2 Corintios 1
1
Pablo itijwile papo Sinia' jilis
1Asampey, i'lijwas ti jleyejyi jana isi' Corinto,#Hch 18.1 ti kia'iyo Sinia' jilists'ase'm pet, asam'neje ti jleyejyi jana Acaya, ti Sinia' jika kia'lits'ase'm. Ya'am Pablok'i'm, ti Sijwajieti Jesús jijliujwanikk'i'm, jayo'ate atajla'm siunapo ti ijiatt'iyijpe ti t'eyasajnas, lapakawo ti tajle jla'am pi Sinia' ka kiak iyoyi. Yi'ijiap 'ni sikiecha Timoteo, yam'neje ti 'eti' siu'nie imp'esinik. 2'Esiji ka Sinia', siu'neje pa Saka'niona Jesús ti Sijwajieti, imp'elisinajyimpe, jla'yi ti jane'nasap ni jikamankiye iyo.
Iyo siupuwa inilayiti pa Pablo
3Awunit pa Jinia' pa Saka'niona Jesús ti Sijwajieti, Sinia' ti wuj ti kasp'elisijne'n, jla'yi ti kasnejienk'i'ni pijia'm ti kia'iyo ti poyeta ni sijliak'ali. 4Jla'am ti inijienk'i pijia'm niwa sosikis ti potie pi siwet'ia iyo. 'Yina ka kiak iyokieyipi pet, ja 'yakajlaja ti janiukieje napo si'lijwas ti janijienak'i pijia'm niwa jlosikis, ti kia'iyo jijliak'ali po'. Jayikiajlaja siunie iyonts'e ti iniuyits'e'm. 5Iyoye pet 'ate ti ijiate ti siliaye iniuyi wita'm pi Sijwajieti, ti wuj ti inilayiti pi jijliak'ali, 'yina kia'iyo'ni pet pa Sinia' ti ijiate ti iniuyeje ni sosik, ti k'iejlitieje pi siwet'ia, ka lajak'i pi iyo pi Sijwajieti.
6Ijiatataja wek ti wuj ti anilayitieje siu'nie iyo ni sijliak'ali, 'yina lapakawo ti jlam je aniwonaja jiwek, kajeyepa ti nak its'iuye pet ji'wet'e ti janejnank'i pijia'm niwa asosikis, jla'yi ti jant'emina ti jajwaye. 'Yina jlampet siuti Sinia' inijnan pijia'm ni sosik, naka pet ti jant'emina ti asjweye japoye, sek jane'yi ka atomayenie'e ilia'm siuniwa iyo asjlak'aliye jawoyena'a 'ate iyo awoki ti sa'am, ti atataja isia'm naka ni anilayitieje sijliak'ali. 7Tempi it'imina ti je sikiwit'ase'm, 'yina ti 'yaka ti je ink'asayi pijia'm naka, siunie ti jinilayitieyi kiak iyo yits'e, kiak janwo'ojyi pet Sinia' janwents'e'm siunie ja jijweyeja' siunie asosik, iyonts'e ti iwints'e'm naka.
8I'lijwas, awotajank'iye ka 'najanayi ti siuti a 'nijiye yi'i jlaja ajnat Asia, wuj ti kiojieti ki yik'i, paj ti ijiatayiji ti je ato'm ilia'm, jlaje. Sekyi'i anilekie'ni jiwek, kajeyepa ti je aninaye'e. 9'Yina awok'ne 'ate, “Ijiat'iyiji ti sek kasjla'.” 'Yina iniuyits'em'ne kiaka ka sitiej je iyomaja paka i'nioye, 'wenajliyi jla'am pa Sinia', ti jla'am ti iniujwank'i kisie'e papo 'yajle'n, ti itiajlajni pi a'no'. 10-11Ijiatjliyi kasjwajiete'ne ki siliaye iyo. Je 'nakataje, ts'iji kiak jawo ja kasjwajiete, siuti janoyeyits'e'm kasts'ajlan'ni pet. Itiej awoma pa Sinia' ti ja ke ileyi ti janoyits'e'm ti ja kasjwajiete siupi siliaye jawo. 'Yina siuti ja 'lojwa napo i'nio' ti ja kasts'ajlan'ni, Sinia' jankiujli ni t'ajlaye, sek jane'yi ka wenats'imna'a siunie 'es. Sek jane'yi ja ke piniye napo i'nio' ti kiak jawoyisi pit ti jawoyis jinikanitieyejayi pa Sinia', ti jan'wenis siuniwa isis tajle pi Sinia' ti yikialts'e.
