa kambadhala okufadhuka po nomaliko gawo agehe. 8Koongamba dhaMoab otaku kugu onkugo tayi uvika. Otayi mbololoka yi uvitike kiilando Eglaim naBeerelim. 9Poshilando Dibon omeya momulonga oga tiliganekwa kombinzi, ihe natango Kalunga oku na sha oshitilithi e shi pungulila aantu yasho. Eeno, mboka ya hupu muMoab, ote ke ya tumina omudhipagi.
Currently Selected:
JESAJA 15: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
