Rom 12

Jomé goang cindena go herua ca lo gié go Kumu koi

1Karmeng, ca Kumu ba sol nyageina na, ’enung olgeng ga aia gusugeng bi Kumu sandega do tibé doang cindo do arin carara do mowoi gusi, kua na melaué go cindi go kenga melaui. 2Ga belé gusugeng main hada do delinya toa kain ’eno, ama dda Kumu kelanga narua dogeng dugo mam, ca keng bbala solé henga ga Kumu kederei ba dargé bua, dang henga ga ddari bua, dang henga ga mowi gusi bua, dang henga ga bbalé kerab bu’.

3Ca olum do Kumu toi do ddi ba lang nang na, ’enung yegenga keng mam, ddo kema goni goni ddi solé gusi main ddia gumu go ddo wal kain ’eno. Dda kema goni goni a duroigé, ddi jimang ’eremé go ddari ca bo cindi goi go Kumu ba bi. 4A duro gurum gusu pena na, henga ga karang ga coaderang wo kené combu, gié goga kaindi kaindi. 5Na main kain bu’ na, kalang combu na dai gusu pena dang Krist. Na mam na dai pena main henga ga karang ga coaderang a gusu gurum go pena lé kain. 6Kumu bi kema goni goni kau, dono kalin cindo kaindo kaindo ca lo gié goi. Kema pena a duroina nia dang dono do doré kual go Kumu koi na, ddai ddi dura kual bbal ca bo cindi goi. 7Ké nia bi kema go ddang dono ca lo gié na, ddai ddi la, ddi go ké ba bi dono ca gelé kalang na, ddai ddi gelu. 8Ddi go ké ba bi dono ca géjé kalang na, ddai ddi géjegé, ddi go ké ba bi dono do bo kalang henga na, ddai ddi buang gusu mowa. Gumu go jomé tumu kalang na, ddai ddi la gié goi dang gusu hembalua, ddi go jégené kalang ga nyagé na, ddai ddi lang gusu mowa.

9Dda kederegeng ’ya gusugeng basé babé bua, ga kainyageng henga ga isini cong bua, ga ’imageng henga ga ddari gag bu’. 10Dda kederegeng ’ya gusugeng main karmé kain. Ga bugeng gusugeng hormo waldong wang. 11Ga logeng dabu ’eno, ama ga la gié ddara bua, ga lageng gié go Bagulong koi dang ddainya do ddari bu’. 12Ga jimageng dang gusu mowa ca tugoié gogeng bua, ga ’ima ddaindegeng duro gelé go cin bua, ga ulageng waindo waindo bu’. 13Ga jegena karmegeng duro nyagé dogé bua, ga lageng kergé ga orang tageng ddarua bu’.

14Ga ula Kumu ca ddi si busu ca kalang ga wa gelogeng cindegeng, ga ulai ca ddi sia busu caigé, ddo ddi bbesegé ’eno. 15Lageng gusu mowa dang ké ga gusugé wa mowegé bua, ga ’elgeng dang ké ga wa ’elé bu’. 16Jimageng labia dang gusugeng, ddo keng pedé gusugeng ’eno, ama ga lageng gié dang gusugeng, ddo keng solé gusugeng main ga nadurong kain ’eno.

17Kema nia legeng isinwa na, ga jogé loi isinwa cainé ’eno, ga lagéng henga ga ddari tumu kalang mam. 18Ga lageng henga mam dang dono go gusugeng ca jomé labia dang kalang mam. 19Kajanderndeng, ddo keng gojé gusugeng ’eno, ama ddageng kiddin ga mainyé do Kumu toi, cawa cidab do Kumu toi yé waldong wang: Bagulong yé wa, Na ’enunga go gojé bua, na ’enunga go jogé boié baiméné bu’. 20Cidab do Kumu toi yé waldong wang bu’: Koin go tebena kurang nia lei na, ji bi henga ga do bua, kemasu nia lei na, ji bi kang ga so bu’, ji nia lé main kain na, ji wa yaua tua kurjo gua cai. 21Ddo isinwa ddo caigeng ’eno, ama ga ddageng isinwa dang ddarua.

Currently Selected:

Rom 12: TNG1978

Highlight

Copy