Siupi it'imina pi Pablo ti je ijio Coríntojo
12Po' ni siunie iyo sinikanitieyeja'. Jlajmiliet siuti awak aska kiowe'e, lajk'ipa ka sikioweja ka je 'esie ka ininekiajlaja, siu'neje ti lajk'ipa ka ijiatayiji ka into'm isiame. 'Yina siuti kia'iyo, je tajle siunie iyo ti kasts'ajajne'n, 'wenajliyi jla'am pa Sinia' ti jikap'ijliuskiye po' ti iniuyits'e'm, paka ti tajle, it'imina ti kasts'isis ti awak'i ape'e 'ni ajnat. 13-14Siuti ajloyeta'ase 'ni ip'isinik akajanitk'i ask'ioye, ijiatjliyi 'najanayi. 'Yina awotajank'iye ka ijiatayi ka 'najanayi, jak je iyoyiji siuti ja'nes pi Saka'niona Jesús ja wujwa ti ja inkasak'i wita'm sitipe'e, jlam pet ti sa'am kiak jayoki ja kasts'akask'i wita'm astepe'e.
15'Yina siuti kiaka ti je akakiuni, it'imina ti awo ka iniajnat ka ijio'wase, it'imintaja ka timesieyiji ka ijio'wase. 16Siunie awotajapi ka iyoyi, ka ijio 'niji Macedóniaja, sekyi'i ka 'yuyetaja astepe'e ka yapimet. Ka noyeyetajak'i'm siupa ka k'iejliyeyi ka isitia'n, ti jajio 'niji Judéaja.
17Jet'i 'es ti aleyek'i siukia jota iyoyi, ¿jet'i 'yu'we ka kiak je awonak'i 'ate? Je 'yaka paka iwoyi. ¿Ni'ne ka si'wena ti yam ya'am ti talk'i siunie awoyi, siuti awo'ate, “Kiak jayonie'e”, 'yina paj ti aleyiji siunie awo ka iyoyi? 18'Yejne'n, Sinia' 'yijene naka, ti ijiatk'i siunie awoyi, ti je ka iyo'ate, “Kiak jayonie'e”, sek jane'yi ka 'wena iyoyeyi, ka iyo'ate, “Aleyiji siukia awo ka iyoyi.” 19Kajeyepa ti nakape ti awoki samtikie', japo Silvano#1.19 Silvano: Silas jle' kiecha, tiwonat'iyi'nipe pet siunie ti yi'i ni Hechos 15.22—18.5 (1.19). siu'neje ja Timoteo, ti awak aska kiowe'e,#Hch 18.5 ajwel ni Sijwajieti Jesús ti Sinia' jlas. 'Yina je naka ni siunie ‘ji'lija itimisiete’, 'yina naka ni siunie Sinia' jlonisik ti iyoyi siunie ijiatk'i. 20'Yina jlam ti it'imina ti 'yaka siuniwa iyo niwa Sinia' jlamtis yi'i ni ji'wet, iyot'iyipi jla'am ti ijwi'il siupa jawo. Tempi it'imina ti kiak awoki ti awok'iate, “Pak kasts'isisi pa Sijwajieti Jesús, Amén”, ti awunitiejata pa Sinia'.
21Sinia' jla'am ti kasts'etk'i pijia'm pa Sijwajieti ti awakiejap, 'yina ti jla'am ti isimts'e'm, 22sekyi'i iyo sijwukisa', kajeyepa ti 'yaka ti jla'am ti Saka'niona. Jla'yi ti yijni niwa sikiojwa'l jana jikimet ti 'es ti tajle siojopa janwents'e'm, ka netiejenie'e siojopa jika jlomaye pet, ti iniajnat ta'a.#Rom 8.23; Ef 1.14
23Sinia' itiant'ieje ki iyo ni yiji ni ijiusik, siunie it'imina ti ja ke iniu'wase ka yikta. Awo kajeyepa ti je awo ka yikiajle'eje ka ilianki'nase ni astankiujnieye. 24Je ka iyo ka itiumayi'ni asek'i, siupa ka woyeyi ka ijiatayi ka tankiunieyi. Jlajmiliet ti je ink'asayik'i siunie ti jiwoyeyi ni astankiujniejeye ti 'es, kajeyepa ti pajk'i ti jiwoyeyi. Lapakawo ti awotaja ka iniuye'ase'm, ka asnikanitieyi poye pet.
Currently Selected:
2 Corintios 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.