2 ONDJALULO 2
2
Omalongekidho gokutunga otempeli
(1 Aak. 5:1-18)
1Omukwaniilwa Salomo okwa tokola, a tunge otempeli moka Omuwa ta simanekelwa, ye i itungile wo uuwa we mwene. 2Okwa tula aalumentu 70 000 miilonga yokututa iitungitha naalumentu 80 000 miilonga yokuhonga omamanya. Okwa li aalumentu 3 600 mboka taa tonatele iilonga.
3Salomo okwa tumu elaka komukwaniilwa Hiram gwaTiro tali ti: “Tu longele kumwe, ngaashi wa li ho longele kumwe natate, omukwaniilwa David, sho we mu landitha omisendeli dhokutunga uuwa we. 4Otandi ka tunga otempeli, ndi simaneke Omuwa, Kalunga kandje. Otayi ka kala eha eyapuki, moka tse naantu yandje tatu ke mu simanekela moku mu fikila iitsinino yiizimba ya nika nawa, moka tatu ka gandja kuye omagano gomayambo giikwiila iiyapuki sigo aluhe, notatu ka yamba omafikilondjambo ongula kehe nongulohi kehe, mOmasabati nomiituthi yomwedhi omupe nomomasiku omakwawo omayapuki, tu simaneke Omuwa, Kalunga ketu, palombwelo lye ndongo aluhe. 5Otempeli ndjoka tandi yi tungu, otayi kala onene, oshoka Kalunga ketu oye omunene e vule ookalunga ayehe yalwe. 6Nokuli kape na muntu ta vulu okutungila Kalunga otempeli, oshoka negulu lyo lyene, eeno, nuule walyo itau vulu oku mu kwatelela mo. Ano ote vulu ngiini okutunga otempeli ndjoka tayi ti sha? Shila okulungunithila ashike Kalunga omayambo. 7Ngashingeyi tumina ndje omuntu enyakwa miilonga yokutaka, mokuhambula oshingoli, oshisiliveli, oshikushu, nosheela oshiluudhe nomokutunga iiyata iimbulau, iitiliganembwilili niitiligane. Ota ka longa pamwe noonkulungu dhomuJuda naJerusalem ndhoka dha kongelwe kutate David. 8Onda tseya kutya aantu yoye oonkulungu miipilangi, onkee tumina ndje omiti dhomisendeli, dhomikiperesi nodhomisendeli dhokuLibanon. Ondi ilongekidha okutuma aantu yandje, ya kwathe aantu yoye 9mokulongekidha omiti odhindjidhindji, oshoka otempeli ndjoka nda dhiladhila yi tungwe, otayi ka kala onene noyo opalelela. 10Otandika sila aakomangeli oshimpwiyu shiikulya. Otandi ku tumine osiima yoolata omayuvi omathele gane, iishokelya yoolata omayuvi omathele gane nomaviinu goolata omayuvi omilongo ne nomagadhi gooholivi goolata omayuvi omilongo ne.”
11Omukwaniilwa Hiram okwa yamukula Salomo e te mu tumine ontumwafo. Okwa nyola ta ti: “Omuwa okwe ku ningi omukwaniilwa gwoshigwana she, oshoka oku shi hole. 12Omuwa, Kalunga kaIsrael, Omushiti gwegulu nogwevi na hambelelwe! Okwa pe omukwaniilwa David omunawino e na oondunge nuunkulungu okutungila Omuwa otempeli nokwiitungila uuwa we mwene. 13Otandi ku tumine omulumentu onkulungu nomunandunge, edhina lye Huram. 14Yina ogwomezimo lyaDan nahe omvalele yomuTiro. Oku shi okuhambula oshingoli, oshisiliveli, oshikushu niiyela iiluudhe, noku shi okuhonga omamanya niipilangi. Oku shi okutunga iiyata iimbulau, iitiliganembwilili niitiligane noyoliina. Oku shi okutaka omamanya nota kutha mo nawa shoka ta lombwelwa. Mu longitha pamwe noonkulungu dhoye naamboka ya li haa longele ho, omukwaniilwa David. 15Tu tumina ano osiima, iishokelya, omaviinu, nomagadhi ngoka wa uvaneke. 16Omisendeli ndhoka to pumbwa, otatu ke dhi ku komangelela moondundu dhaLibanon e tatu dhi manga iihampi noku dhi tula mefuta, dhi endithilwe mo sigo okuJoppa. Okuza mpoka otamu dhi kutha po, mu dhi fale kuJerusalem.”
Etungo lyotempeli tali tameke
(1 Aak. 6:1-38)
17Omukwaniilwa Salomo okwa yalulitha aakwiilongo ayehe ya kala mevi lyaIsrael, ngaashi he David a ningile. Okwa li aakwiilongo ya kala moshilongo 153 600. 18Aantu 70 000 yomuyo okwe ya ningi aahumbati yomitenge, aantu 80 000 oyokuhonga omamanya moondundu naantu 3 600 ya tonatele iilonga yi gwanithwe.
Currently Selected:
2 ONDJALULO 2: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.