JESAJA 14
14
Egaluko lyaapongekwa
1Omuwa ota ka sila Aaisraeli ohenda e te ya hogolola ishewe, ya ninge aantu ye mwene. Ote ke ya fala ishewe mevi lyawo, naakwiilongo otaye ya e tayi itula mokati kawo. 2Iigwana oyindji otayi ka kwatha Aaisraeli ya galukile kevi ndyoka Omuwa e li ya pe, naankoka iigwana otayi ka ninga aapika yAaisraeli, yi ya longele. Mboka ya kwatele po Israel, otaa ka kwatwa po kuIsrael, nAaisraeli otaa ka pangela aantu mboka ye ya hepekele nale.
Omukwaniilwa gwaBabilon muuyuni womuusi
3Omuwa ota ka pa Aaisraeli epepelelo, ya manguluke kuuwehame nokomahepeko gawo nokiilonga yuupika ya thiminikilwa oku yi longa. 4Uuna Omuwa ta gwanitha mbika, aantu otaa ka nyekela omukwaniilwa gwaBabilon taa ti:
“Omukwaniilwa omunanyanya a gwile po! Ita ka hepeka we omuntu! 5Omuwa okwa teya oonkondo dhaapangeli aakaanakalunga 6mboka ya li haa ponokele iigwana mondjahi nokuthiminika aapikwa yawo nonyanya pwaa na nando ohenda. 7Uuyuni auhe otau nyanyukilwa evululuko nombili, noshaa ngoka oti imbi ta hambelele. 8Omikiperesi nomisedeli dhaLibanon otadhi nyanyukilwa etekopo lyomukwaniilwa, oshoka kape na we ngoka te dhi komangele po, oshoka ke po.
9“Uusi owa tegamena omukwaniilwa gwaBabilon. Aathithi yaamboka ya li aanankondo kevi, oya penduka. Aakwampungu yaakwaniilwa oya yambuka kiipangelapundi yawo. 10Ayehe otaye mu igidha taa ti: ‘I! Wa ningi nani we tu fa! Owe tu fa lelalela! 11Owa li ho simanekwa noshihomo shuuhumba, ihe ngashingeyi we ya ishewe muuyuni wokuusi. To lala pombanza yeolelo nowa siikilwa komazinyo.’
12“Nyothingula, omuna gweluwa! Owa ningwa ngiini, sho wu umbilwa pevi, ngoye ngoka wa sindi iigwana? 13Owi ipopile momwenyo gwoye wa ti: ‘Otandi ka londa kegulu, otandi ka thikameka oshipangelapundi shandje pombanda handiya yoonyothi dhaKalunga. Otandi ka kuutumba koshipangelapundi kondundu yokugongalela ookalunga, mookathelelela kondundu yiiholekwa. 14Otandi londo handiyaka yiikogo, ngame ndi fe Omunankondoawike.’ 15Ihe nani owu umbilwa mohi moshaasi, mombwili yekolombongo.
16“Aasi ye ku tongolola, otaye ku sheke taa pula taa ti: ‘Omulumentu oye tuu nguka a kakamitha nale uuyuni nokwa ndjingandjinga iilongo? 17Oye tuu omulumentu ngoka a teya po iilando e ta mbugaleke uuyuni? Oye tuu ngono inaa mangulula nando oonkwatwa dhe nenge e dhi ethe dhi ye koyaandjawo?’ 18Aakwaniilwa ayehe yomuuyuni oya lala moombila dhawo nokusimanekwa, 19ihe ngoye ku na ombila, nomudhimba gwoye ogwa umbilwa meolelo. Ogwa siikilwa komidhimba dhaakwiita ya sile molugodhi, ogwa umbilwa pamwe nadho mombogo yemanya nogwa lyatagulwa. 20Molwashoka wa yono po oshilongo shoye mwene e to dhipaga aantu yoye, ito ka fumvikwa wa fa aakwaniilwa yalwe. Kape na nando ogumwe gwomegumbo lyoye ta ka hupa ko. 21Etheni utale, eso li homate! Aamati aana yomukwaniilwa otaa ka sa moluulunde woohekulu. Kape na nando ogumwe gwomuyo ta ka pangela uuyuni nenge e u tungile iilando.”
Kalunga ta teya po Babilon
22Omuwa Omunankondoawike ota ti: “Otandi ka ponokela Babilon e tandi shi kumuna po. Itandi hupitha po sha — itaku hupu aanona, itaku hupu omuntu e na omwenyo. Ongame mwene, Omuwa, nde dhi popi. 23Babilon otandi shi ningi ondombe yontopo nehala lyomahwiyu. Babilon otandi shi kombo po noshikombe shoka tashi kutha po ayihe. Ongame, Omuwa, nda popi!”
Kalunga ta teya po Assur
24Omuwa Omunankondoawike okwa gana ta ti: “Shoka nda nuna, otashi ka ningwa, shoka ndu utha okuningwa, otashi ka gwanithwa. 25Aayassur otandi ke ya dhipaga mo moshilongo shandje shaIsrael e tandi ya lyatagulile koondundu dhandje. Aantu yandje otandi ke ya mangulula mondjoko yAayassur nokomutenge ngoka ya li ye na oku gu humbata. 26Shika osho nda tokola kombinga yuuyuni; nokwooko kwandje okwa taganana okugeela iigwana.” 27Omuwa Omunankondoawike okwa tokola e shi gwanithe. Okwa taganeke okwooko kwe a geele, nokape na ngoka ta vulu oku mu kankeka.
Kalunga ta teya po Filistea
28Elaka ndika olyu uvithwa omumvo ngwiyaka omukwaniilwa Ahas a sa.
29Aafilisti, ongola ndjoka ye mu dhenge, oya tokoka, ihe kamu na okunyanyukwa. Uuna eyoka tali si, ekwawo etilithi otali hituka peha lyalyo. Meyi lyeyoka omwa tendulwa oshikoko shomawawa. 30Omuwa ota ka ninga omusita gwaantu ye oohepele, naakwanaluhepo ote ke ya tula megameno. Ihe ne Aafilisti ote ke mu tumina ondjala yekomba, noitayi hupitha ko nando ogumwe a kale e na omwenyo.
31Iilando ne amuhe yAafilisti, kugeni ne mu kolomoke! Amuhe kakameni! Oshikogo sholwithi otashi zi kuumbangalantu — osho etangakwiita moka kaamu na nando omumbanda.
32Oontumwa ndhoka tadhi zi kuFilistia, otadhi yamukulwa ngiini? Eyamukulo olyo ndika kutya Omuwa okwa tungu Sion, naantu ye aahepekwa otaa ka mona mo egameno.
Currently Selected:
JESAJA 14: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
