HESEKIEL 12
12
Omuhunganeki ta ningi ontauki
1Omuwa okwa lombwele ndje a ti: 2“Muna gwomuntu, owa kala mokati kaantu aanandumbo. Oye na omeho, ihe kaye wete ko; oye na omakutsi, ihe kayu uvite ko, oshoka oyo aatangalali.
3“Muna gwomuntu, manga ngashingeyi omutenge wa fa ontauki e to piti mo komatango. Monika kwaayehe, sho to yi kehala lilwe. Otashi vulika aatangalali taye ku koneke. 4Manga inaaku wiwila, manga omutenge gwoye okuya muupongekwa, opo ya wape ye ku mone. Ongulohi naye ku tongolole ihe, sho to yi wa fa to yi muupongekwa. 5Manga ye ku tongolola, tsa ombululu mekuma lyongulu yoye e to pitile mo wa humbata omutenge gwoye. 6Naye ku tongolole, sho to itsike omutenge noto zi mo wa uka momilema wi isiikila komeho, opo kuu mone ho wa uka. Shoka to ningi, otashi kala elondodho kAaisraeli.”
7Onda ningi shoka Omuwa a lombwele ndje ndi shi ninge. Esiku ndyoka onda manga omutenge, ngaashi ontauki hayi ningi, nongulohi ndjoka sho taku luudha, onda tsu ombululu mekuma niikaha yandje e te piti mo. Manga ayehe ye shi tongolola, ondi itsike omutenge e te yi.
8Ongula yanakwasha Omuwa okwa lombwele ndje a ti: 9“Muna gwomuntu, ngashingeyi sho Aaisraeli mbaka aanandumbo taye ku pula shoka to ningi, 10ya lombwela shoka tandi ya lombwele, ngame, Omuwa Omupangeliawike. Elaka ndika nali lombwelwe elenga ndyoka tali lele muJerusalem naantu ayehe ye li mo. 11Ya lombwela kutya shoka wa ningi, osho ehunganeko lyaashoka taa ka ningilwa — otaa ka ninga oontauki noonkwatwa. 12Omupangeli ngoka te ya lele, ote ki itsika omutenge gwe momilema e ta fadhuka po ta pitile mombululu ndjoka ye yi mu hokele mekuma. Ota ka siikila omeho ge noita mono hoka ta yi. 13Ihe otandi ka tega omwigo, notagu mu yulu. Otandi ke mu fala koshilando Babilon, nkoka ta ka sila inee shi mona. 14Aambala naalangeli ye ayehe otandi ke ya halakanithila koombinga adhihe, naantu otaye ke ya konga, ye ya dhipage.
15“Uuna tandi ya halakanithile mokati kiigwana yilwe, nomiilongo yaakwiilongo, otaa ka tseya kutya ongame Omuwa. 16Aashona yomuyo otandi ke ya hupitha ko kiita, kondjala nokoshivu, opo ya ka hokolole mokati kiigwana, nkene ya longo iihuna yi nyanyalitha, notaa ka tseya kutya ongame Omuwa.”
Endhindhiliko lyomuhunganeki ta ningi omahwilili
17Omuwa okwa lombwele ndje a ti: 18“Muna gwomuntu, nge to li, kakama, nou dhekwete kuumbanda, uuna to nu. 19Lombwela oshigwana ashihe kutya elaka ndika Omuwa Omupangeliawike ote li lombwele Aajerusalem mboka ye li natango moshilongo shawo: Otaa ka kakama, nge taa li notaa dhekweta kuumbanda, nge taa nu. Oshilongo shawo otashi ka mbugala, oshoka ayehe ye li mo, otaa kolokosha 20Iilando mbyoka yu udha aantu ngashingeyi, otayi ka hanagulwa po, noshilongo otashi ka ninga eputu. Nena otaa ka tseya kutya ongame Omuwa.”
Eyeletumbulo li holike, nelaka lyaa holike
21Omuwa okwa lombwele ndje a ti: 22“Muna gwomuntu, omolwashike Aaisraeli haa ifola meyeletumbulo ndika: ‘Omasiku otaga ka pita, nomamoniko itaga eta sha?’ 23Ngashingeyi ya lombwela shoka ngame, Omuwa Omupangeliawike, ndi na oku shi popya. Otandi hulitha po eyeletumbulo ndyoka. Itali ki ifolwa we muIsrael. Peha lyalyo ya lombwela: ‘Omasiku otage ya, uuna emoniko kehe tali ka gwanithwa.’
24“Mokati kAaisraeli itamu ka holoka we omamoniko giifundja nenge omahunganeko taga pukitha. 25Ongame, Omuwa Omupangeliawike, tandi ke ya lombwela, naashoka tandi ti, otashi ka gwanithwa. Itaku ka kala we eshelelelwo. Aatangalali ne, mokukalamwenyo kweni otandi ka gwanitha ashihe shoka nda popi.” Omuwa osho ta ti.
26Omuwa okwa lombwele ndje a ti: 27“Muna gwomuntu, Aaisraeli otaa dhiladhila kutya omamoniko goye nomahunganeko goye oge li monakuyiwa. 28Onkee ano ya lombwela kutya ngame, Omuwa Omupangeliawike, ote ti: ‘Kaku na nando ohapu yandje tayi gwile pevi. Shoka nda popi, otashi ka gwanithwa.’ Ongame, Omuwa Omupangeliawike nda popi.”
Currently Selected:
HESEKIEL 12: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
