HESEKIEL 11
11
Jerusalem tashi pangulwa
1Ombepo yOmuwa oya yelutha ndje po, noya fala ndje komweelo gwotempeli gwokuuzilo. Pomweelo onda mono po aalumentu omilongo mbali nayatano ye li pamwe naJaazania yaAssur naPelatia yaBenaia, aawiliki yoshigwana yaali.
2Kalunga okwa lombwele ndje a ti: “Muna gwomuntu, aalumentu mbaka otaa dhiladhila omadhiladhilo omawinayi e taa gandja omayele omawinayi moshilando shika. 3Otaa ti: ‘Otatu ka tunga po omagumbo ishewe mbala. Oshilando osha fa ombiga tayi yaya, notse otwa fa onyama yi li muyo.’ 4Ngashingeyi ya hunganekela, ngoye omuna gwomuntu.”
5Ombepo yOmuwa oya lambele ndje nokwa lombwele ndje ndi faalele aantu elaka tali ti: “Aaisraeli ne, ondi shi shi shoka tamu popi naashoka tamu dhiladhila. 6Omwa dhipaga aantu oyendji moshilando, sigo omapandaanda gu udha omidhimba.
7“Onkee ano ngame, Omuwa Omupangeliawike, tandi lombwele oshilando shika kutya osho naanaa ombiga ndjoka tayi yaya, ihe onyama oshike? Oyo omidhimba dhaamboka mwe ya dhipaga! Itamu ka kala po mpaka — otandi ke mu umbila pondje yoshilando! 8Omwa tila egongamwele, ihe otandi ka eta mboka taye mu ponokele ye na omagongamwele. 9Otandi ke mu fala pondje yoshilando noku mu gandja kaakwiilongo. Onde mu tokolela eso, 10notamu ka dhipagelwa molugodhi moshilongo sheni yene. Shaa ngoka ota ka tseya kutya ongame Omuwa. 11Oshilando shika itashi ke mu gamena, ngaashi ombiga tayi gamene onyama yi li muyo. Otandi ke mu geela shaa mpoka mu li moshilongo Israel. 12Otamu ka tseya kutya ongame Omuwa — one mboka mwa yono oompango dhandje noinamu vulika komautho gandje, ihe omwa dhiginine oohedhi dhiigwana ye mu kunduka.”
13Manga nda li tandi hunganeke, ye Pelatia yaBenaia okwi ihata pevi omukukutu. Ondi ihata po nda tsu oshipala mevi e tandi igidha te ti: “Aawe, Omuwa Omupangeliawike! Oto ka dhipaga po shaa ngoka a hupu muIsrael?”
Ehangano epe tali uvanekelwa aapongekwa
14Omuwa okwa lombwele ndje a ti: 15“Muna gwomuntu, aantu mboka ye li muJerusalem, otaye ku popi nAaisraeli ooyakweni mboka mwa kala nayo muupongekwa. Otaa ti: ‘Aapongekwa oye li kokule unene okulongela Omuwa. Omuwa okwe tu pe evi ndika, li kale eliko lyetu.’
16“Ngashingeyi lombwela aapongekwa ooyakweni shoka tandi popi. Ongame mwene nde ya tumu, ya ka kale kokule mokati kiigwana noku ya halakanithila miilongo yilwe. Onkene tuu ethimbo ndyoka taa kala ko, otandi ka kala pamwe nayo momavi moka ya kala mo.
17“Onkee ya lombwela shoka ngame, Omuwa Omupangeliawike, tandi ti. Otandi ya kongolola ko kiilongo ayihe hoka nde ya halakanithile ko, notandi ke ya galulila kevi lyaIsrael. 18Uuna taa shuna, otaa ka kanyutuka ko kiimenka ayihe yi sitha ohoni noyi nyanyalitha. 19Otandi ke ya pa omwenyo omupe nombepo ompe. Otandi ke ya kutha omutimamanya notandi ya pe omwenyo hagu vulika. 20Otaa ka vulika koompango dhandje nokudhiginina omautho gandje agehe. Otaa ka ninga aantu yandje, ongame note kala Kalunga kawo. 21Ihe otandi ka geela aantu mboka ye hole okusimaneka iimenka iisithahoni niinyanyalithi. Otandi ke ya geelela shoka ya longo.” Omuwa Omupangeliawike a popi.
Eadhimo lyOmuwa otali thigi po Jerusalem
22Aakerubi oya tuka po, nomagulutemba oga yi wo pamwe nayo. Eadhimo lyaKalunga kaIsrael olya li lye ya siikila. 23Eadhimo lyaKalunga nolya thigi po oshilando e tali yi kondundu yokuuzilo washo. 24Memoniko Ombepo yaKalunga oya yambula ndje po e tayi eta ndje kaapongekwa muBabilon. Opo ihe emoniko olye etha ndje, 25nonda hokololele aapongekwa ayihe mbyoka Omuwa a ulukile ndje.
Currently Selected:
HESEKIEL 11: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
